Search the Bible

Job 32; Job 33; Job 34 BSNP Edit

Job 32

32:1 E ora ei e tres hòmbernan aki a stòp di kontestá Jòb, pasobra e tabata hustu den su mes bista.

32:2 Anto rabia di Eliú, yu hòmber di Barakel e buzita, di famia di Ram, a kima; kontra Jòb su rabia a kima, pasobra e tabata hustifiká su mes dilanti di Dios.

32:3 I su rabia a kima kontra su tres amigunan, pasobra nan no a haña kontesta i tòg a kondená Jòb.

32:4 Awor Eliú a warda pa kontestá Jòb, pasobra nan tabata mas bieu kuné.

32:5 I ora ku Eliú a mira ku no tabatin kontesta den boka di e tres hòmbernan, su rabia a kima.

32:6 Asina Eliú, yu hòmber di Barakel e buzita, a kontestá i a bisa: "Ami ta hoben i boso ta bieu; pesei mi tabata tímido i tabatin miedu pa bisa boso kiko mi ta pensa.

32:7 Mi a pensa: edat mester papia, i kantidat di aña mester deklará sabiduria.

32:8 Ma tin un spiritu den hende, i rosea di e Todopoderoso ta dun'é komprendementu.

32:9 No ta tur ora esnan di edat haltu ta sabí, tampoko no ta tur ora e ansianonan ta komprendé hustisia.

32:10 "Pesei mi ta bisa: 'Skuchami, ami tambe lo duna mi opinion.'

32:11 Mira, mi a spera riba boso palabranan, mi a skucha boso rasonamentu, mientras ku boso tabata buska kiko pa bisa.

32:12 Mi a paga bon atenshon na boso; di bèrdat, no tabatin ningun hende pa konvensé Jòb, ningun di boso no a kontestá su palabranan.

32:13 No bisa: 'Nos a haña sabiduria; Dios lo kore kuné, no hende.'

32:14 Awor e no a dirigí su palabranan kontra mi; pesei lo mi no kontest'é ku boso argumentonan.

32:15 "Nan ta desanimá, nan no ta kontestá mas; nan no tin palabra mas.

32:16 I ami tin ku spera, pasobra nan no ta papia, pasobra nan ta para ketu i no ta kontestá mas?

32:17 Ami tambe lo kontestá mi parti, ami tambe lo duna mi opinion.

32:18 Pasobra mi ta yen di palabra; e spiritu ku ta den mi ta obligámi.

32:19 Mira, mi paden ta meskos ku biña ku no tin salida, manera saku-di-kueru nobo e ta serka di rementá.

32:20 Lagami papia pa mi por deshogá mi mes; lagami habri mi lepnan i kontestá.

32:21 No lagami hasi distinshon di persona, ni labia ningun hende.

32:22 Pasobra mi no sa kon pa labia, sino Esun ku a trahami lo a kitami mesora for di aki.

Job 33

33:1 "Sinembargo, mi ta rogabo Jòb, tende mi diskurso, i skucha tur mi palabranan.

33:2 At'awor mi ta habri mi boka; mi lenga den mi boka ta papia.

33:3 Mi palabranan ta sali for di e rektitut di mi kurason; i mi lepnan ta papia konosementu ku tur sinseridat.

33:4 Ta e Spiritu di Dios a trahami, i e rosea di e Todopoderoso ta dunami bida.

33:5 Kontestámi si bo por; prepará bo palabranan mi dilanti; lanta para.

33:6 Mira, mi ta pertenesé na Dios meskos ku bo; mi tambe a wòrdu formá for di klei.

33:7 Mira, no laga miedu pa mi terorisábo, ni mi man no mester keda pisá riba bo.

33:8 "Siguramente bo a papia pa mi tende, i mi a tende e zonidu di bo palabranan:

33:9 'Mi ta puru, sin transgreshon; mi ta inosente i no tin inikidat den mi.

33:10 Tòg E ta haña falta den mi; E ta konsiderámi Su enemigu.

33:11 E ta pone mi pianan na sepa, E ta vigilá tur mi berehanan.'

33:12 "Mira, lo mi kontestábo: den esaki bo no ta hustu, pasobra Dios ta mas grandi ku hende.

33:13 Pakiko bo ta keha kontra djE, ku E no ta duna kuenta di tur loke E ta hasi?

33:14 Di bèrdat, Dios ta papia ún biaha, òf dos biaha, ma ningun hende no ta ripará esei.

33:15 Den un soño, un vishon di anochi, ora ku soño profundo baha riba hende, mientras ku nan ta drumi riba nan kama,

33:16 e ora ei E ta habri orea di hende, i ta seya nan instrukshon,

33:17 pa E kita hende for di su mal kaminda, i warda hende for di orguyo;

33:18 E ta warda su alma for di graf, i su bida pa e no peresé pa medio di spada.

33:19 Tambe hende ta wòrdu kastigá ku doló riba su kama, i ku doló konstante den su wesunan;

33:20 asina ku su bida ta aboresé pan, i su alma su kuminda preferí.

33:21 Su karni ta kaba na su kurpa, i su wesunan, ku bo no tabata por a mira, awor ta sali.

33:22 E ora ei su alma ta yega serka di graf, i su bida serka di esnan ku ta kousa morto.

33:23 "Si tin un angel komo mediador p'é, un entre mil, pa kòrda hende kiko ta korekto p'é,

33:24 anto lagu'E mustr'é miserikòrdia, i bisa: 'Libr'é di baha den graf, mi a haña un redenshon';

33:25 laga su karni bira mas suave ku esun di mucha, lagu'é bolbe na e dianan di vigor di su hubentut.

33:26 E ora ei e lo hasi orashon na Dios, i Dios lo asept'é, asina ku e por mira Dios Su kara ku alegria, i Dios por restorá Su hustisia na hende.

33:27 E lo kanta pa hende i bisa: 'Mi a peka i a pèrvèrtí loke ta korekto, ma mi no a haña loke mi tabata meresé.

33:28 El a redimí mi alma pa e no baha den graf, i mi bida lo mira e lus.'

33:29 "Mira, hopi bes Dios ta hasi tur e kosnan aki ku hende,

33:30 pa trese su alma bèk for di graf, asina ku e por wòrdu iluminá ku e lus di bida.

33:31 "Pone atenshon, O Jòb, skuchami; keda ketu i lagami papia.

33:32 Anto si bo tin kualke kos di bisa, kontestámi; papia, pasobra mi tin deseo di hustifikábo.

33:33 Si no, abo skuchami; keda ketu, i lo mi siñabo sabiduria."

Job 34

34:1 E ora ei Eliú a sigui i a kontestá:

34:2 "Tende mi palabranan, boso, hòmbernan sabí, i skuchami, boso ku tin konosementu.

34:3 Pasobra orea ta tèst palabra manera shel'i boka ta purba kuminda.

34:4 Laga nos skohe loke ta hustu pa nos mes; laga nos sa entre nos kiko ta bon.

34:5 "Pasobra Jòb a bisa: 'Ami ta hustu, ma Dios a kita mi derecho;

34:6 mi mester gaña tokante di mi derecho? Mi herida ta inkurabel, maske mi ta sin transgreshon.'

34:7 Kual hòmber ta manera Jòb, kende ta bebe menospresio manera awa,

34:8 kende ta asosiá ku hasidónan di inikidat, i ta anda ku hòmbernan malbado?

34:9 Pasobra el a bisa: 'Un hende no tin ningun probecho ora ku e ta purba agradá Dios.'

34:10 "Pesei skuchami, boso, hòmbernan di komprendementu. Leu sea di Dios di hasi maldat, i di e Todopoderoso di kometé inikidat.

34:11 Pasobra E ta paga hende segun su obra, i ta hasi hende haña e rekompensa ku su kondukta ta meresé.

34:12 Di bèrdat, Dios no ta aktua na manera inhustu, ni e Todopoderoso no ta pèrvèrtí hustisia.

34:13 Ken a dun'E outoridat riba tera? I ken a dun'E enkargo di henter mundu?

34:14 Si E lo a disidí di hasi asina, si E lo a bolbe tuma Su Spiritu i Su rosea,

34:15 tur karni lo a peresé huntu, i hende lo a bolbe bira stòf.

34:16 "Ma si bo tin komprendementu, tende esaki; skucha e zonidu di mi palabranan.

34:17 Akaso un hende ku ta odia hustisia por goberná? I lo bo kondená Esun hustu i poderoso,

34:18 kende ta bisa un rei: 'Bo no ta sirbi pa nada,' òf nobelnan: 'Boso ta malbado';

34:19 kende no ta duna preferensia na prensnan, ni ta duna e riku mas atenshon ku e pober, pasobra nan tur ta obra di Su mannan?

34:20 Den un momento nan ta muri, mei anochi pueblonan ta wòrdu sakudí i ta muri, i e poderoso ta wòrdu eliminá, no pa man di hende.

34:21 "Pasobra Su wowonan ta riba e kamindanan di hende, i E ta mira tur su pasonan.

34:22 No tin skuridat ni sombra di morto, unda e hasidónan di inikidat por skonde.

34:23 Pasobra E no tin mester di investigá un hende mas aleu, pa esaki bin dilanti di Dios pa huisio.

34:24 E ta kibra hòmbernan poderoso na pida-pida, sin hasi investigashon, i ta pone otronan na nan lugá.

34:25 Pesei E konosé nan obranan, i den anochi E ta tira nan abou, asina ku nan ta keda plèchá.

34:26 E ta kastigá nan meskos ku e malbadonan, na un lugá unda hende por mira nan,

34:27 pasobra nan a desviá i no a siguiE, i no a konsiderá ningun di Su kamindanan,

34:28 asina ku nan a hasi e sklamashon di e pober yega serka djE, i ku E por tende e sklamashon di e afligínan.

34:29 Ora ku E keda ketu, ken por kondená? I ora ku E skonde Su kara, ken por mir'E, esta, konsiderando tur dos, nashon i hende,

34:30 pa hende sin Dios no goberná, ni bira trampa pa e pueblo.

34:31 "Pasobra akaso un hende a yega di bisa Dios: 'Mi a soportá kastigu; lo mi no ofendé mas;

34:32 Abo siñami loke mi no ta mira; si mi a hasi inikidat, lo mi no hasi esei mas'?

34:33 E mester rekompensá manera abo ta haña ta bon, pasobra abo a rechasá esei? Pasobra abo mester skohe i no ami; pesei, bisa loke bo sa.

34:34 "Hòmbernan di komprendementu lo bisami, i un hòmber sabí ku ta tendemi:

34:35 'Jòb ta papia sin konosementu, i su palabranan ta sin sabiduria.

34:36 Jòb mester wòrdu probá te na ekstremo, pasobra e ta kontestá manera hòmbernan malbado.

34:37 Pasobra e ta agregá rebeldia na su piká; meimei di nos e ta bati su mannan, i ta multipliká su palabranan kontra Dios.'"