2 Kronikonan 28
28:1
Akaz tabatin binti aña dia ku el a bira rei, i el a reina dieseis aña na Jerusalèm; i e no a hasi bon den bista di SEÑOR, manera su tata David a hasi.
28:2
Ma el a kana den e kamindanan di e reinan di Israel; tambe el a traha imagennan bashá pa e Baalnan.
28:3
Ademas, el a kima sensia den e vaye di Bèn-hinom, i a kima su yu hòmbernan den kandela, konforme e abominashonnan di e nashonnan ku SEÑOR a kore kuné for di dilanti di e yunan di Israel.
28:4
I el a ofresé sakrifisio i a kima sensia riba e lugánan haltu, riba e serunan, i bou di tur palu bèrdè.
28:5
Pesei, SEÑOR su Dios a entregu'é den man di rei di Siria; i nan a derot'é i a hiba for di djé un gran kantidat di katibu, i a hiba nan Damasko. I tambe el a wòrdu entregá den man di rei di Israel, kende a derot'é ku un matansa grandi.
28:6
Pasobra den un solo dia Peka, yu hòmber di Remalias, a mata shent'i binti mil na Juda, tur hòmbernan balente, pasobra nan a bandoná e SEÑOR Dios di nan tatanan.
28:7
I Zikri, un hòmber poderoso di Efrain, a mata Maaseias, yu hòmber di rei, i Azrikam, e mayordomo di e kas, i Elkana, e di dos despues di rei.
28:8
I e yunan di Israel a hiba komo katibu for di nan rumannan: dos shen mil muhé, yu hòmbernan i yu muhénan; tambe nan a kohe un kantidat grandi di botín for di nan, i a hiba e botín na Samaria.
28:9
Ma ayanan tabatin un profeta di SEÑOR ku tabata yama Oded; i el a sali pa bai kontra ku e ehérsito ku tabata yega Samaria i a bisa nan: "Mira, pasobra SEÑOR, e Dios di boso tatanan, tabata rabiá ku Juda, El a entregá nan den boso man, i boso a mata nan den un rabia ku a yega te na shelu.
28:10
I awor boso tin intenshon di someté e hendenan di Juda i Jerusalèm komo esklabu hòmber i muhé. Di bèrdat, boso mes no tin kulpa dilanti di SEÑOR boso Dios?
28:11
Pesei anto, skuchami i debolbé e katibunan ku boso a kapturá for di boso rumannan, pasobra e rabia ardiente di SEÑOR ta kontra boso."
28:12
E ora ei algun di e kabesantenan di e yunan di Efrain--Azarias, yu hòmber di Johanan, Berekias, yu hòmber di Mesilemot, Jehizkias, yu hòmber di Salum, i Amasa, yu hòmber di Hadlai--a lanta kontra esnan ku tabata bin for di bataya,
28:13
i a bisa nan: "Boso no mester trese e katibunan akinan, pasobra boso propósito ta pa trese kulpa riba nos kontra SEÑOR, dor di oumentá nos pikánan i nos kulpa; pasobra nos kulpa ta grandi, asina ku Su rabia ardiente ta kontra Israel."
28:14
Asina e hòmbernan armá a laga e katibunan i e botín dilanti di e ofisialnan i henter e asamblea.
28:15
E ora ei e hòmbernan ku tabata apuntá na nan nòmber a lanta, a kohe e katibunan, i for di e botín nan a bisti tur esnan ku tabata sunú; i nan a duna nan paña i sandalia, a duna nan di kome i di bebe, a ungi nan ku zeta, a pone tur di nan ku tabata debil riba buriku, i a hiba nan Jeriko, e stat di palma, serka nan rumannan; despues nan a bolbe Samaria.
28:16
Na e tempu ei rei Akaz a manda buska yudansa serka e reinan di Asiria.
28:17
Pasobra atrobe e edomitanan a bin ataká Juda, i a hiba katibunan.
28:18
E filisteonan tambe a invadí e statnan di e vayenan i di Negèv di Juda, i a kohe Bèt-semes, Ajalon, Gederot, i Soko ku su pueblitonan, Timna ku su pueblitonan i Gimzo ku su pueblitonan; i nan a keda biba ayanan.
28:19
Pasobra SEÑOR a umiyá Juda pa motibu di Akaz, rei di Israel, pasobra el a promové maldat den Juda i tabata masha infiel na SEÑOR.
28:20
Asina Tiglat-pileser, rei di Asiria, a bin kontra djé i a afligié, enbes di fortales'é.
28:21
I Akaz a tuma un porshon for di e kas di SEÑOR i for di e palasio di rei i di e prensnan, i a duna esaki na rei di Asiria; ma esaki no a yud'é.
28:22
Awor den e tempu di su angustia e mesun rei Akaz aki a bira mas infiel ainda na SEÑOR.
28:23
Pasobra el a ofresé sakrifisio na e diosnan di Damasko ku a derot'é, i a bisa: "Pasobra e diosnan di e reinan di Siria a yuda nan, lo mi ofresé sakrifisio na nan, pa nan yudami." Ma nan a bira su ruina i ruina pa henter Israel.
28:24
Ademas, ora ku Akaz a rekohé e artíkulonan-di-uzo di e kas di Dios, el a kòrta e artíkulonan-di-uzo di e kas di Dios na pida-pida; i el a sera e portanan di e kas di SEÑOR, i a traha altarnan pa su mes den tur skina di Jerusalèm.
28:25
I den tur stat di Juda el a traha lugánan haltu pa kima sensia na otro diosnan, i a proboká SEÑOR, e Dios di su tatanan, na rabia.
28:26
Awor e restu di su echonan i tur su kamindanan, for di promé te delaster, mira, nan ta pará skirbí den e Buki di reinan di Juda i Israel.
28:27
Asina Akaz a bai sosegá serka su tatanan, i nan a der'é den stat, den Jerusalèm, pasobra nan no a hib'é den e tumbanan di e reinan di Israel; i su yu hòmber Ezekias a reina na su lugá.