1 Reinan 3
3:1
Anto Salomon a sera un aliansa di matrimonio ku Farao, rei di Egipto, i a tuma Farao su yu muhé i a hib'é na e stat di David, te dia ku el a kaba di traha su mes kas i e kas di SEÑOR i e muraya rònt di Jerusalèm.
3:2
Ainda e pueblo tabata ofresé sakrifisio riba e lugánan haltu, pasobra te na e dianan ei no tabatin un kas trahá pa e nòmber di SEÑOR.
3:3
Awor Salomon tabata stima SEÑOR, i tabata kana den e statutonan di su tata David; solamente e tabata ofresé sakrifisio i kima sensia riba e lugánan haltu.
3:4
I rei a bai Gabaon pa ofresé sakrifisio ayanan, pasobra esei tabata e lugá haltu prinsipal; Salomon a ofresé mil ofrenda kimá riba e altar ei.
3:5
Na Gabaon SEÑOR a paresé na Salomon anochi den un soño, i Dios a bisa: "Pidi loke bo kier pa Mi dunabo."
3:6
E ora ei Salomon a bisa: "Bo a mustra gran miserikòrdia na Bo sirbidó, mi tata David, segun ku e tabata kana Bo dilanti den bèrdat, hustisia i rektitut di kurason pa ku Bo; i Bo a reservá p'é e gran miserikòrdia aki, ku Bo a dun'é un yu hòmber pa sinta riba su trono, manera ta e kaso awe.
3:7
"I awor, O SEÑOR mi Dios, Bo a hasi Bo sirbidó rei na lugá di mi tata David, ounke ku mi ta un mucha chikitu; mi no sa kon pa sali ni kon pa drenta.
3:8
I Bo sirbidó ta meimei di Bo pueblo ku Bo a skohe, un pueblo grandi ku no por wòrdu numerá ni kontá pa motibu ku nan ta asina hopi.
3:9
Asina, duna Bo sirbidó un kurason di komprendementu pa huzga Bo pueblo, pa diserní entre bon i malu. Pasobra ken ta kapas pa huzga e pueblo grandi aki di Bo?"
3:10
I tabata agradabel den bista di SEÑOR ku Salomon a pidi esaki.
3:11
I Dios a bis'é: "Pasobra bo a pidi esaki i no a pidi bida largu pa bo mes, ni a pidi rikesa pa bo mes, ni bo no a pidi bida di bo enemigunan, ma a pidi pa bo mes disernimentu pa komprendé hustisia,
3:12
mira, Mi a hasi konforme bo palabranan. Ata, Mi a dunabo un kurason sabí i ku disernimentu, asina ku promé ku bo no tabatin ni ún manera bo, ni despues di bo lo no lanta otro manera bo.
3:13
I tambe Mi a dunabo loke bo no a pidi, tantu rikesa komo onor, asina ku entre e reinan lo no tin ni ún manera bo den tur bo dianan.
3:14
I si bo kana den Mi kamindanan i warda Mi statutonan i mandamentunan, manera bo tata David a kana, e ora ei lo Mi prolongá bo dianan."
3:15
E ora ei Salomon a spièrta, i mira, tabata un soño. I el a bin Jerusalèm i a bai para dilanti di e arka di e aliansa di SEÑOR i a ofresé ofrendanan kimá i a hasi ofrendanan di pas, i a hasi un fiesta pa tur su sirbidónan.
3:16
E ora ei dos muhé prostituta a bin serka rei i a bai para su dilanti.
3:17
I esun muhé a bisa: "O mi señor, e muhé aki i ami ta biba den e mesun kas; i mi a duna lus mientras ku e tabata na kas.
3:18
I a sosodé ku riba e di tres dia despues ku mi a duna lus, e muhé aki tambe a duna lus, i nos tabata huntu. No tabatin ningun hende straño huntu ku nos den kas; ta nos dos so tabata den kas.
3:19
"I e muhé aki su yu hòmber a muri den anochi, pasobra el a drumi riba djé.
3:20
Asina el a lanta mei anochi i a kohe mi yu hòmber for di banda di mi, mientras ku bo sirbiente tabata na soño, i a pon'é den su brasa, i a pone su yu hòmber morto den mi brasa.
3:21
I ora mi a lanta mainta pa duna mi yu pechu, ata, e tabata morto; ma mainta, ora mi a wak e bon, ata, no tabata mi yu ku mi a haña."
3:22
E ora ei e otro muhé a bisa: "Nò! Esun bibu ta mi yu i esun morto ta bo yu." Ma e promé muhé a bisa: "Nò! Esun morto ta bo yu i esun bibu ta mi yu." Asina nan tabata papia dilanti di rei.
3:23
E ora ei rei a bisa: "Esun ta bisa: 'Esun bibu ta mi yu i esun morto ta bo yu'; i e otro ta bisa: 'Nò! Esun morto ta bo yu i esun bibu ta mi yu.'"
3:24
I rei a bisa: "Trese un spada pa mi." Asina nan a trese un spada dilanti di rei.
3:25
I rei a bisa: "Parti e mucha bibu na dos, i duna mitar na esun i mitar na e otro."
3:26
E ora ei e muhé, kende su yu tabata esun bibu, a papia ku rei, pasobra e tabata profundamente konmoví pa su yu; i el a bisa: "O mi señor, dun'é e yu bibu i no mat'é di ningun manera." Ma e otro a bisa: "E lo no ta ni di mi ni di bo; partié na dos!"
3:27
E ora ei rei a kontestá i a bisa: "Duna e promé muhé e yu bibu i no mat'é di ningun manera. Ta é ta su mama."
3:28
Ora henter Israel a tende di e huisio ku rei a duna, nan a haña temor pa rei, pasobra nan a mira ku e sabiduria di Dios tabata den djé pa atministrá hustisia.