Di Relashon pa Revelashon

Kerido Bonerianonan,

Pa e grasia di Dios, dor di su Yu Kristu Hesus, mi a wòrdu yama pa ta un mensahero for di e trono di Dios pa boso, habitantenan humilde di e isla aki, i yunan di e Dios Haltísimo.

----------

Boso tabata tin un tempu i mitar tempu di problema grandi riba e isla chikitu aki ku boso ta yama kas. Un ola grandi di malesa ku a kubri mundu henter a yega boso kostanan blanku, i a sakudí boso te den boso ser.

Ami a permití esaki pa kibra e manera nan di humanidat, e patronchi nan ku a hasi boso siegu pa Mi bondat i Mi grasia. E bida kómodo di mundu ku a pone boso lubidá ku ta Ami a krea boso, I ku ta Ami ta mantené boso kada sekònde di boso bida.

Tabata Mi speransa ku boso lo a buska Ami den e ora aki, pa puntra Ami ta dikon Mi a permití un kos asina ki pa sosodé. Dikon Ami lo a permití iglesianan pa sera nan porta, i pa interumpí e alabansa for di nan ku tabata subiendo dor di e shelunan.

Ta asina ku Mi man no ta sufisiente poderoso pa prevení un plaga? Ta asina ku Mi amor no ta sufisiente pa salba esnan ku ta malu?

Mi ta bisa boso, Mi man ta mes poderoso manera semper, i Mi amor mes un grandi manera e tabata for di kuminsamentu di tempu. E kosnan ku a bin riba boso ta pa hala boso atenshon, pa boso sa ta ki tempu peligroso boso ta den dje.

E fin a yega, i esaki ta final. Bo por skohe pa no kere esaki, pasobra no ta un bèrdat konfortabel. E no ta pas ku bo deseonan i boso plannan, pero esaki no ta kambia e bèrdat.

Bo por skohe pa alinia bo mes ku Mi tempu, òf, den bo bobedat, warda te ora ku Mi tempu alinia su mes ku abo.

Den mi mizerikòrdia mi a lanta un mensahero pa konta boso e kosnan aki pasobra Mi stima boso. Ayera, awe i pa semper.

Mi isla humilde, un isla di religion. Maske ku religion tabata tin su tempu, i ku e hendenan mortal ku a guia e iglesianan tabata tin nan tempu, e tempu ei a kaba. Pa para, i keda pará den e tempu ku ta bin, boso mester tin un relashon ku Mi.

E por zona difísil, pero e ta mas fásil ku e yugo ku religion a pone riba boso. E preis ta haltu, pero e karga ta lihé. Ora bo duna Ami bo kurason, Ami lo kita tur bo karganan.
I ora e tempu ku ta aserkando manifestá bo lo no ta sorprendí, ni bo lo no tin falta di nada, pasobra pa medio di Mi Spiritu bo lo a wòrdu prepará.

Skuridat ta bahando riba mundu. Maske ku Mi lo protehá boso kostanan pa un temporada mas, boso a konektá boso mes ku paisnan ku lo wòrdu husga un djis. I dor di e konekshon aki, Mi huisio lo toka boso tera.

Gran konsternashon i wòri lo kue tene esnan ku no ta warda den Mi. Meskos ku Noa a haña refugio den e arka, boso por haña refugio solamente den Mi. Mi Yu Kristu Hesus ta e arka, e E lo proveé tur kos ku bo mester.

No pensa ku esaki ta palabranan di un hende loko. Habri bo kurason pa Mi presensia, bin serka AMI i puntra AMI si esaki ta bèrdat. Bo no ta kere ku mi por kontesta bo i mustrabo e bèrdat?

Lo mi manda soñonan, vishonnan, señalnan i milagernan, Mi lo hasi tur kos ku Ami por hasi pa mustrabo ku Mi ta wardando ku man habri pa bo duna Mi henter bo kurason. E sobra ta na abo. Buska un Beibel, no pa prònk ku ne den kas, pero pa lesa mas di Mi karakter, pa asina bo por sera konosí ku bo Dios.

No falta muchu ku eventonan lo tuma lugá ku lo shòk henter mundu. Kosnan ku no por ni imaginá lo sakudí humanidat te den nan ser. Riba e dia ei, si bo no a bin seka Mi ainda, sa ku ainda Mi ta wardando ku man habri.

Sali for di religion i drenta un relashon ku Ami. Pa medio di e relashon aki lo mi revelá e misterionan di e “Revelashon di Hesus Kristu na mundu”, kual ta e tempu ku boso ta hañando boso mes den dje aktualmente.

E palabranan akí ta fiel i konfiabel.

Tende, Mi ta bini pronto.

Mi ta bini ku e rekompensa pa duna kada hende di akuerdo ku loke el a hasi.

Mi ta Alfa i Omega,
Esun Promé i Esun Delaster,
Orígen i Fin.