2 Reinan 18
18:1
Awor a sosodé ku den e di tres aña di Oseas, yu hòmber di Ela, rei di Israel, Ezekias, yu hòmber di Akaz, rei di Juda, a bira rei.
18:2
E tabatin bint'i sinku aña dia ku el a bira rei, i el a reina bint'i nuebe aña na Jerusalèm; i nòmber di su mama tabata Abi, yu muhé di Zakarias.
18:3
I el a hasi bon den bista di SEÑOR, konforme tur loke su tata David a hasi.
18:4
El a kita e lugánan haltu, a kibra e pilarnan sagrado i a kap e imagen di Asera bash'abou. Tambe el a kibra e kolebra di bròns ku Moisés a traha na pida-pida, pasobra te na e dianan ei e yunan di Israel tabata kima sensia p'é; i nan tabata yam'é Nehustan.
18:5
E tabata konfia den SEÑOR, e Dios di Israel, asina ku despues di djé no tabatin ni ún manera é den tur e reinan di Juda, ni den esnan ku tabata promé kuné.
18:6
Pasobra el a tene duru na SEÑOR; e no a laga di siguiE, ma a warda Su mandamentunan, ku SEÑOR a ordená Moisés.
18:7
I SEÑOR tabata kuné; unda ku el a bai, el a prosperá. I el a rebeldiá kontra rei di Asiria i no a sirbié.
18:8
El a derotá e filisteonan te na Gaza i su teritorio, for di e toren di vigilansia te na e stat fortifiká.
18:9
Awor a sosodé den e di kuater aña di rei Ezekias, kual tabata e di shete aña di Oseas, yu hòmber di Ela, rei di Israel, ku Salmanasar, rei di Asiria, a bin kontra Samaria i a rondon'é.
18:10
I na fin di tres aña nan a kaptur'é; den e di seis aña di Ezekias, i kual tabata e di nuebe aña di Oseas, rei di Israel, Samaria a wòrdu kapturá.
18:11
E ora ei rei di Asiria a hiba Israel den eksilio na Asiria, i a hiba nan Hala i banda di Habor, e riu di Gozan, i den e statnan di e medonan,
18:12
pasobra nan no a obedesé e bos di SEÑOR nan Dios, ma a kibra Su aliansa, asta tur loke Moisés, e sirbidó di SEÑOR, a ordená, nan no kier a skucha, ni hasi.
18:13
Awor den e di dieskuater aña di rei Ezekias, Senakerib, rei di Asiria, a bin kontra tur e statnan fortifiká di Juda i a kapturá nan.
18:14
E ora ei Ezekias, rei di Juda, a manda rospondi pa rei di Asiria na Lakis, bisando: "Mi a hasi malu. Bai for di mi; kiko ku bo imponé riba mi, lo mi karga." Asina rei di Asiria a eksigí di Ezekias, rei di Juda, tres shen talento di plata i trinta talento di oro.
18:15
I Ezekias a dun'é tur e plata ku a wòrdu hañá den e kas di SEÑOR, i den e lugánan-di-warda-tesoro di e kas di rei.
18:16
Den e tempu ei Ezekias a kita e oro for di e portanan di e tèmpel di SEÑOR, i for di e koseinnan-di-porta ku Ezekias, rei di Juda, a fura ku oro, i a duna rei di Asiria esaki.
18:17
E ora ei rei di Asiria a manda Tartan, Rabsaris i Rabsakes for di Lakis ku un ehérsito grandi serka rei Ezekias na Jerusalèm. Asina nan a bai i a yega Jerusalèm. I ora nan a bai, nan a yega i a bai para banda di e akuadukto di e tanki ariba, ku ta keda na e kaminda grandi di e Fèlt di Labadó.
18:18
Ora nan a yama rei, Eliakim, yu hòmber di Hilkias, kende tabata mayordomo di e kas, Sebna, e eskriba, i Joa, yu hòmber di Asaf, e registradó, a sali bin serka nan.
18:19
E ora ei Rabsakes a bisa nan: "Awor bisa Ezekias: 'Asina e gran rei, rei di Asiria, ta bisa: "Riba kiko bo ta basa e konfiansa aki ku bo tin?
18:20
Bo ta bisa (ma esakinan ta solamente palabranan bashí): 'Mi tin konseho i forsa pa guera.' Awor ta den ken bo ta konfia, ku bo a rebeldiá kontra mi?
18:21
Awor mira, bo ta konfia den e bara di richi machiká aki, esta, den Egipto, ku si un hende lèn riba djé, e ta drenta den su man i ta traspas'é. Asina Farao, rei di Egipto, ta pa tur esnan ku ta konfia den djé.
18:22
Ma si bo bisami: 'Nos ta konfia den SEÑOR nos Dios,' no ta E ta Esun, Kende Su lugánan haltu i Kende Su altarnan Ezekias a kita, i a bisa Juda i Jerusalèm: 'Boso mester adorá dilanti di e altar aki na Jerusalèm'?
18:23
"Pesei anto, bin hasi un kombenio ku mi shon, rei di Asiria, i lo mi dunabo dos mil kabai, si abo, di bo banda, por pone koredó riba nan.
18:24
Kon anto bo por resistí un solo ofisial, un di esnan di mas menos di e sirbidónan di mi shon, i konfia den Egipto pa garoshi i pa koredó di kabai?
18:25
Akaso sin e aprobashon di SEÑOR mi a bin awor kontra e lugá aki pa destruié? SEÑOR a bisami: 'Lanta kontra e tera aki i destruié.'"'"
18:26
E ora ei Eliakim, yu hòmber di Hilkias, Sebna i Joa a bisa Rabsakes: "Papia awor ku bo sirbidónan na arameo, pasobra nos ta komprendé esei, i no papia ku nos na lenga hebreo, pa e pueblo ku ta riba muraya no komprendé."
18:27
Ma Rabsakes a bisa nan: "Akaso ta serka bo shon i serka abo so mi shon a mandami pa papia e palabranan aki, i no serka e hòmbernan ku ta sinta riba muraya, kondená pa kome nan mes sushi i bebe nan mes urina huntu ku boso?"
18:28
E ora ei Rabsakes a para grita na bos haltu na lenga hebreo, bisando: "Tende e palabra di e gran rei, rei di Asiria.
18:29
Asina rei ta bisa: 'No laga Ezekias gaña boso, pasobra e lo no por libra boso for di mi man;
18:30
ni laga Ezekias hasi boso konfia den SEÑOR, bisando: "SEÑOR lo libra nos sigur, i e stat aki lo no wòrdu entregá den man di rei di Asiria."
18:31
'No skucha na Ezekias, pasobra asina rei di Asiria ta bisa: "Hasi pas ku mi i sali bin serka mi, i kada un kome di su mata di wendrùif i kada un kome di su palu di figo, i kada un bebe di e awa di su mes rembak,
18:32
te ora mi bin i hiba boso na un tera manera boso mes tera, un tera di mainshi i biña nobo, un tera di pan i di kunukunan di wendrùif, un tera di palunan di oleifi i miel, pa boso biba i no muri." 'Ma no skucha na Ezekias, ora ku e ta gañá boso, bisando: "SEÑOR lo libra nos."
18:33
Akaso un di e diosnan di e nashonnan a yega di libra su tera for di man di rei di Asiria?
18:34
Unda e diosnan di Hamat i Arfad ta? Unda e diosnan di Sefarvaim, Hena i Iva ta? Nan a libra Samaria for di mi man?
18:35
Ken entre tur e diosnan di e teranan a yega di libra nan tera for di mi man, ku SEÑOR lo por libra Jerusalèm for di mi man?'"
18:36
Ma e pueblo a keda ketu i no a kontest'é ni un palabra, pasobra e òrdu di rei tabata: "No kontest'é."
18:37
E ora ei Eliakim, yu hòmber di Hilkias, kende tabata mayordomo di e kas, i Sebna, e eskriba, i Joa, yu hòmber di Asaf, e registradó, a sker nan pañanan i a bin serka Ezekias, i a kont'é e palabranan di Rabsakes.