2 Samuel 10
10:1
I a sosodé ku despues di esaki rei di e amonitanan a muri, i su yu hòmber Hanun a bira rei na su lugá.
10:2
Anto David a bisa: "Lo mi mustra kariño na Hanun, yu hòmber di Nahas, meskos ku su tata a mustrami kariño." Asina David a manda algun di su sirbidónan pa konsol'é pa motibu di e morto di su tata. Ma ora David su sirbidónan a yega na e tera di e amonitanan,
10:3
e prensnan di e amonitanan a bisa Hanun, nan señor: "Bo ta kere ku ta onra David ta onra bo tata, pasobra el a manda konsoladó serka bo? No ta pa ristra e stat, pa spion'é i pa derot'é David a manda su sirbidónan serka bo?"
10:4
Asina Hanun a kohe David su sirbidónan i a feita mitar di nan barba, i a kòrta nan paña na mitar kit'afó pareu ku nan hep i a manda nan bai.
10:5
Ora nan a konta David esaki, el a manda hende bai topa nan, pasobra e hòmbernan a wòrdu umiyá mashá. I rei a bisa: "Keda na Jeriko te ora boso barba krese, i e ora ei boso bolbe."
10:6
Awor ora ku e yu hòmbernan di Amon a mira ku nan a bira un abominashon pa David, e yu hòmbernan di Amon a manda hür e sirionan di Bèt-rehob i e sirionan di Soba, binti mil sòldá-na-pia, i rei di Maaka ku mil hòmber, i e hòmbernan di Tob ku diesdos mil hòmber.
10:7
Ora David a tende esaki, el a manda Joab i henter e ehérsito, e hòmbernan poderoso.
10:8
I e yu hòmbernan di Amon a sali i a pone nan mes den òrdu di bataya na entrada di e stat, mientras ku e sirionan di Soba i Rehob i e hòmbernan di Tob i Maaka a keda nan so den sabana.
10:9
Awor ora Joab a mira ku e bataya tabata kontra djé dilanti i patras, el a skohe for di tur e hòmbernan skohí di Israel, i a pone nan den òrdu di bataya kontra e sirionan.
10:10
Ma e hendenan ku a resta el a pone den man di su ruman hòmber Abisai, i Abisai a pone nan den òrdu di bataya kontra e yu hòmbernan di Amon.
10:11
I Joab a bisa: "Si e sirionan ta muchu fuerte pa mi, e ora ei abo lo yudami, ma si e yu hòmbernan di Amon ta muchu fuerte pa bo, e ora ei ami lo yudabo.
10:12
Sea fuerte, i laga nos mustra nos mes yen di kurashi pa kousa di nos pueblo i pa e statnan di nos Dios; i ku SEÑOR hasi loke ta bon den Su bista."
10:13
Asina Joab i e pueblo ku tabata huntu kuné a hala serka pa bringa kontra e sirionan, i nan a hui su dilanti.
10:14
Ora ku e yu hòmbernan di Amon a mira ku e sirionan a hui, nan tambe a hui dilanti di Abisai i a drenta e stat. Anto Joab a bin bèk for di bataya kontra e yu hòmbernan di Amon i a yega Jerusalèm.
10:15
Ora ku e sirionan a mira ku nan a wòrdu derotá dor di Israel, nan a reuní huntu.
10:16
I Hadadezer a manda buska e sirionan for di e otro banda di Riu Eufrates, i nan a bin Helam; i Sobak, komandante di e ehérsito di Hadadezer, tabata guia nan.
10:17
Awor ora nan a konta David esaki, el a reuní henter Israel huntu, a krusa Jordan i a bin Helam. I e sirionan a pone nan mes den òrdu di bataya pa kontra ku David i a bringa kontra djé.
10:18
Ma e sirionan a hui dilanti di Israel; i di e sirionan David a mata shete shen koredó di garoshi i kuarenta mil hòmber riba kabai, i a mata Sobak, komandante di nan ehérsito, i el a muri einan.
10:19
Ora tur e reinan, sirbidónan di Hadadezer, a mira ku Israel a derotá nan, nan a hasi pas ku Israel i a sirbi nan. Pesei e sirionan tabatin miedu di bolbe yuda e yu hòmbernan di Amon.