Search the Bible

Job 35; Job 36; Job 37 BSNP Edit

Job 35

35:1 E ora ei Eliú a sigui i a kontestá:

35:2 "Bo ta kere ku esaki ta di akuèrdo ku hustisia? Bo ta bisa: 'Mi hustisia ta mas ku hustisia di Dios'?

35:3 Pasobra bo ta bisa: 'Di ki bentaha lo e ta pa Bo? Ki probecho lo mi tin mas ku si mi a peka?'

35:4 "Lo mi kontestábo, i bo amigunan huntu ku bo.

35:5 Wak e shelunan i mira; i kontemplá e nubianan--nan ta mas haltu ku bo.

35:6 Si bo a peka, kiko bo ta logra kontra djE? I si bo transgreshonnan ta hopi, kiko esei lo hasiE?

35:7 Si bo ta hustu, kiko bo ta dun'E? Of kiko E ta risibí for di bo man?

35:8 Bo maldat ta afektá un hende manera bo mes, i bo hustisia ta pa un yu di hende.

35:9 "Pa motibu di e multitut di opreshonnan nan ta sklama; nan ta sklama pa yudansa pa motibu di e brasa di e poderosonan.

35:10 Ma ningun hende no ta bisa: 'Unda Dios, Esun ku a trahami, ta, Kende ta duna kantikanan den anochi,

35:11 Kende ta siña nos mas ku e bestianan di tera, i ta hasi nos mas sabí ku e parhanan di shelu?'

35:12 Aya nan ta sklama, ma E no ta kontestá, pa motibu di e orguyo di hende malbado.

35:13 Siguramente Dios no ta skucha sklamashon bano; tampoko e Todopoderoso lo no hasi kaso di esei.

35:14 Kuantu menos ora bo bisa ku bo no ta mir'E, e kaso ta Su dilanti, i bo mester spera riba djE!

35:15 I awor, pasobra E no a kastigá den Su rabia, ni E no a paga muchu atenshon na transgreshon,

35:16 pesei Jòb ta habri su boka i ta papia palabranan bano; e ta multipliká palabranan sin konosementu."

Job 36

36:1 E ora ei Eliú a sigui i a kontestá:

36:2 "Wardami un ratu, i lo mi mustrabo ku ainda mi tin mas di bisa na fabor di Dios.

36:3 For di leu lo mi buska mi konosementu, i lo mi atribuí hustisia na Esun ku a trahami.

36:4 Pasobra, di bèrdat, mi palabranan no ta bano; un hende ku ta perfekto den konosementu ta para bo dilanti.

36:5 "Mira, Dios ta poderoso, ma E no ta despresiá ningun hende; E ta poderoso den forsa di komprendementu.

36:6 E no ta tene e malbado na bida, ma ta duna hustisia na e afligínan.

36:7 E no ta kita Su bista for di e hustu; ma El a pone nan sinta pa semper serka reinan riba trono, i nan ta wòrdu halsá.

36:8 I si nan ta mará na kadena, i ta wòrdu kohí prezo den kabuyanan di aflikshon,

36:9 e ora ei E ta mustra nan nan obra i nan transgreshonnan ku nan a halsa nan mes kuné.

36:10 I E ta habri nan orea pa instrukshon, i ta ordená pa nan kombèrtí di maldat.

36:11 Si nan tende i sirbiE, nan lo kaba nan dianan den prosperidat, i nan añanan den felisidat.

36:12 Ma si nan no tende, nan lo peresé pa medio di spada, i nan lo muri sin konosementu.

36:13 "Ma esun ku no tin Dios den su kurason ta montoná rabia; nan no ta sklama pa yudansa ora ku E ta mara nan.

36:14 Nan ta muri den nan hubentut, i nan bida ta kaba entre e sodomitanan.

36:15 E ta libra e afligínan den nan aflikshon, i ta habri nan orea den tempu di opreshon.

36:16 "E ora ei, di bèrdat, El a lòk bo sakabo for di e boka di angustia. I na lugá di esei El a hibabo na un lugá amplio, sin límite; i loke a wòrdu poní riba bo mesa tabata kuminda riku.

36:17 Ma bo tabata yen di e huisio ku ta pa e malbado; huisio i hustisia ta poderá di bo.

36:18 Tene kuidou pa furia no tentabo pa hasi bofon; i no laga e kantidat grandi di plaka di reskate desviábo.

36:19 Bo rikesa òf tur e forsanan di bo poder por a wardabo di angustia?

36:20 No deseá pa nochi yega, ora ku pueblonan ta disparsé for di nan lugá.

36:21 Tene kuidou, no bolbe na maldat, pasobra bo a preferá esaki riba aflikshon.

36:22 "Mira, Dios ta halsá den Su poder; ken ta un siñadó manera E?

36:23 Ken a skohe Su kaminda p'E, i ken a bisa: 'Bo a hasi robes'?

36:24 Kòrda ku bo mester engrandesé Su obra, di kual hende a kanta.

36:25 Tur hende a mira esei; for di leu hende ta mira esei.

36:26 Mira, Dios ta grandi, i nos no konos'E; e kantidat di Su añanan ta inkalkulabel.

36:27 "Pasobra E ta hala e gotanan di awa trese ariba; for di neblina nan ta destilá awaseru,

36:28 ku e nubianan ta laga basha i ta laga kai na abundansia riba hende.

36:29 Tin hende ku por komprendé moveshon di e nubianan, e zonidu di strena for di Su lugá di biba?

36:30 Mira, E ta plama Su lamper rònt di djE, i E ta tapa e profundidatnan di laman.

36:31 Pasobra pa medio di esakinan E ta huzga pueblonan; E ta duna kuminda na abundansia.

36:32 E ta tapa Su mannan ku lamper, i ta ordená esaki pa dal.

36:33 Su strena ta anunsiá e tempestat ku ta biniendo; asta e bakanan ta laga sa ku e tempestat ta aserkando.

Job 37

37:1 "Pa esaki tambe mi kurason ta tembla, i ta bula for di su lugá.

37:2 Skucha atentamente na Su bos ku ta zona manera strena, i e zonidu duru ku ta sali for di Su boka.

37:3 Bou di henter shelu E ta lagu'é lòs, i Su lamper te na e finnan di tera.

37:4 Despues di esaki un bos ta ronka; E ta strena ku Su bos mahestuoso; i E no ta wanta e lampernan ora Su bos ta zona.

37:5 Dios ta strena maraviyosamente ku Su bos; E ta hasi kosnan grandi ku nos no por komprendé.

37:6 Pasobra na sneu E ta bisa: 'Kai riba tera,' i na diluvio i awaseru: 'Sea fuerte.'

37:7 E ta seya man di tur hende, pa tur hende konosé Su obra.

37:8 Anto e bestia ta bai den su lugá di skonde, i ta keda den su kueba.

37:9 For di sùit ta bin tempestat, i for di nòrt frialdat.

37:10 Dor di e rosea di Dios eis ta wòrdu trahá, i superfisio di e awanan ta vris.

37:11 Tambe E ta karga e nubia diki ku humedat; e nubia di Su lamper E ta plama tur rònt.

37:12 I esaki ta kambia di direkshon i ta bira rònt bou di Su guiansa, pa nan por hasi tur loke E ordená nan riba superfisio di e mundu habitá.

37:13 Sea pa korekshon, òf pa Su mundu, òf pa motibu di Su miserikòrdia, E ta hasié sosodé.

37:14 "Tende esaki, O Jòb, para ketu i konsiderá e maraviyanan di Dios.

37:15 Bo sa kon Dios ta stablesé nan, i ta hasi e lamper di Su nubia briya?

37:16 Bo sa tokante di e lagnan di e nubianan diki, e maraviyanan di Esun ku ta perfekto den konosementu,

37:17 abo, kende su bistínan ta bira kayente, ora tera ta ketu pa motibu di bientu di sùit?

37:18 Huntu kunE bo por ekspandé e shelunan, firme, manera un spil di metal bashá?

37:19 "Siña nos kiko nos mester bis'E; nos no por regla nos kaso pa motibu di skuridat.

37:20 Ta nesesario pa bis'E ku ami kier papia? Un hende lo pidi pa e wòrdu gulí?

37:21 I awor hende no ta mira e lus ku ta briya den e shelunan, ma bientu a pasa i a klaria nan.

37:22 For di nòrt ta sali splendor di oro; tur rònt di Dios tin mahestat temibel.

37:23 E Todopoderoso--nos no por hañ'E; E ta ekselente den poder; i E lo no violá huisio ni hustisia abundante.

37:24 Pesei hende tin temor di djE; E no ta hasi kaso di ningun hende ku ta sabí den nan kurason."