2 Reinan 16
16:1
Den e di dieshete aña di Peka, yu hòmber di Remalias, Akaz, yu hòmber di Jotam, rei di Juda, a bira rei.
16:2
Akaz tabatin binti aña dia ku el a bira rei, i el a reina dieseis aña na Jerusalèm; i e no a hasi bon den bista di SEÑOR su Dios, manera su tata David a hasi.
16:3
Ma el a kana den e kaminda di e reinan di Israel, i asta a hasi su yu hòmber pasa dor di kandela, konforme e abominashonnan di e nashonnan ku SEÑOR a kore kuné for di dilanti di e yunan di Israel.
16:4
I el a ofresé sakrifisio i a kima sensia riba e lugánan haltu i riba e serunan, i bou di tur palu bèrdè.
16:5
E ora ei Rezin, rei di Siria, i Peka, yu hòmber di Remalias, rei di Israel, a bin Jerusalèm pa hasi guera; i nan a rondoná Akaz, ma no por a vens'é.
16:6
E tempu ei Rezin, rei di Siria, a bolbe konkistá Elat pa Siria, i a saka e hudiunan kompletamente for di Elat; i e sirionan a bin Elat, i a biba ayanan te dia djawe.
16:7
Asina Akaz a manda mensaheronan serka Tiglat-pileser, rei di Asiria, bisando: "Mi ta bo sirbidó i bo yu hòmber; bin i librami for di man di rei di Siria, i for di man di rei di Israel, kendenan ta lanta kontra mi."
16:8
I Akaz a kohe e plata i e oro ku a wòrdu hañá den e kas di SEÑOR den e lugánan-di-warda-tesoro di e kas di rei, i a manda un regalo pa rei di Asiria.
16:9
Asina rei di Asiria a skuch'é; i rei di Asiria a bai kontra Damasko i a kaptur'é, i a hiba su hendenan na Kir den eksilio, i a mata Rezin.
16:10
Awor rei Akaz a bai Damasko pa kontra ku Tiglat-pileser, rei di Asiria, i a mira e altar ku tabatin na Damasko; i rei Akaz a manda pa saserdote Urias e diseño di e altar ku su plannan detayá pa su konstrukshon.
16:11
Asina saserdote Urias a traha un altar; konforme tur loke rei Akaz a manda for di Damasko, asina saserdote Urias a trah'é, promé ku yegada di rei Akaz for di Damasko.
16:12
I ora rei a yega for di Damasko, rei a mira e altar; e ora ei rei a aserká e altar i a subi bai na djé,
16:13
i a kima su ofrenda kimá i su ofrenda di mainshi, a basha su ofrenda di bibida i a sprèngu e sanger di su ofrendanan di pas riba e altar.
16:14
I e altar di bròns ku tabata dilanti di SEÑOR el a trese for di parti dilanti di e kas, for di entre su altar i e kas di SEÑOR; i el a pon'é na e banda nòrt di su altar.
16:15
E ora ei rei Akaz a ordená saserdote Urias, bisando: "Kima riba e altar grandi e ofrenda kimá di mainta ku e ofrenda di mainshi di atardi, e ofrenda kimá di rei i su ofrenda di mainshi, i e ofrenda kimá di henter e pueblo di e tera ku nan ofrenda di mainshi i nan ofrendanan di bibida; i sprèngu riba djé tur e sanger di e ofrenda kimá i tur e sanger di e sakrifisio. Ma e altar di bròns lo ta pa mi konsultá pa medio di djé."
16:16
Asina saserdote Urias a hasi konforme tur loke rei Akaz a ordená.
16:17
E ora ei rei Akaz a kòrta e rantnan di e basenan afó, i a kita e labamanonan for di nan; tambe el a baha e laman for di riba e bueynan di bròns ku tabatin bou di djé, i a pon'é riba un flur di piedra.
16:18
I e koredor ku nan a traha na e kas pa dia di sabat i e entrada di rei ku tabata mas pafó, el a kita for di e kas di SEÑOR pa motibu di rei di Asiria.
16:19
Awor e demas echonan di Akaz ku el a hasi, nan no ta pará skirbí den e Buki di Krónikanan di e reinan di Juda?
16:20
Asina Akaz a bai sosegá serka su tatanan i el a wòrdu derá serka su tatanan den e stat di David; i su yu hòmber Ezekias a reina na su lugá.