Search the Bible

Levitiko 14; Levitiko 15 BSNP Edit

Levitiko 14

14:1 E ora ei SEÑOR a papia ku Moisés, bisando:

14:2 "Esaki mester ta e lei pa e leproso den e dia di su purifikashon. Awor e mester wòrdu hibá pa e saserdote,

14:3 i e saserdote mester sali bai pafó di e kampamentu. Asina e saserdote mester wak é, i si e infekshon di lepra a wòrdu kurá na kurpa di e leproso,

14:4 e ora ei e saserdote mester duna òrdu pa kohe dos parha bibu i limpi, palu di seda, un hilu skarlata i hisòp pa esun ku mester wòrdu purifiká.

14:5 Tambe e saserdote mester duna òrdu pa mata un di e parhanan den un wea di klei ofer di awa ku ta kore.

14:6 Pa loke ta e parha bibu, e saserdote mester koh'é huntu ku e palu di seda, e hilu skarlata i e hisòp, i dòp nan, i e parha bibu, den e sanger di e parha ku a wòrdu matá ofer di e awa ku ta kore.

14:7 E ora ei e mester sprèngu shete biaha esun ku mester wòrdu purifiká di lepra, i deklar'é limpi. E ora ei e mester laga e parha bibu bula bai den kunuku.

14:8 "Esun ku mester wòrdu purifiká mester laba su pañanan i feita tur su kabei, i baña den awa i keda limpi. Despues e mag bai den e kampamentu, ma e mester keda pafó di su tènt pa shete dia.

14:9 I lo sosodé ku riba e di shete dia e mester feita tur su kabei: e mester feita su kabes, su barba i su wènkbrou, esta, tur su kabei. E ora ei e mester laba su pañanan i baña su kurpa den awa i keda limpi.

14:10 "I riba e di ocho dia e mester kohe dos lamchi machu sin defekto i un lamchi muhé di un aña sin defekto i tres désimo parti di un efa di hariña fini mesklá ku zeta, komo un ofrenda di mainshi, i un pinchi di zeta;

14:11 i e saserdote ku ta deklar'é limpi mester presentá e hòmber ku mester wòrdu purifiká, huntu ku e kosnan ei, dilanti di SEÑOR na entrada di e tènt di reunion.

14:12 "E ora ei e saserdote mester kohe un di e lamchinan machu i hib'é komo un ofrenda pa kulpa, huntu ku e pinchi di zeta, i presentá nan komo un ofrenda di zoyamentu dilanti di SEÑOR.

14:13 Kaba e mester mata e lamchi machu na e lugá kaminda nan ta mata e ofrenda pa piká i e ofrenda kimá, na e lugá di e santuario--pasobra e ofrenda pa kulpa, meskos ku e ofrenda pa piká, ta pa e saserdote; e ta masha santu mes.

14:14 E ora ei e saserdote mester kohe poko di e sanger di e ofrenda pa kulpa, i e saserdote mester pone esaki na klèp di orea drechi di esun ku mester wòrdu purifiká, i na dùim di su man drechi, i na dede grandi di su pia drechi.

14:15 Tambe e saserdote mester kohe poko di e pinchi di zeta i bash'é den su plant'i man robes;

14:16 anto e saserdote mester dòp dede di su man drechi den e zeta ku tin den su plant'i man robes, i ku su dede sprèngu poko di e zeta shete biaha dilanti di SEÑOR.

14:17 I di e sobrá zeta ku tin den su plant'i man e saserdote mester pone poko na klèp di orea drechi di esun ku mester wòrdu purifiká, i na dùim di su man drechi, i na dede grandi di su pia drechi, riba e sanger di e ofrenda pa kulpa;

14:18 i loke ku a resta di e zeta den su plant'i man, e saserdote mester pone riba kabes di esun ku mester wòrdu purifiká. Asina e saserdote mester hasi ekspiashon p'é dilanti di SEÑOR.

14:19 "Kaba e saserdote mester ofresé e ofrenda pa piká i hasi ekspiashon pa esun ku mester wòrdu purifiká di su impuresa. I despues e mester mata e ofrenda kimá.

14:20 I e saserdote mester ofresé e ofrenda kimá i e ofrenda di mainshi riba e altar. Asina e saserdote mester hasi ekspiashon p'é, i e lo keda limpi.

14:21 "Ma si e ta pober i su medionan ta insufisiente, e ora ei e mester kohe un lamchi machu komo un ofrenda pa kulpa, komo un ofrenda di zoyamentu pa hasi ekspiashon p'é, i un désimo parti di un efa di hariña fini mesklá ku zeta, komo un ofrenda di mainshi, i un pinchi di zeta,

14:22 i dos tòrteldùif òf dos pichon, manera ku e por; esun mester ta un ofrenda pa piká i e otro un ofrenda kimá.

14:23 "Anto riba e di ocho dia e mester hiba nan pa su purifikashon serka e saserdote, na entrada di e tènt di reunion, dilanti di SEÑOR.

14:24 I e saserdote mester kohe e lamchi di e ofrenda pa kulpa i e pinchi di zeta, i ofresé nan komo un ofrenda di zoyamentu dilanti di SEÑOR.

14:25 Kaba e mester mata e lamchi di e ofrenda pa kulpa, i kohe poko di e sanger di e ofrenda pa kulpa i pone esaki na klèp di orea drechi di esun ku mester wòrdu purifiká i na dùim di su man drechi i na dede grandi di su pia drechi.

14:26 Tambe e saserdote mester basha poko di e zeta den su plant'i man robes;

14:27 i ku dede di su man drechi e saserdote mester sprèngu poko di e zeta ku tin den su plant'i man robes shete biaha dilanti di SEÑOR.

14:28 E ora ei e saserdote mester pone poko di e zeta ku tin den su plant'i man na klèp di orea drechi di esun ku mester wòrdu purifiká, i na dùim di su man drechi, i na dede grandi di su pia drechi, riba e lugá di e sanger di e ofrenda pa kulpa.

14:29 Ademas, sobrá di e zeta ku tin den e saserdote su plant'i man e mester pone riba kabes di esun ku mester wòrdu purifiká, pa hasi ekspiashon p'é dilanti di SEÑOR.

14:30 I e mester ofresé un di e tòrteldùifnan òf pichonnan, segun ku e por.

14:31 E mester ofresé loke ku e por, esun komo un ofrenda pa piká i e otro komo un ofrenda kimá, huntu ku e ofrenda di mainshi. Asina e saserdote mester hasi ekspiashon dilanti di SEÑOR pa esun ku mester wòrdu purifiká.

14:32 "Esaki ta e lei pa esun ku tin un infekshon di lepra, kende su medionan pa su purifikashon ta limitá."

14:33 I SEÑOR a papia ku Moisés i Aaron, bisando:

14:34 "Ora boso drenta tera di Kanaan ku Mi ta duna boso komo propiedat, i Mi pone un marka di lepra riba un kas den e tera di boso propiedat,

14:35 e ora ei esun ku ta doño di e kas mester bin i konta e saserdote, bisando: 'Mi a ripará den mi kas algu ku ta parse un marka di lepra.'

14:36 E ora ei e saserdote mester ordená pa nan hasi e kas bashí promé ku e saserdote bai paden pa mira e marka, pa tur kos den e kas no tin mester di bira impuru; i despues e saserdote mester bai paden pa mira e kas.

14:37 Asina e mester wak e marka, i si e marka na e murayanan di e kas tin buraku-buraku manera bèrdè asina òf manera kòrá asina i ta parse di ta mas profundo ku e superfisio,

14:38 e ora ei e saserdote mester sali for di e kas bai na entrada di e kas, i isolá e kas pa shete dia.

14:39 I e saserdote mester bolbe riba e di shete dia i wak e kas. Si di bèrdat e marka a plama den e murayanan di e kas,

14:40 e ora ei e saserdote mester ordená nan pa saka e piedranan ku tin e marka aden i tira nan afó na un lugá impuru pafó di stat.

14:41 I e mester laga raspa tur rònt paden di e kas, i nan mester depositá e pleister ku nan raspa kit'afó na un lugá impuru pafó di stat.

14:42 E ora ei nan mester kohe otro piedra i remplasá e piedranan ei, i kohe otro pleister i pleister e kas di nobo.

14:43 "Ma si akaso e marka bolbe paresé den e kas, despues ku el a saka e piedranan i a raspa e kas, i despues ku el a wòrdu gepleister di nobo,

14:44 e ora ei e saserdote mester bin den e kas i wak e marka. Si e mira ku di bèrdat e marka a plama den e kas, e ora ei ta marka di un lepra maligno tin den e kas; e ta impuru.

14:45 Pesei e mester basha e kas abou, e piedranan i e palunan i tur e pleister di e kas, i hiba nan pafó di e stat na un lugá impuru.

14:46 "Ademas, ken ku bai den e kas durante di e tempu ku el a isol'é, ta bira impuru te ora nochi sera.

14:47 Di e mesun manera, ken ku kai drumi den e kas mester laba su pañanan, i ken ku kome den e kas mester laba su pañanan.

14:48 "Ma si e saserdote drenta i wak e kas, i di bèrdat e marka no a plama den djé, despues ku e kas a wòrdu gepleister di nobo, e ora ei e saserdote mester deklará e kas limpi, pasobra e marka no a bin bèk.

14:49 Anto pa purifiká e kas e saserdote mester kohe dos parha, palu di seda, un hilu skarlata i hisòp.

14:50 I e mester mata un di e parhanan den un wea di klei ofer di awa ku ta kore.

14:51 E ora ei e mester kohe e palu di seda, e hisòp i e hilu skarlata, huntu ku e parha bibu, i dòp nan den e sanger di e parha matá i tambe den e awa ku ta kore, i sprèngu e kas shete biaha.

14:52 Asina e mester purifiká e kas ku e sanger di e parha i ku e awa ku ta kore, huntu ku e parha bibu, e palu di seda, e hisòp i e hilu skarlata.

14:53 Ma e parha bibu e mester laga bula bai pafó di e stat den aire liber di kunuku. Asina e mester hasi ekspiashon pa e kas, i esaki lo keda limpi."

14:54 Esaki ta e lei pa kualke marka di lepra--tambe pa un infekshon riba kabes,

14:55 i pa lepra di paña òf di kas,

14:56 i pa un hinchá, pa un sarna i pa un plèki koló kla--

14:57 pa siña hende ki ora nan ta impuru i ki ora nan ta limpi. Esaki ta e lei di lepra.

Levitiko 15

15:1 Tambe SEÑOR a papia ku Moisés i Aaron, bisando:

15:2 "Papia ku e yunan di Israel i bisa nan: 'Ora ku un hòmber tin un derama for di su kurpa, su derama ta impuru.

15:3 Ademas, esaki lo ta su impuresa den su derama: sea ku su kurpa laga e derama basha òf sea ku su kurpa wanta e derama, ta su impuresa.

15:4 'Tur kama ku e persona ku tin e derama drumi ariba lo ta impuru, i tur loke ku e sinta ariba lo ta impuru.

15:5 I ken ku mishi ku su kama mester laba su pañanan i baña den awa i keda impuru te ora nochi sera.

15:6 Ken ku sinta riba e kos ku e hòmber ku tin e derama a sinta ariba mester laba su pañanan, baña den awa i keda impuru te ora nochi sera.

15:7 'Tambe ken ku mishi ku e persona ku tin e derama mester laba su pañanan, baña den awa i keda impuru te ora nochi sera.

15:8 'Of si e hòmber ku tin e derama skupi riba un hende ku ta limpi, esei tambe mester laba su pañanan i baña den awa i keda impuru te ora nochi sera.

15:9 'I tur siya ku e persona ku tin e derama sinta ariba ta bira impuru.

15:10 Ken ku mishi ku algu ku tabatin bou di e hòmber lo ta impuru te ora nochi sera, i esun ku karga nan mester laba su pañanan i baña den awa i keda impuru te ora nochi sera.

15:11 'Tambe un hende ku esun ku tin e derama mishi kuné, sin ku el a spula su mannan den awa, mester laba su pañanan i baña den awa i keda impuru te ora nochi sera.

15:12 'I e wea di klei ku e persona ku tin e derama mishi kuné mester wòrdu kibrá, i tur wea di palu mester wòrdu spulá ku awa.

15:13 'Awor ora ku e hòmber ku tin e derama bira limpi di su derama, e mester konta pa su mes shete dia pa su purifikashon; e mester laba su pañanan i baña su kurpa den awa ku ta kore i e lo bira limpi.

15:14 E ora ei riba e di ocho dia e mester kohe pa su mes dos tòrteldùif òf dos pichon, i bin dilanti di SEÑOR na entrada di e tènt di reunion i duna e saserdote nan.

15:15 I e saserdote mester ofresé nan, esun komo un ofrenda pa piká i e otro komo un ofrenda kimá. Asina e saserdote mester hasi ekspiashon p'é dilanti di SEÑOR pa motibu di su derama.

15:16 'Awor si un hòmber tin un emishon di simia, e mester baña henter su kurpa den awa i keda impuru te ora nochi sera.

15:17 Tur paña i tur kueru ku tin un emishon di simia riba djé mester wòrdu labá ku awa i keda impuru te ora nochi sera.

15:18 Si un hòmber drumi ku un muhé, asina ku tin un emishon di simia, nan tur dos mester baña den awa i keda impuru te ora nochi sera.

15:19 'Ora ku un muhé tin un derama, i e derama di su kurpa ta sanger, e mester kontinuá den su impuresa di menstruashon pa shete dia; i ken ku mishi kuné lo keda impuru te ora nochi sera.

15:20 'Tambe tur kos ku e muhé drumi ariba durante di su impuresa di menstruashon lo keda impuru, i tur kos ku e sinta ariba lo keda impuru.

15:21 I ken ku mishi ku su kama mester laba su pañanan i baña den awa i keda impuru te ora nochi sera.

15:22 Ken ku mishi ku algu ku e muhé a sinta ariba mester laba su pañanan i baña den awa i keda impuru te ora nochi sera.

15:23 Sea ku esaki ta riba kama òf riba e kos ku e muhé a sinta ariba, ora ku e hòmber mishi kuné, e lo keda impuru te ora nochi sera.

15:24 'I si un hòmber drumi kuné, asina ku su impuresa di menstruashon ta riba djé, e hòmber mester keda impuru pa shete dia, i tur kama ku e hòmber drumi ariba lo keda impuru.

15:25 'Awor si un muhé tin un derama di sanger pa hopi dia, fuera di e periodo di su impuresa di menstruashon, òf si e tin un derama ku ta pasa e periodo ei, tur e dianan di su derama impuru e mester kontinuá manera den e dianan di su impuresa di menstruashon; e ta impuru.

15:26 Tur kama ku e drumi ariba durante di tur e dianan di su derama mester ta p'é manera e kama di su impuresa di menstruashon; i tur kos ku e sinta ariba lo keda impuru, manera e impuresa di su impuresa di menstruashon.

15:27 Tambe ken ku mishi ku nan lo keda impuru i mester laba su pañanan i baña den awa, i keda impuru te ora nochi sera.

15:28 'Ora ku e muhé bira limpi di su derama, e mester konta shete dia mas, i despues e lo keda limpi.

15:29 E ora ei riba e di ocho dia e mester kohe dos tòrteldùif òf dos pichon i hiba nan pa e saserdote, na entrada di e tènt di reunion.

15:30 I e saserdote mester ofresé esun komo un ofrenda pa piká i e otro komo un ofrenda kimá. Asina e saserdote mester hasi ekspiashon pa e muhé dilanti di SEÑOR pa motibu di e derama di su impuresa.'

15:31 "Asina boso mester tene e yunan di Israel separá for di nan impuresa, pa nan no muri den nan impuresa ora nan kontaminá Mi tabernakel, ku ta keda meimei di nan."

15:32 Esaki ta e lei pa esun ku tin un derama, i pa e hòmber ku tin un emishon di simia, asina ku e ta impuru pa motibu di djé,

15:33 i pa e muhé ku ta malu pa motibu di impuresa di menstruashon, i pa esun ku tin un derama, sea hòmber òf muhé, i pa e hòmber ku ta drumi ku un muhé impuru.