Amos 4
4:1
Tende e palabra aki, boso, bakanan di Basan ku ta riba e seru di Samaria, ku ta oprimí e pobernan, ku ta plècha esnan den nesesidat, ku ta bisa boso esposonan: "Trese awor, pa nos bebe!"
4:2
Señor DIOS a hura pa Su santidat: "Mira, e dianan ta bin riba boso ku nan lo hiba boso ku hak pa kologá karni na djé, i esnan di boso ku keda, ku anzué pa kohe piská kuné.
4:3
Boso lo sali dor di e kibránan den muraya, kada un stret su dilanti, i boso lo wòrdu tirá na Harmon," SEÑOR ta deklará.
4:4
"Drenta Bèt-èl i transgresá; multipliká transgreshon na Gilgal! Trese boso sakrifisionan tur mainta, boso diesmonan kada tres dia.
4:5
Ofresé un ofrenda ku tin zürdeg aden komo un ofrenda di gradisimentu, i proklamá ofrendanan boluntario, hasi nan konosí. Pasobra asina boso gusta hasi, boso yunan di Israel," Señor DIOS ta deklará.
4:6
"Ma Mi a duna boso tambe limpiesa di djente den tur boso statnan, i falta di pan den tur boso lugánan; tòg boso no a bolbe serka Mi," SEÑOR ta deklará.
4:7
"I ademas, Mi a laga di manda awaseru pa boso, mientras ku tabatin tres luna ainda promé ku kosecha. Anto Mi a manda awaseru riba ún stat, i riba un otro stat Mi no a manda awaseru; un parti a haña awaseru, mientras ku e parti ku no a haña awaseru a seka.
4:8
Asina dos òf tres stat tabata kana zeilu bai na un otro stat pa bebe awa, ma no a wòrdu satisfasé; tòg boso no a bolbe serka Mi," SEÑOR ta deklará.
4:9
"Mi a suta boso ku bientu kayente i beskem; i bichi tabata devorá boso kantidat di hòfinan i kunukunan di wendrùif, palunan di figo i palunan di oleifi; tòg boso no a bolbe serka Mi," SEÑOR ta deklará.
4:10
"Mi a manda un plaga meimei di boso, meskos ku na Egipto; Mi a mata boso hobennan ku spada, huntu ku boso kabainan kapturá. I Mi a hasi e holó stinki di boso kampamentu subi bai den boso nanishi; tòg boso no a bolbe serka Mi," SEÑOR ta deklará.
4:11
"Mi a destruí boso, manera Dios a destruí Sodoma i Gomora. I boso tabata manera un palu saká for di kandela; tòg boso no a bolbe serka Mi," SEÑOR ta deklará.
4:12
"Pesei, asina lo Mi hasi ku bo, O Israel; pasobra Mi ta bai hasi esaki ku bo, prepará pa kontra ku bo Dios, O Israel."
4:13
Pasobra mira, Esun ku ta forma serunan i ta krea bientu i ta deklará na hende kiko Su pensamentunan ta, Esun ku ta hasi habrimentu di dia bira skuridat i ta trapa riba e lugánan haltu di tera, SEÑOR Dios di ehérsitonan ta Su nòmber.