1 Reinan 16
16:1
Awor e palabra di SEÑOR a yega na Jehú, yu hòmber di Hanani, kontra Baasa, bisando:
16:2
"Pasobra Mi a halsabo for di den stòf i a hasibo lider di Mi pueblo Israel, i bo a kana den e kaminda di Jeroboam i a hasi Mi pueblo Israel peka, probokando Mi na rabia ku nan pikánan,
16:3
mira, lo Mi kaba ku Baasa i ku su kas, i lo Mi hasi bo kas manera e kas di Jeroboam, yu hòmber di Nabat.
16:4
Esun di Baasa ku muri den stat, kachó lo kome. I esun di djé ku muri den kunuku, parha di shelu lo kome."
16:5
Awor e demas echonan di Baasa, loke ku el a hasi i su poder, nan no ta pará skirbí den e Buki di Krónikanan di e reinan di Israel?
16:6
I Baasa a bai sosegá serka su tatanan i a wòrdu derá na Tirsa; i su yu hòmber Ela a bira rei na su lugá.
16:7
Ademas, e palabra di SEÑOR pa medio di profeta Jehú, yu hòmber di Hanani, tambe a yega kontra Baasa i su kas, pa motibu di tur e maldat ku el a hasi den bista di SEÑOR, probokando E na rabia ku e obra di su mannan, dor di ta manera e kas di Jeroboam, i pasobra el a destruí esaki.
16:8
Den e di bint'i seis aña di Asa, rei di Juda, Ela, yu hòmber di Baasa, a bira rei di Israel na Tirsa, i a reina dos aña.
16:9
I su sirbidó Zimri, komandante di mitar di su garoshinan, a konspirá kontra djé. Awor Ela tabata na Tirsa ta bebe burachi na e kas di Arsa, kende tabata mayordomo di e kas di Tirsa.
16:10
E ora ei Zimri a drenta paden i a dal é mata, den e di bint'i shete aña di Asa, rei di Juda, i a bira rei na su lugá.
16:11
I a sosodé ku ora el a bira rei, asina ku el a sinta riba su trono, el a mata tur e hendenan di e kas di Baasa; e no a laga ni ún hende hòmber, ni di su famianan ni di su amigunan.
16:12
Asina Zimri a destruí tur e hendenan di e kas di Baasa, konforme e palabra di SEÑOR ku El a papia kontra Baasa pa medio di profeta Jehú,
16:13
pa motibu di tur e pikánan di Baasa i e pikánan di su yu hòmber Ela, ku nan a kometé i ku nan a hasi Israel kometé, probokando e SEÑOR Dios di Israel na rabia ku nan ídolonan.
16:14
Awor e demas echonan di Ela i tur loke ku el a hasi, nan no ta pará skirbí den e Buki di Krónikanan di e reinan di Israel?
16:15
Den e di bint'i shete aña di Asa, rei di Juda, Zimri a reina shete dia na Tirsa. Awor e pueblo tabata kampa kontra Gibeton, ku tabata pertenesé na e filisteonan.
16:16
I e pueblo ku tabata kampa a tende nan bisa: "Zimri a konspirá i tambe a mata rei." Pesei henter Israel a hasi Omri, komandante di e ehérsito, rei di Israel riba e dia ei den e kampamentu.
16:17
E ora ei Omri i henter Israel huntu kuné a bai for di Gibeton, i nan a rondoná Tirsa.
16:18
I a sosodé ku ora Zimri a mira ku nan a kohe e stat, el a bai den e sitadel di rei su kas i a kima rei su kas ku kandela ku su mes aden, i a muri,
16:19
pa motibu di su pikánan ku el a kometé, hasiendo malu den bista di SEÑOR, kanando den e kaminda di Jeroboam, i den su piká ku el a kometé, dor di hasi Israel peka.
16:20
Awor e demas echonan di Zimri i e kòmplòt ku el a traha, nan no ta pará skirbí den e Buki di Krónikanan di e reinan di Israel?
16:21
E ora ei e pueblo di Israel a keda dividí den dos parti: mitar di e pueblo a sigui Tibni, yu hòmber di Ginat, pa hasié rei; e otro mitar a sigui Omri.
16:22
Ma e pueblo ku a sigui Omri tabatin viktoria riba e pueblo ku a sigui Tibni, yu hòmber di Ginat. I Tibni a muri i Omri a bira rei.
16:23
Den e di trint'i un aña di Asa, rei di Juda, Omri a bira rei di Israel i a reina diesdos aña; el a reina seis aña na Tirsa.
16:24
I el a kumpra Seru Samaria serka Semer pa dos talento di plata; i el a konstruí riba e seru, i a yama e stat ku el a konstruí, Samaria, na nòmber di Semer, doño di e seru.
16:25
I Omri a hasi malu den bista di SEÑOR, i a hasi mas maldat ku tur esnan ku tabata promé kuné.
16:26
Pasobra el a kana den henter e kaminda di Jeroboam, yu hòmber di Nabat, i den su pikánan ku el a hasi Israel kometé, probokando SEÑOR Dios di Israel ku nan ídolonan.
16:27
Awor e demas echonan di Omri ku el a hasi i su poder ku el a demostrá, nan no ta pará skirbí den e Buki di Krónikanan di e reinan di Israel?
16:28
Asina Omri a bai sosegá serka su tatanan i a wòrdu derá na Samaria; i su yu hòmber Akab a bira rei na su lugá.
16:29
Awor Akab, yu hòmber di Omri, a bira rei di Israel den e di trint'i ocho aña di Asa, rei di Juda; i Akab, yu hòmber di Omri, a reina bint'i dos aña riba Israel na Samaria.
16:30
I Akab, yu hòmber di Omri, a hasi malu den bista di SEÑOR, mas ku tur esnan ku tabata promé kuné.
16:31
I a sosodé ku no solamente el a konsiderá komo algu gewon pa kana den e pikánan di Jeroboam, yu hòmber di Nabat, ma pa kolmo el a kasa ku Jezabel, yu muhé di Et-baal, rei di e sidonionan, i a bai sirbi Baal i a ador'é.
16:32
Asina el a lanta un altar pa Baal den e kas di Baal, ku el a traha na Samaria.
16:33
I tambe Akab a traha e imagen di Asera. Asina Akab a hasi mas pa proboká e SEÑOR Dios di Israel ku tur e reinan di Israel ku tabata promé kuné.
16:34
Den Akab su dianan Hièl di Bèt-èl a traha Jeriko; el a pone su fundeshinan a kosto di pérdida di su primogénito Abiram, i a pone su portanan a kosto di pérdida di su yu hòmber mas chikitu Segub, konforme e palabra di SEÑOR ku El a papia pa medio di Josué, yu hòmber di Nun.