Search the Bible

Salmo 128; Salmo 129; Salmo 130 BSNP Edit

Salmonan 128

128:1 Bendishoná ta tur esnan ku ta teme SEÑOR, ku ta kana den Su kamindanan.

128:2 Ora bo kome di e trabou di bo mannan, lo bo ta felis i lo bai bo bon.

128:3 Bo esposa lo ta manera un mata di wendrùif fruktífero den e parti mas paden di bo kas; bo yunan lo ta manera palunan di oleifi rònt di bo mesa.

128:4 Mira, asina e hòmber ku ta teme SEÑOR lo wòrdu bendishoná.

128:5 Ku SEÑOR bendishonábo for di Sion, i lagabo mira e prosperidat di Jerusalèm tur e dianan di bo bida,

128:6 sí, lagabo mira e yunan di bo yunan. Pas sea riba Israel!

Salmonan 129

129:1 "For di mi hubentut nan a pèrsiguími hopi biaha," laga Israel bisa awor:

129:2 "For di mi hubentut nan a pèrsiguími hopi biaha, ma nan no a prevalesé kontra mi.

129:3 E plugdónan a plug riba mi lomba; nan a hasi nan hoyonan mas largu."

129:4 SEÑOR ta hustu; El a kòrta e kabuyanan di e malbadonan na dos.

129:5 Mara tur esnan ku ta odia Sion por a keda brongosá i derotá.

129:6 Laga nan ta manera yerba riba dak di kas, ku ta seka promé ku e krese,

129:7 ku kual e kosechadó no ta yena su man, ni e maradó di bohí no ta yena su brasa.

129:8 Tampoko no laga esnan ku ta pasa bisa: "Ku e bendishon di SEÑOR sea riba boso; nos ta bendishoná boso den e nòmber di SEÑOR."

Salmonan 130

130:1 For di e profundidatnan mi a sklama na Bo, O SEÑOR.

130:2 Señor, tende mi bos! Laga Bo orea ta atento na e bos di mi súplikanan.

130:3 Si Abo, SEÑOR, tuma inikidatnan na kuenta, O Señor, ken lo por a keda para?

130:4 Ma serka Bo tin pordon, pa Bo por wòrdu temí.

130:5 Mi ta spera riba SEÑOR, mi alma ta spera, i mi speransa ta den Su palabra.

130:6 Mi alma ta spera riba SEÑOR, mas ku e guardianan ta spera dia habri; sí, mas ku e guardianan ta spera dia habri.

130:7 O Israel, spera riba SEÑOR, pasobra serka SEÑOR tin miserikòrdia, i serka djE tin redenshon na abundansia.

130:8 I E lo redimí Israel for di tur su inikidatnan.