1 Reinan 15
15:1
Awor den e di diesocho aña di rei Jeroboam, yu hòmber di Nabat, Abiam a bira rei di Juda.
15:2
El a reina tres aña na Jerusalèm; i nòmber di su mama tabata Maaka, yu muhé di Abisalom.
15:3
I el a kana den tur e pikánan di su tata, ku el a kometé promé kuné; i su kurason no tabata kompletamente dediká na SEÑOR su Dios, manera kurason di su tata David.
15:4
Ma pa motibu di David SEÑOR su Dios a dun'é un lampi na Jerusalèm, pa lanta su yu hòmber despues di djé i pa stablesé Jerusalèm;
15:5
pasobra David a hasi loke tabata korekto den bista di SEÑOR, i no a apartá su mes for di nada ku El a orden'é hasi tur e dianan di su bida, ku eksepshon di e kaso di Urias e heteo.
15:6
I tabatin guera entre Roboam i Jeroboam tur e dianan di su bida.
15:7
Awor e demas echonan di Abiam i tur loke ku el a hasi, nan no ta pará skirbí den e Buki di Krónikanan di e reinan di Juda? I tabatin guera entre Abiam i Jeroboam.
15:8
I Abiam a bai sosegá serka su tatanan i nan a der'é den e stat di David; i su yu hòmber Asa a bira rei na su lugá.
15:9
Asina ta ku den e di binti aña di Jeroboam, rei di Israel, Asa a kuminsá reina komo rei di Juda.
15:10
I el a reina kuarent'i un aña na Jerusalèm; i nòmber di su mama tabata Maaka, yu muhé di Abisalom.
15:11
I Asa a hasi loke tabata korekto den bista di SEÑOR, manera su tata David.
15:12
Tambe el a saka e sodomitanan for di e tera, i a kita tur e ídolonan ku su tatanan a traha.
15:13
I tambe el a kita su mama Maaka for di e puesto di reina mama, pasobra su mama a traha un imagen horibel di Asera; i Asa a kap e imagen horibel bash'abou i a kim'é na Roi Kedron.
15:14
Ma e lugánan haltu no a wòrdu kitá; sinembargo, kurason di Asa tabata kompletamente dediká na SEÑOR henter su bida.
15:15
I el a trese den e kas di SEÑOR e kosnan ku su tata a dediká i e kosnan ku e mes a dediká: plata, oro i artíkulonan-di-uzo.
15:16
Awor tabatin guera entre Asa i Baasa, rei di Israel, henter nan bida.
15:17
I Baasa, rei di Israel, a lanta kontra Juda i a fortifiká Rama, pa no laga ningun hende sali ni drenta serka Asa, rei di Juda.
15:18
E ora ei Asa a kohe tur e plata i e oro ku a keda den a lugánan-di-warda-tesoro di e kas di SEÑOR i e lugánan-di-warda-tesoro di rei su kas, i a entregá nan den man di su sirbidónan. I rei Asa a manda nan serka Bèn-adad, yu hòmber di Tabrimon, yu hòmber di Hezion, rei di Siria, kende tabata biba na Damasko, bisando:
15:19
"Laga tin un aliansa entre abo i ami, manera tabatin entre mi tata i bo tata. Mira, mi a manda un regalo di plata i oro pa bo; bai, kibra bo aliansa ku Baasa, rei di Israel, pa e retirá for di mi."
15:20
Asina Bèn-adad a skucha rei Asa i a manda e komandantenan di su ehérsitonan kontra e statnan di Israel, i a konkistá Ijon, Dan, Abel-bèt-maaka i henter Kineret, ademas di henter e tera di Nèftalí.
15:21
I a sosodé ku ora Baasa a tende di esaki, el a stòp di fortifiká Rama i a keda na Tirsa.
15:22
Anto rei Asa a hasi un proklamashon na henter Juda, sin eksepshon di ningun hende; i nan a kohe e piedranan i e palunan di Rama, ku Baasa a uza pa konstruí, bai kuné. I ku esakinan rei Asa a traha Geba di Benjamin i Mizpa.
15:23
Awor e demas echonan di Asa, tur su poder, tur loke ku el a hasi, i e statnan ku el a traha, nan no ta pará skirbí den e Buki di Krónikanan di e reinan di Juda? Ma den e dianan di su biehes el a bira malu na su pianan.
15:24
I Asa a bai sosegá serka su tatanan i a wòrdu derá serka su tatanan den e stat di su tata David; i su yu hòmber Josafat a reina na su lugá.
15:25
Awor Nadab, yu hòmber di Jeroboam, a bira rei di Israel den e di dos aña di Asa, rei di Juda, i el a reina dos aña riba Israel.
15:26
I el a hasi malu den bista di SEÑOR, i a kana den e kaminda di su tata i den su piká ku el a hasi Israel kometé.
15:27
E ora ei Baasa, yu hòmber di Ahias, di e kas di Isakar, a konspirá kontra djé; i Baasa a dal é mata na Gibeton, ku tabata pertenesé na e filisteonan, mientras ku Nadab i henter Israel tabata rondoná Gibeton.
15:28
Asina Baasa a mat'é den e di tres aña di Asa, rei di Juda, i a reina na su lugá.
15:29
I a sosodé ku asina el a bira rei, el a mata henter e kas di Jeroboam. E no a laga ni un hende di Jeroboam na bida, te ora ku el a destruí nan, konforme e palabra di SEÑOR ku El a papia pa medio di Su sirbidó, Ahias e silonita,
15:30
i pa motibu di e pikánan di Jeroboam ku el a kometé i ku el a hasi Israel kometé, pa motibu di su probokashon ku kual el a proboká e SEÑOR Dios di Israel na rabia.
15:31
Awor e demas echonan di Nadab i tur loke ku el a hasi, nan no ta pará skirbí den e Buki di Krónikanan di e reinan di Israel?
15:32
I tabatin guera entre Asa i Baasa, rei di Israel, henter nan bida.
15:33
Den e di tres aña di Asa, rei di Juda, Baasa, yu hòmber di Ahias, a bira rei di henter Israel na Tirsa i a reina bint'i kuater aña.
15:34
I el a hasi malu den bista di SEÑOR, i a kana den e kaminda di Jeroboam i den su piká ku el a hasi Israel kometé.