2 Kronikonan 32
32:1
Despues di e echonan di fieldat aki Senakerib, rei di Asiria, a bin i a invadí Juda i a rondoná e statnan fortifiká, ku intenshon di kibra drenta nan pa su mes.
32:2
Awor ora ku Ezekias a mira ku Senakerib a bin, i ku e tabatin intenshon di hasi guera kontra Jerusalèm,
32:3
el a disidí, huntu ku su ofisialnan i su guereronan, pa kòrta e provishon di awa for di e fuentenan di awa ku tabata pafó di stat; i nan a yud'é.
32:4
Pesei, hopi hende a reuní i a dèmpel tur e fuentenan di awa i e roi ku tabata kore den e region, bisando: "Pakiko e reinan di Asiria mester bin haña awa na abundansia?"
32:5
I el a tuma kurashi i a bolbe lanta henter e muraya ku a keda bashá abou, i a lanta torennan riba djé i a traha un otro muraya parti pafó, a fortifiká e sitadel den e stat di David i a traha arma i eskudo na gran kantidat.
32:6
Tambe el a nombra ofisialnan militar riba e pueblo, i a reuní nan serka djé riba e plenchi na porta di e stat i a enkurashá nan, bisando:
32:7
"Sea fuerte i tene kurashi; no tene miedu ni desmayá pa motibu di rei di Asiria, ni pa motibu di henter e multitut ku ta huntu kuné; pasobra Esun ku ta ku nos ta mas grandi ku esun ku ta kuné.
32:8
E tin solamente un brasa di karni kuné, ma nos tin SEÑOR nos Dios huntu ku nos, pa yuda nos i pa bringa nos batayanan." I e pueblo a konfia den e palabranan di Ezekias, rei di Juda.
32:9
Despues di esaki Senakerib, rei di Asiria, a manda su sirbidónan na Jerusalèm, mientras ku e tabata rondoná Lakis ku tur su trupanan huntu kuné, kontra Ezekias, rei di Juda, i kontra henter Juda ku tabata na Jerusalèm, bisando:
32:10
"Asina Senakerib, rei di Asiria, ta bisa: 'Den kiko boso ta konfia, ku boso ta keda na Jerusalèm mientras ku e ta rondoná?
32:11
No ta gaña Ezekias ta gaña boso, pa laga boso muri di hamber i di set, bisando: "SEÑOR nos Dios lo libra nos for di man di rei di Asiria"?
32:12
E mesun Ezekias aki no a kita Su lugánan haltu i Su altarnan, i a bisa Juda i Jerusalèm: "Dilanti di ún altar so boso mester adorá i riba djé boso mester kima sensia"?
32:13
'Boso no sa kiko ami ku mi tatanan a hasi ku tur e pueblonan di e teranan? Akaso e diosnan di e nashonnan di e teranan tabata kapas pa libra nan tera for di mi man?
32:14
Kende tabatin entre tur e diosnan di e nashonnan ei ku mi tatanan a destruí kompletamente, ku por a libra su pueblo for di mi man, ku boso Dios por ta kapas pa libra boso for di mi man?
32:15
Pesei anto, no laga Ezekias pèrsuadí boso, ni gaña boso di e manera aki, i no ker'é, pasobra ningun dios di ningun nashon òf reino tabata kapas pa libra su pueblo for di mi man, ni for di man di mi tatanan. Kuantu menos boso Dios lo por libra boso for di mi man?'"
32:16
I su sirbidónan a sigui papia kontra SEÑOR Dios i kontra Su sirbidó Ezekias.
32:17
Tambe el a skirbi kartanan pa blasfemá e SEÑOR Dios di Israel i pa papia kontra djE, bisando: "Meskos ku e diosnan di e nashonnan di e teranan no a libra nan pueblo for di mi man, asina e Dios di Ezekias lo no libra Su pueblo for di mi man."
32:18
I nan a grita esaki na bos haltu na e idioma di Juda, pa e pueblo di Jerusalèm ku tabata riba e muraya tende, pa spanta i terorisá nan, pa nan por kohe e stat.
32:19
I nan a papia di e Dios di Jerusalèm na e mesun manera ku di e diosnan di e pueblonan di e tera--e obra di man di hende.
32:20
Ma rei Ezekias i profeta Isaias, yu hòmber di Amos, a hasi orashon tokante di esaki i a sklama na shelu.
32:21
I SEÑOR a manda un angel ku a destruí tur guerero poderoso, komandante i ofisial, den e kampamentu di rei di Asiria. Asina ta ku el a bolbe ku bèrguensa na su mes tera. I ora ku el a drenta tèmpel di su dios, algun di su mes yunan a mat'é ayanan ku spada.
32:22
Asina SEÑOR a salba Ezekias i e habitantenan di Jerusalèm for di man di Senakerib, rei di Asiria, i for di man di tur otronan, i a guia nan na tur banda.
32:23
I hopi hende tabata trese ofrendanan pa SEÑOR na Jerusalèm, i regalonan di balor pa Ezekias, rei di Juda, asina ku el a wòrdu halsá den bista di tur nashon despues di esaki.
32:24
Den e dianan ei Ezekias a bira malu pa muri; i el a hasi orashon na SEÑOR, i SEÑOR a papia kuné i a dun'é un señal.
32:25
Ma Ezekias no a mustra gratitut pa e bondat ku el a risibí, pasobra su kurason tabata orguyoso; pesei e furia di SEÑOR a bin riba djé i riba Juda i Jerusalèm.
32:26
Sinembargo, Ezekias a umiyá e orguyo di su kurason, tantu é komo e habitantenan di Jerusalèm, asina ku e furia di SEÑOR no a bin riba nan den e dianan di Ezekias.
32:27
Awor Ezekias tabatin masha hopi rikesa i onor; i el a traha pa su mes lugánan-di-warda-tesoro pa plata, oro, piedra presioso, speserei, eskudo i tur sorto di artíkulo di balor,
32:28
tambe depósitonan pa e produktonan di mainshi, biña i zeta, stal pa tur sorto di bestia di kria i kurá pa e tounan di karné.
32:29
I el a traha statnan pa su mes, i a akumulá tounan di bestia chikitu i krianan di baka na abundansia; pasobra Dios a dun'é masha hopi rikesa.
32:30
Ta Ezekias a dèmpel e salida di awa di e parti ariba na Gihon i a kondusié na e parti pabou di e stat di David. I Ezekias a prosperá den tur loke ku el a hasi.
32:31
Ma relashoná ku e delegashon di e gobernantenan di Babilonia, kendenan a manda puntr'é tokante di e maraviya ku a sosodé na e tera, Dios a lagu'é pa pon'é na prueba, pa E por a sa tur loke tabatin den su kurason.
32:32
Awor e demas echonan di Ezekias i su aktonan di deboshon, mira, nan ta pará skirbí den e vishon di profeta Isaias, yu hòmber di Amos, den e Buki di reinan di Juda i Israel.
32:33
Asina Ezekias a bai sosegá serka su tatanan i nan a der'é den e sekshon mas ariba di e tumbanan di e yu hòmbernan di David; i henter Juda i e habitantenan di Jerusalèm a onr'é na su morto. I su yu hòmber Manasés a bira rei na su lugá.