2 Kronikonan 33
33:1
Manasés tabatin diesdos aña dia ku el a bira rei, i el a reina sinkuent'i sinku aña na Jerusalèm.
33:2
I el a hasi malu den bista di SEÑOR, konforme e abominashonnan di e nashonnan ku SEÑOR a kita for di dilanti di e yunan di Israel.
33:3
Pasobra el a rekonstruí e lugánan haltu ku su tata Ezekias a bash'abou; tambe el a lanta altarnan pa e Baalnan i a traha imagennan di Asera, i a adorá henter e ehérsito di shelu i a sirbi nan.
33:4
I el a traha altarnan den e kas di SEÑOR, di kual SEÑOR a bisa: "Mi nòmber lo ta na Jerusalèm pa semper."
33:5
Pasobra el a traha altarnan pa henter e ehérsito di shelu riba e dos plenchinan di e kas di SEÑOR.
33:6
I el a hasi su yu hòmbernan pasa dor di kandela den e vaye di Bèn-hinom; i el a hasi bruheria, a uza adivinashon, a praktiká okultismo i a konsultá ku montadó i spiritista. El a hasi hopi maldat den bista di SEÑOR i a probok'E na rabia.
33:7
Anto el a pone e imagen grabá di e ídolo ku el a traha den e kas di Dios, di kual Dios a bisa David i su yu hòmber Salomon: "Den e kas aki i na Jerusalèm, ku Mi a skohe for di tur e tribunan di Israel, lo Mi pone Mi nòmber pa semper;
33:8
i lo Mi no bolbe kita pia di Israel for di e tera ku Mi a apuntá pa boso tatanan, kontal ku nan pèrkurá di hasi tur loke Mi a ordená nan, konforme henter e lei, e statutonan i e ordenansanan duná pa medio di Moisés."
33:9
Asina Manasés a gaña Juda i e habitantenan di Jerusalèm, pa hasi mas maldat ku e nashonnan ku SEÑOR a destruí dilanti di e yunan di Israel.
33:10
I SEÑOR a papia ku Manasés i su pueblo, ma nan no a hasi kaso.
33:11
Pesei SEÑOR a trese e komandantenan di e ehérsito di rei di Asiria kontra nan, i nan a kapturá Manasés ku hak, a mar'é ku kadena di bròns i a hib'é Babilonia.
33:12
I ora ku e tabata den angustia, el a roga na SEÑOR su Dios i a umiyá su mes grandemente dilanti di e Dios di su tatanan.
33:13
Ora ku el a hasi orashon na djE, El a keda konmoví dor di su rogamentu i a tende su súplika, i a hib'é atrobe na Jerusalèm na su reino. E ora ei Manasés a rekonosé ku SEÑOR ta Dios.
33:14
Awor despues di esaki el a traha e muraya di pafó di e stat di David, pabou di Gihon, den e vaye, te na entrada di e Porta di Piská; i el a lant'é tur rònt di Ofel i a hasié masha haltu mes. Anto el a pone komandantenan di ehérsito den tur e statnan fortifiká di Juda.
33:15
Tambe el a kita e diosnan stranhero i e ídolo for di e kas di SEÑOR, tambe tur e altarnan ku el a traha riba e seru di e kas di SEÑOR i na Jerusalèm; i el a tira nan pafó di e stat.
33:16
I el a lanta e altar di SEÑOR i a sakrifiká ofrendanan di pas i ofrendanan di gradisimentu riba djé; i el a ordená Juda pa sirbi e SEÑOR Dios di Israel.
33:17
Sinembargo, e pueblo a sigui ofresé sakrifisio riba e lugánan haltu, ounke solamente na SEÑOR nan Dios.
33:18
Awor e demas echonan di Manasés, asta su orashon na su Dios, i e palabranan di e miradónan ku a papia kuné den nòmber di e SEÑOR Dios di Israel, mira, nan ta pará skirbí den e bukinan di e reinan di Israel.
33:19
Tambe su orashon i kon el a roga na Dios, i tur su pikánan, su infieldat i e sitionan kaminda el a traha lugánan haltu i a lanta e imagennan di Asera i e imagennan grabá, promé ku el a umiyá su mes, mira, nan ta pará skirbí den e bukinan di e miradónan.
33:20
Asina Manasés a bai sosegá serka su tatanan, i nan a der'é den su mes kas. I su yu hòmber Amon a bira rei na su lugá.
33:21
Amon tabatin bint'i dos aña dia ku el a bira rei, i el a reina dos aña na Jerusalèm.
33:22
I el a hasi malu den bista di SEÑOR, manera su tata Manasés a hasi, i Amon a ofresé sakrifisio na tur e imagennan grabá ku su tata Manasés a traha, i el a sirbi nan.
33:23
Ademas, e no a umiyá su mes dilanti di SEÑOR, manera su tata Manasés a hasi, ma Amon a oumentá su kulpabilidat.
33:24
Finalmente su sirbidónan a konspirá kontra djé i a mat'é den su mes kas.
33:25
Ma e hendenan di e tera a mata tur esnan ku a konspirá kontra rei Amon, i e hendenan di e tera a hasi su yu hòmber Josias rei na su lugá.