1 Samuel 30
30:1
Awor a sosodé ku ora David ku su hòmbernan a yega Ziklag riba e di tres dia, nan a haña ku e amalekitanan a invadí Negèv i Ziklag, i a derotá Ziklag i a kim'é ku kandela;
30:2
i nan a kapturá e muhénan i tur hende ku tabata den e stat, tantu chikitu komo grandi, sin mata ni un, i a bai ku nan, i a sigui nan kaminda.
30:3
I ora David ku su hòmbernan a yega na e stat, mira, nan a haña esaki kimá ku kandela, i ku nan esposanan i nan yu hòmbernan i nan yu muhénan a wòrdu kohí komo katibu.
30:4
E ora ei David i e hendenan ku tabata huntu kuné a halsa nan bos i a yora te ora nan no tabatin forsa mas pa yora.
30:5
Awor David su dos esposanan tambe a wòrdu kapturá: Ahinoam e jezreelita, i Abigail, biuda di Nabal e karmelita.
30:6
Ademas, David tabatin un angustia grandi, pasobra e pueblo tabata bisa ku nan kier a piedr'é, pasobra henter e pueblo tabata amargá, kada un pa motibu di su yu hòmbernan i su yu muhénan. Ma David a fortalesé su mes den SEÑOR su Dios.
30:7
E ora ei David a bisa saserdote Abiatar, yu hòmber di Ahimelek: "Pa fabor, trese e efòd pa mi." Asina Abiatar a trese e efòd pa David.
30:8
I David a konsultá ku SEÑOR, bisando: "Mi mester pèrsiguí e trupa aki? Lo mi alkansá nan?" I SEÑOR a bis'é: "Pèrsiguí nan, pasobra siguramente lo bo alkansá nan i siguramente lo bo reskatá tur."
30:9
Asina David a bai, é ku e seis shen hòmbernan ku tabata huntu kuné, i a yega na Roi Besor, kaminda esnan ku a ked'atras tabata.
30:10
Ma David a sigui pèrsiguí, é ku kuater shen hòmber, pasobra dos shen ku tabata muchu kansá pa krusa Roi Besor a ked'atras.
30:11
Awor nan a haña un egipsio den kunuku i a tres'é serka David; i nan a dun'é pan i el a kome, i nan a dun'é awa pa bebe.
30:12
I nan a dun'é un pida di un klòmpi di figo i dos tròshi di rasenchi, i el a kome; e ora ei su spiritu a rebibá. Pasobra pa tres dia i tres anochi e no a kome pan ni bebe awa.
30:13
I David a bis'é: "Na ken bo ta pertenesé? I di unda bo ta?" I el a bisa: "Mi ta un hoben di Egipto, un sirbidó di un amalekita; i mi shon a lagami atras tres dia pasá, ora mi a bira malu.
30:14
Nos a invadí Negèv di e kereteonan i loke ta pertenesé na Juda i Negèv di Kalèb, i nos a kima Ziklag ku kandela."
30:15
E ora ei David a bis'é: "Bo por hibami serka e trupa aki?" I el a bisa: "Hurami pa Dios ku lo bo no matami ni entregámi den man di mi shon, i lo mi hibabo serka e trupa aki."
30:16
I ora ku el a hiba David ayanan, mira, nan tabata plamá ofer di henter e teritorio ta kome, bebe i balia, pa motibu di henter e gran botín ku nan a kohe for di e tera di e filisteonan i for di e tera di Juda.
30:17
I David a mata nan for di ora solo a baha te na e anochi di e siguiente dia; i ni un hende di nan no a skapa, ku eksepshon di kuater shen hoben ku a hui riba kamel.
30:18
Asina David a rekobrá tur loke e amalekitanan a kohe, i a reskatá su dos esposanan.
30:19
Ma nan no a pèrdè nada di loke tabata di nan, ni chikitu ni grandi, ni yu hòmber ni yu muhé, ni botín, ni nada di loke e amalekitanan a kohe pa nan mes; David a trese tur bèk.
30:20
Asina David a kapturá tur e karnénan i e bakanan ku e pueblo a hunta manda dilanti di e otro bestianan di kria, i nan a bisa: "Esaki ta David su botín."
30:21
E ora ei David a yega serka e dos shen hòmbernan ku tabata muchu kansá pa sigui David i ku a wòrdu lagá atras na Roi Besor; i nan a sali pa kontra ku David i pa kontra ku e pueblo ku tabata huntu kuné. I David a aserká e pueblo i a saludá nan.
30:22
E ora ei tur e hòmbernan malbado i pèrvèrso ku tabatin entre esnan ku a bai ku David a kontestá i a bisa: "Komo ku nan no a bai ku nos, nos no ta duna nan nada di e botín ku nos a rekobrá, sino na kada hòmber su esposa i su yunan, pa nan kohe nan bai ku nan."
30:23
E ora ei David a bisa: "Mi rumannan, boso no mester hasi asina ku loke SEÑOR a duna nos; El a warda nos i a entregá den nos man e trupa ku a bin kontra nos.
30:24
I ken lo skucha boso den e asunto aki? Pasobra manera e parti di esun ku ta bai bataya ta, asina e parti di esun ku ta keda ku e ekipahe mester ta; nan parti lo ta igual."
30:25
I desde e dia ei a keda asina, ku David a hasi esaki un statuto i un ordenansa pa Israel te dia djawe.
30:26
Awor ora David a yega Ziklag, el a manda parti di e botín pa e ansianonan di Juda, pa su amigunan, bisando: "Ata un regalo pa boso for di e botín di e enemigunan di SEÑOR."
30:27
Esaki el a manda pa esnan ku tabata na Bèt-èl, pa esnan ku tabata na Ramot di Negèv, pa esnan ku tabata na Jatir;
30:28
pa esnan ku tabata na Aroer, pa esnan ku tabata na Sifmot, pa esnan ku tabata na Estemoa;
30:29
pa esnan ku tabata na Rakal, pa esnan ku tabata den e statnan di e jerameelitanan, pa esnan ku tabata den e statnan di e keneonan;
30:30
pa esnan ku tabata na Horma, pa esnan ku tabata na Korasan, pa esnan ku tabata na Atak;
30:31
pa esnan ku tabata na Hebròn i pa tur e lugánan kaminda David mes i su hòmbernan tabatin kustumber di bai.