2 Kronikonan 16
16:1
Den e di trint'i seis aña di Asa su reinado, Baasa, rei di Israel, a lanta kontra Juda i a fortifiká Rama, pa no laga ningun hende sali ni drenta serka Asa, rei di Juda.
16:2
E ora ei Asa a saka plata i oro for di e lugánan-di-warda-tesoro di e kas di SEÑOR i e kas di rei i a manda nan pa Bèn-adad, rei di Siria, kende tabata biba na Damasko, bisando:
16:3
"Laga tin un aliansa entre abo i ami, manera tin entre mi tata i bo tata. Mira, mi a manda plata i oro pa bo; bai, kibra bo aliansa ku Baasa, rei di Israel, pa e retirá for di mi."
16:4
Asina Bèn-adad a skucha rei Asa i a manda e komandantenan di su ehérsitonan kontra e statnan di Israel, i nan a konkistá Ijon, Dan, Abel-maim i tur e statnan di depósito di Nèftalí.
16:5
I a sosodé ku ora Baasa a tende di esaki, el a stòp di fortifiká Rama i a para su trabou.
16:6
Anto rei Asa a trese henter Juda, i nan a kohe e piedranan di Rama i su palunan ku kualnan Baasa tabata trahando, bai kuné; i ku esakinan el a fortifiká Geba i Mizpa.
16:7
Na e tempu ei Hanani e miradó a bin serka Asa, rei di Juda, i a bis'é: "Pasobra bo a dependé riba rei di Siria i bo no a dependé riba SEÑOR bo Dios, pesei e ehérsito di rei di Siria a skapa for di bo man.
16:8
No t'asina ku e etiopenan i e libionan tabata un ehérsito inmenso ku masha hopi garoshi i koredó di kabai? Sinembargo, pasobra bo a konfia den SEÑOR, El a entregá nan den bo man.
16:9
Pasobra wowo di SEÑOR ta move bai bin dor di henter tera, pa E por sostené fuertemente esnan ku nan kurason ta kompletamente di djE. Bo a aktua ku bobedat den esaki. Di bèrdat, for di awor padilanti siguramente lo bo tin guera."
16:10
E ora ei Asa a rabia ku e miradó i a ser'é den prizon, pasobra e tabata furioso riba djé pa e motibu aki. I Asa a oprimí algun hende di e pueblo na e mesun tempu.
16:11
I awor, e echonan di Asa, for di promé te delaster, ata, nan ta pará skirbí den e Buki di reinan di Juda i Israel.
16:12
I den e di trint'i nuebe aña di su reinado, Asa a bira malu na su pianan. Su malesa tabata masha grave mes, ma asta den su malesa e no a buska SEÑOR, sino dòkternan.
16:13
Asina Asa a bai sosegá serka su tatanan i el a muri den e di kuarent'i un aña di su reinado.
16:14
I nan a der'é den su mes tumba ku el a laga kap pa su mes den e stat di David, i nan a pon'é den e lugá di sosiegu ku el a yena ku diferente sorto di speserei, mesklá segun e arte di e trahadónan di perfume; i nan a sende un kandela masha grandi p'é.