2 Reinan 22
22:1
Josias tabatin ocho aña dia ku el a bira rei, i el a reina trint'i un aña na Jerusalèm; i nòmber di su mama tabata Jedida, yu muhé di Adaia, di Bozkat.
22:2
I el a hasi bon den bista di SEÑOR i a kana den henter e kaminda di su tata David; tampoko e no a desviá ni na man drechi ni na man robes.
22:3
Awor a sosodé den e di diesocho aña di rei Josias, ku rei a manda Safan, yu hòmber di Azalía, yu hòmber di Mesulam, e eskriba, na e kas di SEÑOR, bisando:
22:4
"Bai serka sumosaserdote Hilkias pa konta e plaka ku a wòrdu tresí den e kas di SEÑOR, ku e wardadónan-di-porta a rekohé for di e pueblo.
22:5
I laga nan entregá esaki den man di e trahadónan ku tin enkargo di e kas di SEÑOR, i laga nan duna esaki na e trahadónan ku ta den e kas di SEÑOR pa drecha e dañonan di e kas:
22:6
na e karpinténan, e trahadónan den konstrukshon i e mèslánan, i pa kumpra palu i piedra gekap pa drecha e kas.
22:7
Solamente, no mester pidi nan pa duna kuenta di e plaka entregá den nan man, pasobra nan ta hende onesto."
22:8
E ora ei sumosaserdote Hilkias a bisa Safan, e eskriba: "Mi a haña e buki di lei den e kas di SEÑOR." I Hilkias a duna Safan e buki, i el a les'é.
22:9
I Safan, e eskriba, a bin serka rei i a trese rospondi bèk pa rei i a bisa: "Bo sirbidónan a saka tur e plaka ku a wòrdu hañá den e kas, i a entregu'é den man di e trahadónan ku tin enkargo di e kas di SEÑOR."
22:10
Ademas, Safan, e eskriba, a konta rei, bisando: "Saserdote Hilkias a dunami un buki." I Safan a les'é den presensia di rei.
22:11
I a sosodé ku ora rei a tende e palabranan di e buki di lei, el a sker su pañanan.
22:12
E ora ei rei a ordená saserdote Hilkias, Ahikam, yu hòmber di Safan, Akbor, yu hòmber di Mikaias, Safan, e eskriba, i Asaia, sirbidó di rei, bisando:
22:13
"Bai konsultá ku SEÑOR pa mi, pa e pueblo i pa henter Juda, tokante di e palabranan di e buki aki ku a wòrdu hañá; pasobra grandi ta e furia di SEÑOR ku ta kima kontra nos, pasobra nos tatanan no a skucha e palabranan di e buki aki, pa hasi konforme tur loke ta pará skirbí tokante di nos."
22:14
Asina saserdote Hilkias, Ahikam, Akbor, Safan i Asaia a bai serka Hulda, e profeta muhé, esposa di Salum, yu hòmber di Tikva, yu hòmber di Harhas, wardadó di e kashi-di-warda-paña (awor Hulda tabata biba na Jerusalèm den e Di Dos Bario); i nan a papia kuné.
22:15
I el a bisa nan: "Asina SEÑOR Dios di Israel ta bisa: 'Bisa e hòmber ku a manda boso serka mi,
22:16
asina SEÑOR ta bisa: "Mira, Mi ta trese kalamidat riba e lugá aki i riba su habitantenan--tur e palabranan di e buki ku rei di Juda a lesa--
22:17
pasobra nan a bandonáMi i a kima sensia pa otro diosnan, pa nan probokáMi na rabia ku henter e obra di nan man, pesei Mi furia ta kima kontra e lugá aki i lo no wòrdu pagá."'
22:18
Ma na rei di Juda, kende a manda boso pa konsultá ku SEÑOR, asina boso mester bis'é: 'Asina SEÑOR Dios di Israel ta bisa: "Tokante di e palabranan ku bo a tende--
22:19
pasobra bo kurason tabata suave i bo a umiyá bo mes dilanti di SEÑOR ora bo a tende kiko Mi a papia kontra e lugá aki i kontra su habitantenan, ku nan lo bira un desolashon i un maldishon, i pasobra bo a sker bo pañanan i a yora Mi dilanti, di bèrdat, Mi a tendebo," SEÑOR ta deklará.
22:20
"Pesei, mira, lo Mi reuníbo ku bo tatanan, i lo bo wòrdu poní den bo graf na pas; i bo wowo lo no mira tur e kalamidat ku lo Mi trese riba e lugá aki."'" Asina nan a trese rospondi bèk pa rei.