2 Kronikonan 35
35:1
Despues Josias a selebrá Pasku na SEÑOR na Jerusalèm, i nan a mata e bestianan di Pasku riba e di dieskuater dia di e promé luna.
35:2
I el a pone e saserdotenan den nan puesto i a enkurashá nan pa e sirbishi di e kas di SEÑOR.
35:3
Tambe el a bisa e levitanan ku tabata duna siñansa na henter Israel i ku tabata santu pa SEÑOR: "Pone e arka santu den e kas ku Salomon, yu hòmber di David, rei di Israel, a traha; e lo no ta un karga mas riba boso skouder. Awor sirbi SEÑOR boso Dios i Su pueblo Israel.
35:4
I prepará boso mes segun e kasnan di boso tatanan den boso divishonnan, konforme e instrukshon di David, rei di Israel, i konforme e instrukshon di su yu hòmber Salomon.
35:5
"Ademas, para den e lugá santu, segun e divishonnan di e kasnan di e tatanan di boso rumannan, e yunan di tera, i segun e levitanan, konforme e divishonnan di e kasnan di e tatanan.
35:6
Awor, mata e bestianan di Pasku, santifiká boso mes, i prepará boso rumannan pa nan hasi konforme e palabra di SEÑOR pa medio di Moisés."
35:7
I Josias a kontribuí pa e yunan di tera, pa tur ku tabata presente, tounan di lamchi i di yu di kabritu, tur pa e ofrendanan di Pasku, un total di trinta mil, plùs tres mil bishé machu; esakinan tabata for di rei su mes propiedat.
35:8
Su ofisialnan tambe a kontribuí ku un ofrenda boluntario pa e pueblo, e saserdotenan i e levitanan. Hilkias, Zakarias i Jehiel, e ofisialnan di e kas di Dios, a duna e saserdotenan pa e ofrendanan di Pasku dos mil seis shen bestia chikitu i tres shen bishé machu.
35:9
Tambe Konanias ku su ruman hòmbernan Semaias i Natanael, i Hasabias, Jeiel i Jozabad, e ofisialnan di e levitanan, a duna e levitanan sinku mil bestia chikitu i sinku shen bishé machu pa e ofrendanan di Pasku.
35:10
Asina e sirbishi a wòrdu prepará, i e saserdotenan a para na nan lugá i e levitanan segun nan divishon, konforme e òrdu di rei.
35:11
I nan a mata e bestianan di Pasku, i mientras ku e saserdotenan tabata sprèngu e sanger risibí for di nan man, e levitanan tabata soya nan.
35:12
Despues nan a apartá e ofrendanan kimá pa nan duna nan na e divishonnan di e kasnan di e tatanan di e yunan di tera, pa ofresé nan komo sakrifisio na SEÑOR, manera ta pará skirbí den e buki di Moisés. Asina nan a hasi tambe ku e bishénan machu.
35:13
Asina nan a roster e bestianan di Pasku riba e kandela, konforme e ordenansa, i nan a herebé e kosnan santu den wea, den ketel i den panchi, i lihé lihé nan a hiba nan pa tur e yunan di tera.
35:14
I despues nan a prepará pa nan mes i pa e saserdotenan, pasobra e saserdotenan, e yu hòmbernan di Aaron, tabata ofresé e ofrendanan kimá i e vèt te anochi; pesei, e levitanan a prepará pa nan mes i pa e saserdotenan, e yu hòmbernan di Aaron.
35:15
E kantadónan, e yu hòmbernan di Asaf, tambe tabata na nan lugá, konforme e òrdu di David, Asaf, Heman i Jedutun, e miradó di rei; i e wardadónan-di-porta na kada porta no tabatin mester di kita for di nan sirbishi, pasobra nan ruman hòmbernan, e levitanan, a prepará pa nan.
35:16
Asina henter e sirbishi di SEÑOR a wòrdu prepará riba e dia ei pa selebrá Pasku, i pa ofresé ofrendanan kimá riba e altar di SEÑOR, konforme e òrdu di rei Josias.
35:17
Asina e yunan di Israel ku tabata presente a selebrá Pasku na e tempu ei, i e Fiesta di Pan Sin Zürdeg, shete dia largu.
35:18
I nan no a selebrá un Pasku asina na Israel desde e dianan di profeta Samuel; tampoko ningun di e reinan di Israel no a selebrá un Pasku asina manera Josias a hasi huntu ku e saserdotenan, e levitanan, henter Juda i Israel ku tabata presente, i e habitantenan di Jerusalèm.
35:19
Nan a selebrá e Pasku aki den e di diesocho aña di e reinado di Josias.
35:20
Despues di tur esaki, ora ku Josias a pone e tèmpel na òrdu, Neko, rei di Egipto, a bin pa hasi guera na Karkemis banda di Riu Eufrates, i Josias a sali bai pa enfrent'é.
35:21
Ma Neko a manda mensaheronan serka djé, bisando: "Kiko nos tin di hasi ku otro, O rei di Juda? No ta kontra bo mi ta bin awe, sino kontra e kas ku mi ta na guera kuné, i Dios a mandami hasi lihé. Pa bo mes bon, stòp di oponé Dios, Kende ta ku mi, pa E no destruíbo."
35:22
Sinembargo, Josias no kier a retirá for di djé, ma a disfrasá su mes pa bai bringa kontra djé; ni e no a tende na e palabranan di Neko, kualnan tabata bin for di boka di Dios, ma a bin pa bringa den e sabana di Meguido.
35:23
I e tiradónan di flecha a tira rei Josias, i rei a bisa su sirbidónan: "Hibami for di aki, pasobra mi ta gravemente heridá."
35:24
Asina su sirbidónan a sak'é for di e garoshi i a kargu'é hiba den e di dos garoshi ku e tabatin, i a hib'é Jerusalèm kaminda el a muri i a wòrdu derá den e tumbanan di su tatanan. I henter Juda i Jerusalèm a tene rou pa Josias.
35:25
E ora ei Jeremias a kanta un lamento pa Josias. I tur e kantadónan hòmber i muhé ta menshoná Josias den nan lamentashonnan te dia djawe. I nan a hasi nan bira un kustumber fiho na Israel; mira, nan ta pará skirbí tambe den e Lamentashonnan.
35:26
Awor e demas echonan di Josias i su obranan di deboshon, manera ta pará skirbí den lei di SEÑOR,
35:27
i su echonan, for di promé te delaster, mira, nan ta pará skirbí den e Buki di reinan di Israel i Juda.