Search the Bible

Numbernan 11; Numbernan 12; Numbernan 13 BSNP Edit

Numbernan 11

11:1 Awor e pueblo a keha di e kosnan duru ku nan tabata pasa aden; i ora SEÑOR a tende esaki, Su rabia a sende, i e kandela di SEÑOR tabata kima meimei di nan i a kaba ku algun di e partinan na rant di e kampamentu.

11:2 Pesei e pueblo a sklama na Moisés, i Moisés a hasi orashon na SEÑOR, i e kandela a paga.

11:3 Asina nòmber di e lugá ei a wòrdu yamá Tabera, pasobra e kandela di SEÑOR tabata kima meimei di nan.

11:4 Awor e multitut di tur klase di hende ku tabata meimei di nan tabata yen di deseo golos; i tambe e yunan di Israel a bolbe yora i bisa: "Ken lo duna nos karni pa kome?

11:5 Nos ta kòrda e piská ku nos tabata kome pòrnada na Egipto, e kònkòmbernan, melonnan, i e prei, siboyo i konofló,

11:6 ma awor nos apetit a bai. Nos wowo no ta mira nada otro ku e mana aki so."

11:7 Awor e mana tabata manera simia di koriander i e tabata parse bedelio.

11:8 E hendenan tabata kana rònt pikié i mul'é entre dos piedra di mulina òf batié den pilon, i hereb'é den wea i traha pan buskuchi kuné; i e tabata smak manera pan buskuchi hòrná ku zeta.

11:9 I ora serena tabata kai anochi riba e kampamentu, e mana tabata kai huntu kuné.

11:10 Awor Moisés a tende hende ta yora den tur famia, kada hòmber na entrada di su tènt; i e rabia di SEÑOR a sende na gran manera, i Moisés a keda malkontentu.

11:11 Asina Moisés a bisa SEÑOR: "Pakiko Bo a trata asina duru ku Bo sirbidó? I pakiko mi no a haña grasia den Bo bista, ku Bo a pone e karga di henter e pueblo aki riba mi?

11:12 Ta ami a konsebí henter e pueblo aki? Ta ami a duna lus na nan, ku Bo mester a bisami: 'Karga nan den bo skochi, manera un yaya ta karga un yu ku ta na pechu ainda hiba na e tera ku Bo a hura na nan tatanan'?

11:13 Unda mi ta bai haña karni pa duna henter e pueblo aki? Pasobra nan ta yora mi dilanti, bisando: 'Duna nos karni pa nos kome!'

11:14 Ami so no por karga henter e pueblo aki, pasobra e karga ta muchu pisá pa mi.

11:15 Anto si t'asina Bo ta bai trata ku mi, pa fabor, matami mesora si mi a haña grasia den Bo bista, i no lagami mira mi miseria."

11:16 Pesei SEÑOR a bisa Moisés: "Reuní pa Mi setenta hòmber for di e ansianonan di Israel, di kualnan bo sa ku nan ta e ansianonan di e pueblo i nan ofisialnan, i hiba nan na e tènt di reunion, i laga nan para ayanan huntu ku bo.

11:17 E ora ei lo Mi baha bin i papia ku bo ayanan, i lo Mi tuma di e Spiritu ku ta riba bo, pon'E riba nan; i nan lo karga e karga di e pueblo huntu ku bo, pa bo no tin mester di kargu'é bo so.

11:18 "I bisa e pueblo: 'Konsagrá boso mes pa mañan i boso lo kome karni; pasobra boso a yora pa SEÑOR tende, bisando: "Ai, ku un hende lo a duna nos karni pa kome! Pasobra nos tabatin e bon na Egipto." Pesei SEÑOR lo duna boso karni i boso lo kome.

11:19 Boso lo kome, no ún dia, ni dos dia, ni sinku dia, ni dies dia, ni binti dia,

11:20 sino henter un luna, te ora ku e sali for di boso nanishi i bira algu repugnante pa boso, pasobra boso a rechasá SEÑOR, Kende ta meimei di boso, i a yora Su dilanti, bisando: "Pakiko nos a bandoná Egipto?"'"

11:21 Ma Moisés a bisa: "E pueblo ku mi ta meimei di djé ta seis shen mil hòmber na pia; tòg Bo a bisa: 'Lo Mi duna nan karni pa nan kome henter un luna.'

11:22 Mester mata tounan di bestia chikitu i krianan di baka pa nan, pa ta sufisiente pa nan? Of mester rekohé tur piská di laman pa nan, pa ta sufisiente pa nan?"

11:23 I SEÑOR a bisa Moisés: "SEÑOR Su poder ta limitá? Awor lo bo mira si Mi palabra lo wòrdu kumplí na bo, sí òf nò."

11:24 Asina Moisés a sali bai i a konta e pueblo e palabranan di SEÑOR. Tambe el a reuní setenta hòmber for di e ansianonan di e pueblo i a pone nan para rònt di e tènt.

11:25 E ora ei SEÑOR a baha den e nubia i a papia kuné; i El a tuma di e Spiritu ku tabata riba djé i a pon'E riba e setenta ansianonan. I a sosodé ku ora e Spiritu tabata reposá riba nan, nan tabata profetisá. Ma despues nan no a hasié mas.

11:26 Ma dos hòmber a keda den e kampamentu; nòmber di esun tabata Eldad i nòmber di e otro Medad. I e Spiritu tabata reposá riba nan (awor nan tabata meimei di esnan ku a wòrdu registrá, ma ku no a sali bai na e tènt), i nan tabata profetisá den e kampamentu.

11:27 I un hoben a kore bai konta Moisés i a bisa: "Eldad i Medad ta profetisá den e kampamentu."

11:28 E ora ei Josué, yu hòmber di Nun, sirbidó di Moisés for di su hubentut, a kontestá i a bisa: "Mi señor Moisés, prohibí nan!"

11:29 Ma Moisés a bis'é: "Bo ta yalurs pa mi motibu? Ohalá ku henter e pueblo di SEÑOR tabata profeta, ku SEÑOR lo a pone Su Spiritu riba nan!"

11:30 E ora ei Moisés a bolbe na e kampamentu, tantu é komo e ansianonan di Israel.

11:31 Awor a lanta un bientu mandá dor di SEÑOR, i esaki a trese patrishi for di laman i a laga nan kai banda di e kampamentu, mas o menos un dia di biahe na un banda i un dia di biahe na e otro banda, tur rònt di e kampamentu, i mas o menos dos kodo haltu riba superfisio di suela.

11:32 I e pueblo a keda lantá henter dia i henter anochi i henter e dia siguiente, i a rekohé e patrishinan (esun ku a rekohé mas poko a rekohé dies omer); i nan a plama nan pa nan mes tur rònt di e kampamentu.

11:33 Mientras ku e karni tabata entre nan djente ainda, promé ku nan a kou é, rabia di SEÑOR a sende kontra e pueblo, i SEÑOR a dal e pueblo ku un plaga severo.

11:34 Pesei nòmber di e lugá ei a wòrdu yamá Kibrot-hataava, pasobra ta aya nan a dera e pueblo ku tabata asina golos.

11:35 For di Kibrot-hataava e pueblo a sali bai Hazerot, i nan a keda na Hazerot.

Numbernan 12

12:1 Anto Miriam i Aaron a papia kontra Moisés pa motibu di e muhé kusita ku el a kasa kuné (pasobra el a kasa ku un muhé kusita);

12:2 i nan a bisa: "Ta pa medio di Moisés so SEÑOR a papia anto? E no a papia pa medio di nos tambe?" I SEÑOR a tende esaki.

12:3 (Awor e hòmber Moisés tabata masha umilde, mas ku tur hòmber ku tabatin riba superfisio di tera.)

12:4 I direpiente SEÑOR a bisa Moisés, Aaron i Miriam: "Boso tres sali bin na e tènt di reunion." Asina nan tres a sali bin.

12:5 E ora ei SEÑOR a baha den un pilar di nubia i a keda para na entrada di e tènt, i El a yama Aaron i Miriam. Ora nan tur dos a bin dilanti,

12:6 El a bisa: "Tende Mi palabranan awor: "Si tin un profeta meimei di boso, Ami, SEÑOR, lo hasi Mi mes konosí na djé den un vishon. Lo Mi papia kuné den un soño.

12:7 Ku Mi sirbidó Moisés no t'asina; e ta fiel den henter Mi kas;

12:8 kuné Mi ta papia kara-kara, abiertamente, i no den charada, i e ta mira aparensia di SEÑOR. Pakiko anto boso no tabatin miedu di papia kontra Mi sirbidó, kontra Moisés?"

12:9 Asina e rabia di SEÑOR a kima kontra nan i El a bai.

12:10 Ma ora ku e nubia a kita for di riba e tènt, ata, Miriam tabata leproso, blanku manera sneu. Ora ku Aaron a bira wak, ata, Miriam tabata leproso.

12:11 E ora ei Aaron a bisa Moisés: "Ai mi señor, pa fabor, no pone riba nos e piká aki ku nos a kometé den bobedat, i den kual nos a peka.

12:12 No laga Miriam ta manera un morto, kende su karni ta mitar komí ora ku e ta sali for di barika di su mama!"

12:13 I Moisés a sklama na SEÑOR, bisando: "O Dios, kur'é, mi ta pidiBo!"

12:14 Ma SEÑOR a bisa Moisés: "Si su tata a djis skupi den su kara, e lo no a karga su bèrguensa pa shete dia? Laga ser'é pa shete dia pafó di e kampamentu, i despues por risibié atrobe."

12:15 Asina Miriam a wòrdu será pafó di e kampamentu pa shete dia, i e pueblo no a sigui biaha te ora nan a risibí Miriam atrobe.

12:16 Despues e pueblo a sigui su biahe for di Hazerot i a kampa den e desierto di Paran.

Numbernan 13

13:1 E ora ei SEÑOR a papia ku Moisés, bisando:

13:2 "Manda pa bo mes hòmbernan pa nan spioná tera di Kanaan ku Mi ta bai duna na e yunan di Israel; manda un hòmber for di kada tribu di nan tatanan, kada un di nan un lider meimei di nan."

13:3 Asina Moisés a manda nan for di e desierto di Paran, riba òrdu di SEÑOR, nan tur, hòmbernan ku tabata kabesante di e yunan di Israel.

13:4 I esakinan tabata nan nòmbernan: for di e tribu di Ruben, Samúa, yu hòmber di Zakur;

13:5 for di e tribu di Simeon, Safat, yu hòmber di Hori;

13:6 for di e tribu di Juda, Kalèb, yu hòmber di Jefone;

13:7 for di e tribu di Isakar, Igal, yu hòmber di Jose;

13:8 for di e tribu di Efrain, Oseas, yu hòmber di Nun;

13:9 for di e tribu di Benjamin, Palti, yu hòmber di Rafú;

13:10 for di e tribu di Zabulon, Gadiel, yu hòmber di Sodi;

13:11 for di e tribu di Jose, for di e tribu di Manasés, Gadi, yu hòmber di Susi;

13:12 for di e tribu di Dan, Amiel, yu hòmber di Gemali;

13:13 for di e tribu di Aser, Setur, yu hòmber di Mikael;

13:14 for di e tribu di Nèftalí, Nabi, yu hòmber di Vapsi;

13:15 for di e tribu di Gad, Geuel, yu hòmber di Maki.

13:16 Esakinan ta e nòmbernan di e hòmbernan ku Moisés a manda pa spioná e tera, i Moisés a yama Oseas, yu hòmber di Nun, Josué.

13:17 Ora Moisés a manda nan pa spioná tera di Kanaan, el a bisa nan: "Bai aya na Negèv; despues bai den e serunan.

13:18 I mira kon e tera ta, i si e pueblo ku ta biba ayanan ta fuerte òf debil, si nan ta poko òf hopi.

13:19 I kon e tera kaminda nan ta biba ta? E ta bon òf malu? I kon e statnan kaminda nan ta biba ta? Nan ta manera kampamentunan habrí òf nan ta fortifiká?

13:20 I kon e tera ta? E ta fértil òf steril? Tin palu riba djé, sí òf nò? Hasi un esfuerso anto pa haña algun fruta di e tera." Awor tabata nèt tempu di e promé wendrùifnan hechu.

13:21 Asina nan a bai i a spioná e tera for di e desierto di Zin te na Rehob, na e entrada di Hamat.

13:22 Ora nan a bai Negèv, nan a yega Hebròn kaminda Ahiman, Sesai i Talmai, desendientenan di Anak, tabata biba. (Awor Hebròn a wòrdu trahá shete aña promé ku Zoan na Egipto.)

13:23 E ora ei nan a yega na e vaye di Eskol i for di einan nan a kòrta un rama ku ún tròshi di wendrùif na djé; i nan a kargu'é na un palu entre dos hòmber. Tambe nan a trese algun granatapel i figo.

13:24 E lugá ei a wòrdu yamá e vaye di Eskol pa motibu di e tròshi di wendrùif ku e yunan di Israel a kòrta ayanan.

13:25 Ora nan a bolbe despues di a spioná e tera, na fin di kuarenta dia,

13:26 nan a kana bin serka Moisés i Aaron i serka henter e kongregashon di e yunan di Israel den e desierto di Paran na Kades; i nan a trese notisia pa nan i pa henter kongregashon i a mustra nan e fruta di e tera.

13:27 Asina nan a kont'é i a bisa: "Nos a bai na e tera kaminda bo a manda nos, i siertamente, e tin lechi i miel na abundansia i esaki ta su fruta!

13:28 Sinembargo, e pueblo ku ta biba den e tera ta fuerte, i e statnan ta fortifiká i masha grandi mes; i ademas, nos a mira e desendientenan di Anak ayanan.

13:29 Amalek ta biba na tera di Negèv i e heteonan, e jebuseonan i e amoreonan ta biba den e serunan, i e kananeonan ta biba kantu di laman i na oriya di Jordan."

13:30 E ora ei Kalèb a kalma e pueblo dilanti di Moisés, i a bisa: "Laga nos bai mesora i tuma poseshon di djé, pasobra siguramente nos lo vens'é."

13:31 Ma e hòmbernan ku a bai huntu ku Kalèb a bisa: "Nos no por bai kontra e pueblo, pasobra nan ta muchu fuerte pa nos."

13:32 Asina nan a duna e yunan di Israel un mal reportahe di e tera ku nan a spioná, bisando: "E tera ku nos a pasa den pa spioná ta un tera ku ta devorá su habitantenan; i henter e pueblo ku nos a mira einan ta hòmbernan di gran estatura.

13:33 Tambe nos a mira gigantenan ayanan (e yu hòmbernan di Anak ta bin for di e gigantenan); i nos a bira manera tirakochi den nos mes bista, i asina nos tabata den nan bista tambe."