Deuteronomio 10

BSNP Edita

Deuteronomio 10

10:1 "E tempu ei SEÑOR a bisami: 'Kap pa bo mes dos tabla-di-piedra manera esunnan di promé, i subi bin serka Mi riba seru i traha un arka di palu pa bo mes.

10:2 I lo Mi skirbi riba e tablanan e palabranan ku tabatin riba e promé tablanan ku bo a kibra na pida-pida, i bo mester pone nan den e arka.'

10:3 "Asina mi a traha un arka di palu di akasia i a kap dos tabla-di-piedra manera esunnan di promé, i a subi bai riba e seru ku e dos tablanan den mi man.

10:4 I El a skirbi riba e tablanan konforme e promé skirbimentu, e Dies Mandamentunan ku SEÑOR a papia ku boso riba e seru for di meimei di e kandela riba e dia di asamblea, i SEÑOR a dunami nan.

10:5 E ora ei mi a bira i a baha for di e seru i a pone e tablanan den e arka ku mi a traha; i aya nan a keda, manera SEÑOR a ordenámi."

10:6 (Awor e yunan di Israel a sali for di Beerot-bene-jaakan, bai Mosera. Aya Aaron a muri i aya nan a der'é, i su yu hòmber Eleazar a sirbi komo saserdote na su lugá.

10:7 For di aya nan a sali pa Gudgoda, i for di Gudgoda pa Jotbata, un tera yen di roi di awa.

10:8 E tempu ei SEÑOR a apartá e tribu di Leví pa karga e arka di aliansa di SEÑOR, pa para dilanti di SEÑOR pa sirbiE i pa bendishoná den Su nòmber te dia djawe.

10:9 Pesei Leví no tin parti ni erensia ku su ruman hòmbernan; SEÑOR ta su erensia, meskos ku SEÑOR bo Dios a bis'é.)

10:10 "Ademas, mi a keda riba e seru kuarenta dia i kuarenta nochi, manera e promé biaha, i SEÑOR a skuchami e biaha ei tambe; SEÑOR no kier a destruíbo.

10:11 E ora ei SEÑOR a bisami: 'Lanta, sigui bo biahe dilanti di e pueblo, pa nan drenta i poderá di e tera ku Mi a hura na nan tatanan di duna nan.'

10:12 "I awor, Israel, kiko SEÑOR bo Dios ta pidi di bo, si no ta pa teme SEÑOR bo Dios, pa kana den tur Su kamindanan i stim'E, i pa sirbi SEÑOR bo Dios ku henter bo kurason i ku henter bo alma,

10:13 i pa warda e mandamentunan di SEÑOR i Su statutonan ku mi ta ordenábo awe pa bo mes bon?

10:14 "Mira, na SEÑOR bo Dios ta pertenesé shelu i e shelu di shelunan, tera i tur loke tin den djé.

10:15 Sinembargo, ta riba bo tatanan SEÑOR a pone Su afekshon pa stima nan, i El a skohe boso, nan desendientenan despues di nan, riba tur pueblo, manera ta awe.

10:16 Sirkumsidá anto e prepusio di boso kurason i no hasi boso nèk steif mas.

10:17 Pasobra SEÑOR boso Dios ta e Dios di diosnan i e Señor di señornan, e Dios grandi, poderoso i temibel, Kende no ta hasi distinshon di persona, ni ta aseptá plaka pasá bou di mesa.

10:18 E ta hasi hustisia na wérfano i biuda, i ta mustra Su amor pa e stranhero dor di dun'é kuminda i paña pa bisti.

10:19 Asina anto, mustra boso amor pa e stranheronan, pasobra boso tabata stranhero na tera di Egipto.

10:20 Teme SEÑOR bo Dios i sirbiE; pega na djE i hura den Su nòmber.

10:21 E ta bo alabansa i E ta bo Dios, Kende a hasi e kosnan grandi i temibel aki pa bo ku bo wowo a mira.

10:22 Bo tatanan a baha bai Egipto, setenta persona na tur, i awor SEÑOR bo Dios a hasibo mes hopi ku e streanan di shelu.

Deuteronomio 9 Deuteronomio 11