2 Kronikonan 31
31:1
Awor ora tur esaki a yega na un fin, tur e israelitanan ku tabata presente a sali bai na e statnan di Juda, a kibra e pilarnan na pida-pida, a kap e imagennan di Asera bash'abou, i a basha e lugánan haltu i e altarnan den henter Juda i Benjamin abou, i tambe den Efrain i Manasés, te ora nan a destruí nan tur. E ora ei tur e yunan di Israel a bolbe na nan statnan, kada un na su propiedat.
31:2
I Ezekias a nombra e divishonnan di e saserdotenan i e levitanan segun nan divishon, kada un segun su sirbishi, tantu e saserdotenan komo e levitanan, pa ofrendanan kimá i pa ofrendanan di pas, pa sirbi, pa duna gradisimentu i pa alabá den e entradanan di e kampamentu di SEÑOR.
31:3
Tambe el a stipulá rei su porshon for di su propiedatnan pa e ofrendanan kimá, esta, pa e ofrendanan kimá di mainta i atardi, i e ofrendanan kimá pa e dianan di sabat, pa e dianan di luna nobo i pa e fiestanan stipulá, manera ta pará skirbí den e lei di SEÑOR.
31:4
Tambe el a ordená e pueblo ku tabata biba na Jerusalèm pa duna e porshon debí na e saserdotenan i e levitanan, pa nan dediká nan mes na e lei di SEÑOR.
31:5
I asina ku e òrdu a plama, e yunan di Israel a proveé na abundansia e promé frutanan di mainshi, biña nobo, zeta, miel i di tur loke kunuku ta produsí; i nan a trese na abundansia e diesmo di tur kos.
31:6
I e yunan di Israel i di Juda ku tabata biba den e statnan di Juda, tambe a trese e diesmo di buey i di karné i e diesmo di e regalonan santu ku tabata konsagrá na SEÑOR nan Dios, i a pone nan na monton.
31:7
Den e di tres luna nan a kuminsá traha e montonnan, i a keda kla den e di shete luna.
31:8
I ora ku Ezekias i e gobernantenan a bin i a mira e montonnan, nan a bendishoná SEÑOR i Su pueblo Israel.
31:9
E ora ei Ezekias a puntra e saserdotenan i e levitanan tokante di e montonnan.
31:10
I Azarias, sumosaserdote di e kas di Zadok, a bis'é: "Desde ku nan a kuminsá trese e kontribushonnan den e kas di SEÑOR, nos tabatin sufisiente di kome i nos a sobra hopi, pasobra SEÑOR a bendishoná Su pueblo; i e kantidat grandi aki a sobra."
31:11
Anto Ezekias a ordená nan pa prepará kambernan den e kas di SEÑOR, i nan a prepará nan.
31:12
I fielmente nan tabata trese e kontribushonnan, e diesmonan i e kosnan konsagrá; i e levita Konanias tabata e ofisial ku tabatin enkargo di nan, i su ruman hòmber Simei tabata e di dos.
31:13
I Jehiel, Azazias, Nahat, Asael, Jerimot, Jozabad, Eliel, Ismakias, Mahat i Bènaia tabata mayordomo bou di outoridat di Konanias i su ruman hòmber Simei, nombrá pa rei Ezekias, i Azarias tabata e ofisial prinsipal di e kas di Dios.
31:14
I Koré, yu hòmber di e levita Imna, wardadó-di-porta na e entrada di e porta pariba, tabatin enkargo di e ofrendanan boluntario pa Dios, pa parti e kontribushonnan pa SEÑOR i e kosnan di mas santu.
31:15
Edén, Miniamin, Jesúa, Semaias, Amarias i Sekanias, tabata yud'é fielmente den e statnan di e saserdotenan dor di distribuí porshonnan na nan rumannan, segun nan divishonnan, tantu na e bieunan komo na e hobennan.
31:16
Ademas, nan tabata distribuí porshonnan na e hòmbernan di trinta aña p'ariba, kende nan nòmbernan tabata den e registronan genealógiko-- tur ku tabata drenta e kas di SEÑOR pa kumpli ku nan varios obligashonnan di tur dia, segun nan responsabilidatnan i nan divishonnan.
31:17
I nan tabata distribuí porshonnan na e saserdotenan ku tabata inskribí segun e kas di nan tatanan den e registro genealógiko, i tambe na e levitanan for di binti aña p'ariba, segun nan responsabilidatnan i nan divishonnan.
31:18
I e registro genealógiko tabata inkluí tur nan yunan chikitu, nan esposanan, nan yu hòmbernan i nan yu muhénan, pa henter e asamblea, pasobra nan a konsagrá nan mes fielmente den santidat.
31:19
Tambe pa e yu hòmbernan di Aaron, e saserdotenan ku tabata den e lugánan di yerba bèrdè di nan statnan, òf den kualke stat, tabatin hòmbernan ku a wòrdu designá na nan nòmber, pa distribuí porshonnan na kada hòmber entre e saserdotenan i na kada un ku tabata registrá segun genealogia entre e levitanan.
31:20
I asina Ezekias a hasi den henter Juda; i el a hasi loke tabata bon, hustu, i bèrdat dilanti di SEÑOR su Dios.
31:21
I tur obra ku el a kuminsá den e sirbishi di e kas di Dios den e lei i e mandamentu, buskando su Dios, el a hasi ku henter su kurason; i asina el a prosperá.