Search the Bible

Job 29; Job 30; Job 31 BSNP Edit

Job 29

29:1 Jòb a sigui su diskurso i a bisa:

29:2 "Mara mi tabata manera mi tabata lunanan pasá, manera den e dianan ku Dios tabata kuidami;

29:3 tempu ku Su lampi tabata briya riba mi kabes, i pa medio di Su lus mi tabata kana pasa dor di skuridat;

29:4 manera mi tabata den e dianan di mi hubentut, tempu ku e amistat di Dios tabata riba mi tènt;

29:5 tempu ku e Todopoderoso tabata ku mi ainda, i mi yunan tabata rònt di mi;

29:6 tempu ku mi pasonan tabata bañá den manteka, i e baranka tabata basha riunan di zeta pa mi!

29:7 "Tempu ku mi tabata sali bai na e porta di stat, tempu ku mi tabata bai sinta na mi lugá riba plenchi,

29:8 e hobennan tabata mirami i tabata bai skonde, i e ansianonan tabata lanta para.

29:9 E prensnan tabata stòp di papia, i tabata pone man na boka;

29:10 bos di e nobelnan tabata keda ketu, i nan lenga tabata pega na nan shel'i boka.

29:11 Pasobra ora orea tabata tende, e tabata yamami bendishoná, i ora wowo tabata mira, e tabata duna testimonio di mi,

29:12 pasobra mi tabata libra e pober ku tabata sklama pa yudansa, i e wérfano ku no tabatin ningun hende pa yud'é.

29:13 E bendishon di e hòmber muribundu a bin riba mi, i mi tabata hasi kurason di e biuda kanta di alegria.

29:14 Mi tabata bisti mi mes ku hustisia, i esei tabata tapami; mi hustisia tabata manera un mantel i un tùlban.

29:15 Mi tabata wowo pa e siegu i pia pa e lam.

29:16 Mi tabata un tata pa esnan den nesesidat, i mi tabata investigá kaso di hende deskonosí pa mi.

29:17 I mi tabata kibra kachete di e malbado, i tabata ranka e proi for di meimei di su djentenan.

29:18 "E ora ei mi a pensa: 'Lo mi muri den mi neishi, i lo mi multipliká mi dianan manera santu.

29:19 Mi rais ta plama te yega na e awanan, i serena ta keda henter anochi riba mi taki.

29:20 Mi gloria semper ta nobo den mi, i mi bog ta wòrdu renobá den mi man.'

29:21 "Nan tabata skuchami i tabata spera, i tabata keda ketu pa tende mi konseho.

29:22 Despues di mi palabranan nan no tabata papia mas, i mi palabranan tabata gotia riba nan.

29:23 I nan tabata spera riba mi manera riba awaseru, i tabata habri nan boka hanchu manera pa e último awaseru di temporada.

29:24 Ora mi tabata hari ku nan, kasi nan no por a kere, i e lus di mi kara nan no por a kita.

29:25 Mi tabata skohe un kaminda pa nan i tabata sinta komo hefe, i tabata biba manera rei meimei di e trupanan, manera un hende ku tabata konsolá esnan ku tabata yora.

Job 30

30:1 "Ma awor esnan ku ta mas hoben ku mi ta hasi bofon di mi, esnan ku nan tatanan mi no a konsiderá digno pa pone nan huntu ku e kachónan di mi tou di karné.

30:2 Di bèrdat, di kiko e forsa di nan mannan a sirbimi? Nan a pèrdè nan vigor.

30:3 Nan ta flaku-flaku pa motibu di nesesidat i hamber, kendenan ta kou tera seku anochi na lugánan bandoná i desolá.

30:4 Nan ta ranka malba for di den e matanan, i rais di mata di enebro ta nan kuminda.

30:5 Nan ta wòrdu saká for di komunidat; hende ta grita nan manera ta grita ladron,

30:6 asina ku nan ta biba den vayenan spantoso, den burakunan den tera i den e barankanan.

30:7 Meimei di e matanan nan ta grita manera buriku; i bou di e matanan di sumpiña nan ta bin huntu.

30:8 Hende bobo, sí, esnan sin nòmber, nan a wòrdu sutá saká for di e tera.

30:9 "I awor mi a bira nan kantika di bofon, asta mi a bira un refran pa nan.

30:10 Nan ta aboresémi i ta alehá nan mes for di mi, i nan no ta laga di skupi den mi kara.

30:11 Pasobra El a lòs liña di Su bog i a afligími, nan a laga frena bai mi dilanti.

30:12 Na mi man drechi e multitut bulgar ta lanta; nan ta pusha mi pianan un banda i ta lanta nan kamindanan di destrukshon kontra mi.

30:13 Nan ta kibra mi kaminda, nan tin probecho di mi kalamidat, ningun hende no ta stroba nan.

30:14 Manera dor di un kibrá hanchu nan ta pasa, meimei di un tempestat nan ta lora bin.

30:15 Terornan ta bin kontra mi, nan ta pèrsiguí mi onor manera bientu, i mi prosperidat a pasa bai manera un nubia.

30:16 "I awor mi alma ta wòrdu dramá paden di mi; dianan di aflikshon a garami.

30:17 Anochi e ta traspasá mi wesunan den mi, i e dolónan ku ta komemi no ta tuma sosiegu.

30:18 Pa medio di un forsa enorme mi paña ta keda tur trosí; e ta chokami manera e kòl di mi bachi.

30:19 El a tirami den lodo, i mi a bira manera stòf i shinishi.

30:20 "Mi ta sklama na Bo pa yudansa, ma Bo no ta kontestámi; mi ta lanta para i Bo no ta paga atenshon na mi.

30:21 Bo a bira kruel pa mi; ku e poder di Bo man Bo ta pèrsiguími.

30:22 Bo ta hisami pone riba bientu i ta hasimi kore riba djé; i Bo ta hasimi disolvé den un tempestat.

30:23 Pasobra mi sa ku lo Bo hibami na morto i na e kas destiná pa tur ku ta biba.

30:24 "Ma un hende ku ta den un monton di ruina no ta ekstendé su man, òf den su desaster no ta sklama pa yudansa?

30:25 Mi no a yora pa esun ku su bida ta duru? Mi alma no tabatin duele di esun den nesesidat?

30:26 Ora mi tabata spera bon, malu a bin; ora mi tabata spera lus, skuridat a bin.

30:27 Mi ta kushi paden i no por sosegá; dianan di aflikshon ta konfrontámi.

30:28 Mi ta kana rònt tur pretu, ma no di solo; mi ta lanta para den e asamblea i ta sklama pa ousilio.

30:29 Mi a bira ruman di chakál i kompañero di abestrus.

30:30 Mi kueru ta bira pretu i ta kita, i mi wesunan ta kima di keintura.

30:31 Pesei muzik di mi arpa a bira yanto di rou, i mi flùit, bos di esnan ku ta yora.

Job 31

31:1 "Mi a sera un aliansa ku mi wowonan; kon anto mi por a wak un birgen?

31:2 I kiko ta e porshon di Dios for di ariba, òf e erensia di e Todopoderoso for di haltura?

31:3 Esei no ta kalamidat pa e inhustu, i desaster pa esnan ku ta hasi inikidat?

31:4 E no ta mira mi kamindanan i ta konta tur mi pasonan?

31:5 "Si mi a anda ku falsedat, i mi pia a pura bai tras di engaño,

31:6 lagu'E pisami ku balansa eksakto, i laga Dios konosé mi integridat.

31:7 Si mi paso a desviá for di e kaminda, òf mi kurason a sigui mi wowonan, òf si algun mancha a pega na mi man,

31:8 laga ami planta i un otro kome, i laga mi kosecha wòrdu ranká ku rais ku tur.

31:9 "Si mi kurason a wòrdu sedusí dor di un muhé, òf si mi a lur na porta di mi bisiña,

31:10 laga mi esposa mula pa un otro, i laga otronan drumi kuné.

31:11 Pasobra esei lo tabata maldat; ademas, e lo tabata inikidat kastigabel pa hues.

31:12 Pasobra esei lo tabata un kandela ku ta kima te na destrukshon, i lo a destruí tur mi ganashi.

31:13 "Si mi a despresiá derecho di mi esklabu hòmber òf esklabu muhé ora nan a lanta un keho kontra mi,

31:14 kiko mi por hasi anto ora Dios lanta, i ora ku E yamami pa duna kuenta, kiko lo mi kontest'E?

31:15 No ta Esun ku a trahami den barika a traha nan? I no ta e Mesun ta forma nos den barika?

31:16 "Si mi a stroba e pober di haña su deseo, òf a hasi wowo di e biuda faya,

31:17 òf a kome mi boka di kuminda mi só, i e wérfano no a kome for di djé

31:18 (ma for di mi hubentut el a lanta serka mi manera serka un tata, i for di infansia mi a gui'é),

31:19 si mi a mira un hende peresé pa falta di paña, òf ku esun den nesesidat no tabatin ko'i tapa,

31:20 si su kurason no a bendishonámi, i si e no a tene su kurpa kayente ku lana di mi karnénan,

31:21 si mi a lanta mi man kontra e wérfano, pasobra mi a mira ku mi tabatin yudansa den e porta di stat,

31:22 laga mi skouder sali for di su lugá, i mi brasa wòrdu kibrá na èlebog.

31:23 Pasobra kalamidat for di Dios ta un teror pa mi, i pa motibu di Su mahestat mi no por hasi nada.

31:24 "Si mi a pone mi konfiansa den oro, i a yama oro fini mi konfiansa;

31:25 si mi a gaba, pasobra mi rikesa tabata grandi, i pasobra mi man a gana asina hopi;

31:26 si mi a opservá solo ora ku e tabata briya, òf luna moviendo den splendor,

31:27 i mi kurason a wòrdu engañá na sekreto, i mi man a tira un sunchi for di mi boka,

31:28 esaki tambe lo tabata un inikidat ku mester a wòrdu huzgá, pasobra lo mi a nenga e Dios aya riba.

31:29 "Mi a regosihá den destrukshon di mi enemigu, òf a sintimi gosá ora maldat a bin riba djé?

31:30 Nò, mi no a pèrmití mi boka peka dor di pidi un maldishon pa su bida.

31:31 E hòmbernan di mi tènt no a puntra: 'Ken por haña un hende ku no a yena su barika ku karni ku Jòb a proveé'?

31:32 E stranhero no a pasa nochi pafó, pasobra mi a habri mi portanan pa e biahero.

31:33 Akaso mi a tapa mi transgreshonnan manera Adam, dor di skonde mi inikidat den mi bus,

31:34 pasobra mi tabata teme e gran multitut; i e menospresio di e famianan a terorisámi, i mi a keda ketu i no a sali pafó?

31:35 "O ku mi tabatin un hende pa skuchami! Mira, ata mi firma aki; laga e Todopoderoso kontestámi! I e akusashon ku mi kontrapartida a skirbi,

31:36 siguramente lo mi a kargu'é riba mi skouder; lo mi a mar'é manera un korona.

31:37 Lo mi a dun'E kuenta di tur mi pasonan; manera un prens lo mi a aserk'E.

31:38 "Si mi tera sklama kontra mi, i su hoyonan yora huntu;

31:39 si mi a kome su fruta sin paga, òf a hasi su doñonan pèrdè nan bida,

31:40 laga mata di sumpiña krese na lugá di trigo, i yerba stinki na lugá di puspas." E palabranan di Jòb a tèrminá.