2 Reinan 12
12:1
Den e di shete aña di Jehú, Joas a bira rei i el a reina kuarenta aña na Jerusalèm; i nòmber di su mama tabata Sibia di Beerseba.
12:2
I Joas a hasi bon den bista di SEÑOR tur e dianan ku saserdote Joiada tabata instruié.
12:3
Solamente e lugánan haltu no a wòrdu kitá; ainda e pueblo tabata ofresé sakrifisio i kima sensia riba e lugánan haltu.
12:4
E ora ei Joas a bisa e saserdotenan: "Tur e plaka di e artíkulonan santu ku nan ta trese den e kas di SEÑOR, na plaka koriente, tantu e plaka ku ta stipulá pa kada hende, komo tur e plaka ku kada hende ta proponé den su kurason pa trese den e kas di SEÑOR,
12:5
laga e saserdotenan tuma esaki pa nan mes, kada un for di su konosínan; i laga nan drecha e dañonan na e kas, na unda ku nan haña kualke daño."
12:6
Ma a sosodé ku den e di bint'i tres aña di rei Joas, ainda e saserdotenan no a drecha e dañonan na e kas.
12:7
E ora ei rei Joas a manda yama saserdote Joiada i e otro saserdotenan i a bisa nan: "Pakiko boso no ta drecha e dañonan na e kas? Pesei anto, no tuma mas plaka for di boso konosínan, ma paga esaki pa e dañonan na e kas."
12:8
Asina e saserdotenan a bai di akuèrdo ku nan lo no tuma mas plaka for di e pueblo, ni drecha e dañonan na e kas.
12:9
Ma saserdote Joiada a kohe un kaha i a bora un buraku den su tapa, i a pone esaki banda di e altar, na banda drechi ora bo ta drenta e kas di SEÑOR; i e saserdotenan ku tabata tene warda na e drèmpel tabata pone tur e plaka ku a wòrdu tresí den e kas di SEÑOR den djé.
12:10
I ora nan a mira ku tabatin hopi plaka den e kaha, e eskriba di rei i e sumosaserdote a bin mara esaki den sakunan i a konta e plaka ku a wòrdu hañá den e kas di SEÑOR.
12:11
I nan a entregá e plaka ku nan a pisa den man di esnan ku tabata hasi e trabou, esnan ku tabatin enkargo di e kas di SEÑOR; i kuné nan tabata paga e karpinténan i e trahadónan ku tabata traha riba e kas di SEÑOR,
12:12
i e mèslánan i e kapdónan di piedra, i pa kumpra palu i piedra gekap pa drecha e dañonan na e kas di SEÑOR, i pa tur e otro gastunan ku tabatin pa drecha e kas.
12:13
Ma ku e plaka ku a wòrdu tresí den e kas di SEÑOR nan no a traha kopanan di plata, kosnan-pa-paga-lampi, puncheronan, tròmpètnan, artíkulonan di oro, ni artíkulonan di plata, pa e kas di SEÑOR;
12:14
pasobra esei nan a duna na esnan ku tabata hasi e trabou, i kuné nan a drecha e kas di SEÑOR.
12:15
Ademas, nan no tabata pidi e hòmbernan, na kende nan tabata entregá e plaka pa paga esnan ku tabata hasi e trabou, pa duna kuenta, pasobra nan tabata onesto.
12:16
Nan no tabata hiba e plaka di e ofrendanan pa kulpa i e plaka pa e ofrendanan pa piká den e kas di SEÑOR; esaki tabata pa e saserdotenan.
12:17
E ora ei Hazael, rei di Siria, a bai bringa kontra Gat i a kaptur'é; asina Hazael a proponé den su kurason pa bai kontra Jerusalèm.
12:18
I Joas, rei di Juda, a kohe tur e artíkulonan santu ku Josafat, Joram i Okozias, su tatanan, reinan di Juda, a dediká, i su mes artíkulonan santu i tur e oro ku a wòrdu hañá den e lugánan-di-warda-tesoro di e kas di SEÑOR i di e kas di rei, i a manda nan pa Hazael, rei di Siria. E ora ei el a bai for di Jerusalèm.
12:19
Awor e demas echonan di Joas i tur loke ku el a hasi, nan no ta pará skirbí den e Buki di Krónikanan di e reinan di Juda?
12:20
I su sirbidónan a lanta i a traha un kòmplòt, i a mata Joas na e sitadel, ora ku e tabata baha bai Sila.
12:21
Pasobra Jozakar, yu hòmber di Simeat, i Jozabad, yu hòmber di Somer, su sirbidónan, a dal é mata; i nan a der'é serka su tatanan den e stat di David, i su yu hòmber Amasias a bira rei na su lugá.