1 Kronikonan 21
21:1
E ora ei Satanás a lanta kontra Israel i a instigá David pa konta Israel.
21:2
Asina David a bisa Joab i e prensnan di e pueblo: "Bai konta Israel for di Beerseba te na Dan, i trese informashon pa mi por sa kuantu nan ta."
21:3
I Joab a bisa: "Ku SEÑOR añadí na Su pueblo shen biaha mas tantu di loke nan ta! Ma señor mi rei, nan tur no ta sirbidó di mi señor? Pakiko mi señor ta buska e kos aki? Pakiko e mester ta un kousa di kulpa pa Israel?"
21:4
Sinembargo, rei su palabra a prevalesé kontra Joab. Pesei Joab a sali bai, a bai dor di henter Israel i a bolbe Jerusalèm.
21:5
I Joab a duna David e total di e senso di henter e pueblo. I na henter Israel tabatin un miyon shen mil hòmber ku tabata saka spada. I na Juda tabatin kuater shent'i setenta mil hòmber ku tabata saka spada.
21:6
Ma e no a konta ni Leví ni Benjamin den nan, pasobra Joab tabata aboresé e òrdu di rei.
21:7
I Dios a keda malkontentu ku e kos aki, asina ku El a dal Israel.
21:8
I David a bisa Dios: "Mi a peka gravemente dor di hasi e kos aki. Ma awor, pa fabor, kita e inikidat di Bo sirbidó, pasobra mi a aktua masha bobo mes."
21:9
I SEÑOR a papia ku Gad, David su miradó, bisando:
21:10
"Bai papia ku David, bisando: 'Asina SEÑOR ta bisa: "Tres kos Mi ta ofresébo; abo skohe un di nan, pa Mi laga esei sosodé ku bo."'"
21:11
Asina Gad a bin serka David i a bis'é: "Asina SEÑOR ta bisa: 'Skohe pa bo mes
21:12
sea tres aña di hamber, òf tres luna di hui dilanti di bo enemigunan, mientras ku spada di bo enemigunan ta alkansábo, òf tres dia di spada di SEÑOR, esta, pestilensia den e tera, i e angel di SEÑOR tresiendo destrukshon den henter e teritorio di Israel.' Pesei anto, pensa bon ki kontesta mi mester hiba pa Esun ku a mandami."
21:13
I David a bisa Gad: "Mi ta den gran angustia; pa fabor, lagami kai den man di SEÑOR, pasobra Su miserikòrdianan ta masha grandi mes. Ma no lagami kai den man di hende."
21:14
Asina SEÑOR a manda un pestilensia riba Israel; i setenta mil hòmber di Israel a muri.
21:15
I Dios a manda un angel na Jerusalèm pa destruié; ma ora ku e tabata kla pa destruié, SEÑOR a mira, i e kalamidat a duel E, i El a bisa e angel destruidó: "Ta basta; baha bo man awor." I e angel di SEÑOR tabata pará banda di e plenchi-di-bati-mainshi di Ornan e jebuseo.
21:16
E ora ei David a hisa kara wak i a mira e angel di SEÑOR pará meimei di shelu i tera, ku su spada saká for di baliña den su man, ekstendí riba Jerusalèm. E ora ei David i e ansianonan, bistí na paña-di-saku, a tira nan kurpa abou ku nan kara te na suela.
21:17
I David a bisa Dios: "No ta ami a duna òrdu pa konta e pueblo? Di bèrdat, ta ami ta esun ku a peka i ku a hasi masha malu mes, ma e karnénan aki, ta kiko nan a hasi? O SEÑOR mi Dios, pa fabor, laga Bo man ta kontra mi i kontra e hendenan di e kas di mi tata, ma no kontra Bo pueblo, pa plaga no bin riba nan."
21:18
E ora ei e angel di SEÑOR a ordená Gad pa bisa David ku David mester bai traha un altar na SEÑOR riba e plenchi-di-bati-mainshi di Ornan e jebuseo.
21:19
Asina David a subi bai konforme e palabra di Gad, ku el a papia den e nòmber di SEÑOR.
21:20
Awor Ornan a bira i a mira e angel, i su kuater yu hòmbernan ku tabata huntu kuné a bai skonde. Anto Ornan tabata bati mainshi.
21:21
I ora David a bin serka Ornan, Ornan a hisa kara i a mira David; i el a sali for di e plenchi-di-bati-mainshi i a tira su kurpa abou ku su kara te na suela dilanti di David.
21:22
E ora ei David a bisa Ornan: "Dunami e lugá di e plenchi-di-bati-mainshi aki, pa mi traha un altar na SEÑOR riba djé. Dunamié pa su preis kompleto, pa e plaga wòrdu kitá for di e pueblo."
21:23
I Ornan a bisa David: "Tum'é pa bo, i laga señor mi rei hasi loke ta bon den su bista. Mira, lo mi duna e bueynan pa ofrendanan kimá, e hèrmèntnan-pa-bati-mainshi komo palu, i e mainshi pa e ofrenda di mainshi. Mi ta duna tur esaki."
21:24
Ma rei David a bisa Ornan: "Nò, ma siguramente mi kier kumpr'é pa e preis kompleto, pasobra mi no kier tuma pa SEÑOR loke ta di bo, ni ofresé un ofrenda kimá ku no ta kostami nada."
21:25
Asina David a duna Ornan e peso di seis shen siklo di oro pa e lugá.
21:26
E ora ei David a traha un altar na SEÑOR ayanan, i a ofresé ofrendanan kimá i ofrendanan di pas. I el a invoká SEÑOR; i El a kontest'é ku kandela for di shelu riba e altar di ofrenda kimá.
21:27
I SEÑOR a ordená e angel, i el a hinka su spada bèk den su baliña.
21:28
Na e momento ei, ora David a mira ku SEÑOR a kontest'é riba e plenchi-di-bati-mainshi di Ornan e jebuseo, el a ofresé sakrifisio ayanan.
21:29
Pasobra e tabernakel di SEÑOR, ku Moisés a traha den desierto, i e altar di ofrenda kimá tabata na e lugá haltu na Gabaon e tempu ei.
21:30
Ma David no por a bai dilanti di esaki pa konsultá ku Dios, pasobra e tabatin hopi temor pa e spada di e angel di SEÑOR.