Sofonias 3
3:1
Ai di e stat ku ta rebelde i kontaminá, e stat tirániko!
3:2
E no a paga tino na ningun bos; e no a aseptá instrukshon. E no a konfia den SEÑOR; e no a hala serka su Dios.
3:3
Su prensnan ku ta den djé ta leon ku ta gruña, su huesnan ta lobo di atardi; nan no ta laga nada pa mainta.
3:4
Su profetanan ta iresponsabel, hòmbernan traishonero; su saserdotenan a profaná e santuario. Nan a violá lei.
3:5
SEÑOR ta hustu den djé; E lo no hasi inhustisia. Tur mainta E ta saka Su hustisia na klaridat; E no ta faya. Ma e inhustu no konosé bèrguensa.
3:6
"Mi a kòrta nashonnan kit'afó, nan torennan di skina a keda na ruina. Mi a hasi nan kayanan keda desolá, kaminda ningun hende no ta pasa; nan statnan ta keda ruiná, sin ningun hende, sin ningun habitante.
3:7
Mi a bisa: 'Siguramente lo bo respetáMi, aseptá instrukshon.' Asina ku su lugá di biba lo no wòrdu kòrtá kitá afó segun tur loke Mi a stipulá tokante di djé. Ma nan tabata purá pa korumpí tur nan echonan.
3:8
Pesei, spera riba Mi," SEÑOR ta deklará, "pa e dia ku Mi lanta pa plùnder. Di bèrdat, Mi desishon ta pa reuní nashonnan, pa trese reinonan huntu, pa basha Mi indignashon riba nan, tur Mi rabia ardiente; pasobra henter tera lo wòrdu devorá pa medio di e kandela di Mi zelo.
3:9
"Pasobra e ora ei lo Mi duna e pueblonan lepnan purifiká, pa nan tur por invoká e nòmber di SEÑOR, pa sirbiE den ún akuèrdo.
3:10
For di e otro banda di e riunan di Etiopia Mi adoradónan, esnan di Mi ku a wòrdu plamá, lo trese Mi ofrendanan.
3:11
Den e dia ei lo bo no sinti bèrguensa pa motibu di tur bo echonan pa medio di kualnan bo a rebeldiá kontra Mi; pasobra e ora ei lo Mi kita for di meimei di boso esnan ku ta alegrá ku orguyo, i nunka mas lo bo ta sobèrbè riba Mi seru santu.
3:12
Ma lo Mi laga un pueblo umilde i mansu meimei di bo, i nan lo tuma refugio den e nòmber di SEÑOR.
3:13
E restante di Israel lo no hasi malu, ni papia mentira; tampoko un lenga engañoso lo no wòrdu hañá den nan boka, pasobra nan lo kome i drumi sin ningun hende pa pone nan tembla."
3:14
Grita di alegria, O yu muhé di Sion! Grita ku triunfo, O Israel! Alegrá i regosihá di henter bo kurason, O yu muhé di Jerusalèm!
3:15
SEÑOR a kita Su huisionan kontra bo, El a kore ku bo enemigunan. E Rei di Israel, e SEÑOR, ta meimei di bo; lo bo no tin miedu di desaster mas.
3:16
Den e dia ei lo wòrdu bisá na Jerusalèm: "No tene miedu, O Sion; no laga bo mannan bira debil.
3:17
SEÑOR bo Dios ta meimei di bo, un guerero viktorioso. E lo regosihá den bo ku alegria, E lo ta ketu den Su amor, E lo regosihá den bo ku gritu di alegria."
3:18
"Lo Mi reuní esnan ku tin duele, pasobra nan ta anhelá na e fiestanan stipulá-- nan tabata di bo, O Sion; e reproche di eksilio ta un karga riba nan.
3:19
Mira, e tempu ei Mi ta bai trata ku tur boso opresornan; lo Mi salba e kohonan i rekohé e eksiliadonan, i lo Mi kambia nan bèrguensa hasié alabansa i fama den henter tera.
3:20
Na e tempu ei lo Mi reuní boso, na e tempu ei lo Mi trese boso kas. Di bèrdat, lo Mi duna boso fama i alabansa meimei di tur e pueblonan di tera, dia ku dilanti di boso wowo Mi trese esnan di boso ku ta den koutiverio, bèk," SEÑOR ta bisa.