2 Reinan 21
21:1
Manasés tabatin diesdos aña dia ku el a bira rei, i el a reina sinkuent'i sinku aña na Jerusalèm; i nòmber di su mama tabata Hepsiba.
21:2
I el a hasi malu den bista di SEÑOR, konforme e abominashonnan di e nashonnan ku SEÑOR a kita for di dilanti di e yunan di Israel.
21:3
Pasobra el a rekonstruí e lugánan haltu ku su tata Ezekias a destruí; i el a lanta altarnan pa Baal i a traha un imagen di Asera, manera Akab, rei di Israel, a hasi, i a adorá henter e ehérsito di shelu i a sirbi nan.
21:4
I el a traha altarnan den e kas di SEÑOR, di kual SEÑOR a bisa: "Na Jerusalèm lo Mi pone Mi nòmber."
21:5
Pasobra el a traha altarnan pa henter e ehérsito di shelu riba e dos plenchinan di e kas di SEÑOR.
21:6
I el a hasi su yu hòmber pasa dor di kandela, a hasi bruheria i a uza adivinashon, i a konsultá ku montadó i spiritista. El a hasi hopi maldat den bista di SEÑOR i a probok'E na rabia.
21:7
Anto el a pone e imagen grabá di Asera ku el a traha den e kas di kual SEÑOR a bisa David i su yu hòmber Salomon: "Den e kas aki i na Jerusalèm, ku Mi a skohe for di tur e tribunan di Israel, lo Mi pone Mi nòmber pa semper.
21:8
I lo Mi no hasi e pianan di Israel dwal mas for di e tera ku Mi a duna nan tatanan, kontal ku nan pèrkurá di hasi konforme tur loke Mi a ordená nan, i konforme henter e lei ku Mi sirbidó Moisés a ordená nan."
21:9
Ma nan no a skucha, i Manasés a instigá nan pa hasi mas maldat ku e nashonnan ku SEÑOR a destruí dilanti di e yunan di Israel.
21:10
Awor SEÑOR a papia pa medio di Su sirbidónan, e profetanan, bisando:
21:11
"Pasobra Manasés, rei di Juda, a hasi e abominashonnan aki, i a hasi mas maldat ku tur e amoreonan ku tabata promé kuné, i a hasi Juda tambe peka ku su ídolonan,
21:12
pesei, asina SEÑOR, e Dios di Israel, ta bisa: 'Mira, Mi ta trese kalamidat di tal forma riba Jerusalèm i Juda, ku ken ku tende di djé, tur dos su oreanan lo flùit.
21:13
I lo Mi ekstendé riba Jerusalèm e liña-di-midi di Samaria i e chumbu-di-midi di e kas di Akab, i lo Mi limpia Jerusalèm manera ta limpia un tayó, limpi'é i bir'é bok'abou.
21:14
I lo Mi bandoná e restante di Mi erensia i entregá nan den man di nan enemigunan; i nan lo bira manera proi i botín pa tur nan enemigunan,
21:15
pasobra nan a hasi malu den Mi bista i a probokáMi na rabia for di dia ku nan tatanan a bin for di Egipto te dia djawe.'"
21:16
Ademas, Manasés a drama masha hopi sanger inosente, te ora ku el a yena Jerusalèm di punta pa punta, fuera di su piká ku kual el a hasi Juda peka, dor di hasi malu den bista di SEÑOR.
21:17
Awor e demas echonan di Manasés i tur loke ku el a hasi i su piká ku el a kometé, nan no ta pará skirbí den e Buki di Krónikanan di e reinan di Juda?
21:18
I Manasés a bai sosegá serka su tatanan i a wòrdu derá den e hòfi di su mes kas, den hòfi di Uza; i su yu hòmber Amon a bira rei na su lugá.
21:19
Amon tabatin bint'i dos aña dia ku el a bira rei, i el a reina dos aña na Jerusalèm; i nòmber di su mama tabata Mesulemet, yu muhé di Haruz, di Jotba.
21:20
I el a hasi malu den bista di SEÑOR, manera su tata Manasés a hasi.
21:21
Pasobra el a kana den henter e kaminda ku su tata a kana, i a sirbi e ídolonan ku su tata a sirbi, i a adorá nan.
21:22
Asina el a bandoná SEÑOR, e Dios di su tatanan, i no a kana den e kaminda di SEÑOR.
21:23
I e sirbidónan di Amon a konspirá kontra djé i a mata rei den su mes kas.
21:24
E ora ei e hendenan di e tera a mata tur esnan ku a konspirá kontra rei Amon; i e hendenan di e tera a hasi su yu hòmber Josias rei na su lugá.
21:25
Awor e demas echonan di Amon ku el a hasi, nan no ta pará skirbí den e Buki di Krónikanan di e reinan di Juda?
21:26
I el a wòrdu derá den su graf den e hòfi di Uza, i su yu hòmber Josias a bira rei na su lugá.