Search the Bible

Job 14; Job 15; Job 16 BSNP Edit

Job 14

14:1 "Hende ku a nase di muhé ta biba poko dia i ta yen di problema.

14:2 Manera un flor e ta habri i ta marchitá. Manera un sombra e ta hui bai i no ta permanesé.

14:3 I riba un hende asina Bo ta habri Bo wowo, i ta hib'é Bo dilanti pa huisio?

14:4 Ken por saka algu limpi for di loke no ta limpi? Ni un hende!

14:5 Siendo ku siguramente su dianan ta kontá, e kantidat di su lunanan ta ku Bo; Bo a stipulá su límitenan, kualnan e no por pasa.

14:6 Kita Bo bista for di djé pa e por sosegá, te ora ku e kompletá su dia manera un trahadó kontratá.

14:7 "Pasobra pa un palu tin speransa, ku ora e wòrdu gekap, e lo spreit di nobo, i su spreitnan lo no pashimá.

14:8 Maske su raisnan bira bieu den e tera i su tronkon muri den e tera seku,

14:9 tòg, asina ku e haña holó di awa, e ta floresé, i ta saka spreit manera un planchi.

14:10 Ma hende ta muri i ta wòrdu derá. Hende ta hala su último rosea, i unda el a keda?

14:11 Manera awa ta verdamp for di laman, i awa di riu ta kaba i e riu ta seka,

14:12 asina hende ta kai drumi i no ta lanta mas; te ora ku e shelunan no t'ei mas, e lo no lanta ni wòrdu spièrtá for di su soño.

14:13 "O ku Bo lo a skondemi den Seol, ku Bo lo a skondemi te ora Bo furia pasa, ku Bo lo a pone un límite pa mi i kòrda riba mi!

14:14 Si un hende muri, lo e bolbe biba? Tur e dianan di mi lucha lo mi spera, te ora mi liberashon bin.

14:15 Abo lo yama, i ami lo kontestáBo; lo Bo anhelá na e obra di Bo mannan.

14:16 Pasobra awor Bo ta konta mi pasonan, ma Bo no ta opservá mi piká.

14:17 Mi transgreshon ta seyá den un saku, i Bo ta tapa mi inikidat.

14:18 "Manera seru ta kai den otro i ta garna na pida-pida, i manera baranka ta kitá for di su lugá,

14:19 manera awa ta gasta piedra, i manera korida di awa ta laba stòf di tera bai kuné, asina Bo ta destruí speransa di hende.

14:20 Semper Bo ta triunfá riba djé i e ta sali bai; Bo ta kambia su aparensia i ta mand'é bai.

14:21 Su yunan ta wòrdu onrá, ma e no sa esei; òf nan ta wòrdu umiyá, ma e no ta ripará esei.

14:22 Ma su kurpa ta hasié doló, i e ta lamentá solamente pa su mes."

Job 15

15:1 E ora ei Elifaz e temanita a kontestá:

15:2 "Un hòmber sabí lo kontestá ku konosementu bano, i yena su barika ku bientu di pariba?

15:3 Lo e rasoná ku palabra inútil, òf ku argumento ku no ta di ningun probecho?

15:4 Di bèrdat, bo ta pone temor un banda, i ta stroba meditashon dilanti di Dios.

15:5 Pasobra bo inikidat ta pone sorto di palabranan asina den bo boka, i bo ta skohe e lenguahe di hende astuto.

15:6 Bo mes boka ta kondenábo, i no ami; i bo mes lepnan ta testifiká kontra bo.

15:7 "Ta abo ta e promé hende ku a nase? Of bo a wòrdu trahá promé ku e serunan?

15:8 Bo ta tende e konseho sekreto di Dios, i ta limitá sabiduria pa bo mes?

15:9 Kiko abo sa ku nos no sa? Kiko abo ta komprendé ku nos no ta komprendé?

15:10 Tantu esun ku kabei blanku komo e ansiano ta meimei di nos, muchu mas bieu ku bo tata.

15:11 Ta muchu poko e konsolashonnan di Dios ta pa bo, i e palabra ku a wòrdu papiá ku bo ku kariño?

15:12 Pakiko bo kurason ta lastrabo bai kuné? I pakiko bo wowonan ta spat kandela,

15:13 ku bo ta bira bo spiritu kontra Dios, i ta pèrmití sorto di palabranan asina sali for di bo boka?

15:14 "Kiko hende ta, ku e mester ta puru, òf esun ku a nase di muhé, ku e mester ta hustu?

15:15 Mira, E no ta pone konfiansa den Su santunan, i e shelunan no ta puru den Su bista;

15:16 kuantu menos un hende ku ta abominabel i korumpí, hende ku ta bebe inikidat manera awa!

15:17 "Lo mi kontabo, skuchami; i loke mi a mira, esei lo mi deklará tambe;

15:18 loke hòmbernan sabí a konta, sin skonde nada ku nan a risibí for di nan tatanan,

15:19 na kendenan so e tera a wòrdu duná, i ningun stranhero no a pasa meimei di nan.

15:20 E hòmber malbado ta trose di doló tur su dianan, i e añanan ku ta wardá pa e opresor ta kontá.

15:21 Zonidunan di teror ta den su orea, mientras ku e ta na pas e destruidó ta bin riba djé.

15:22 E no ta kere ku e lo bolbe for di skuridat, i e ta destiná pa spada.

15:23 E ta kana rònt ta buska kuminda, i ta puntra: 'Unda e ta?' E sa ku dia di skuridat ta serka.

15:24 Aflikshon i angustia ta teroris'é; nan ta poderá di djé manera un rei kla pa ataká,

15:25 pasobra el a saka su man kontra Dios, i ta komportá su mes ku arogansia kontra e Todopoderoso.

15:26 Ku arogansia e ta kore bai kontra djE ku su eskudo grandi i pisá.

15:27 "Pasobra el a tapa su kara ku vèt, i a hasi su hepnan bira pisá di karni.

15:28 I el a biba den statnan desolá, den kasnan kaminda ningun hende no kier a biba, ku ta destiná pa bira ruina.

15:29 E lo no bira riku, ni su rikesa lo no dura, i su mainshi lo no dobla te na suela.

15:30 E lo no skapa for di skuridat; e flam lo seka su spreitnan, i pa medio di e rosea di e boka di Dios e lo bai.

15:31 No lagu'é konfia den banidat, gañando su mes, pasobra banidat lo ta su rekompensa.

15:32 Esei lo wòrdu kumplí promé ku su tempu, i su rama di palma lo no ta bèrdè.

15:33 Manera mata di wendrùif e ta laga su wendrùif bèrdè kai abou, i manera palu di oleifi e ta tira su flor abou.

15:34 Pasobra e kompania di hende sin Dios ta infértil, i kandela ta kaba ku e tèntnan di e hende korupto.

15:35 Nan ta konsebí pèrvèrsidat i ta pari inikidat, i nan barika ta prepará engaño."

Job 16

16:1 E ora ei Jòb a kontestá:

16:2 "Mi a tende hopi kos asina; boso tur ta konsoladó miserabel.

16:3 No tin límite na palabra bano? Of kiko ta molestiábo ku bo ta kontestá?

16:4 Mi tambe por a papia manera boso, si mi tabata na boso lugá. Mi por a komponé palabranan kontra boso, i sakudí mi kabes pa boso.

16:5 Mi por a fortalesé boso ku mi boka, i e konsolashon di mi lepnan por a kalma boso doló.

16:6 "Si mi papia, mi doló no ta bira menos, i si mi keda ketu, ki alivio esei lo ta pa mi?

16:7 Ma awor El a lagami morto kansá; Bo a hasi tur e hendenan di mi kas keda desolá.

16:8 I Bo a yenami ku ploi, esei a bira un testigu kontra mi; i mi flakesa ta lanta kontra mi, e ta testiguá den mi kara.

16:9 Su rabia a sker mi i a pèrsiguími, El a krak Su djente kontra mi; mi atversario ta wak mi ku mal wowo.

16:10 Nan a habri nan boka hanchu kontra mi, ku menospresio nan a dal mi na mi band'i kara; nan tur a basha bin kontra mi.

16:11 Dios ta entregámi na malechornan, i ta tirami den man di e malbadonan.

16:12 Mi tabata trankil, ma El a destrosámi, i El a garami na mi nèk i a sakudími kibrami na pida-pida; tambe El a ponemi komo Su mekpùnt pa E tira riba mi.

16:13 Su flechanan ta rondonámi. Sin miserikòrdia E ta traspasá mi riñonnan; E ta basha mi hal riba suela.

16:14 E ta kibrami ku sla riba sla; E ta kore bin riba mi manera un guerero.

16:15 "Mi a kose paña-di-saku na mi kurpa, i a hinka mi kachu den tera.

16:16 Mi kara ta kòrá di yora, i skuridat profundo ta riba mi klèpnan di wowo,

16:17 maske no tin violensia den mi mannan, i mi orashon ta puru.

16:18 "O tera, no tapa mi sanger, i no laga mi sklamashon haña ni un lugá di sosiegu.

16:19 Awor aki mes, mira, mi testigu ta den shelu, i mi abogado ta den e halturanan.

16:20 Mi amigunan ta esnan ku ta hasi bofon di mi; mi wowo ta drama lágrima dilanti di Dios.

16:21 Mara un hende por a roga na Dios, manera un hende ta roga pa su próhimo!

16:22 "Pasobra ora poko aña a pasa, lo mi bai e kaminda for di unda lo mi no bolbe mas.