Zakarias 2

BSNP Edit

Zakarias 2

2:1 E ora ei mi a hisa mi kara wak, i mira, tabatin un hòmber ku un liña-di-midi den su man.

2:2 I mi a bisa: "Unda bo ta bai?" I el a bisami: "Mi ta bai midi Jerusalèm, pa mira kon hanchu e ta i kon largu e ta."

2:3 I mira, e angel ku tabata papia ku mi a bai, i un otro angel a bin kontr'é,

2:4 i a bis'é: "Kore, papia ku e hoben ei, i bisa: 'Jerusalèm lo wòrdu habitá sin muraya, pa motibu di e multitut di hende i bestia di kria ku tin den djé.

2:5 Pasobra Ami,' SEÑOR ta deklará, 'lo ta un muraya di kandela rònt di djé, i Ami lo ta e gloria meimei di djé.'"

2:6 "Lanta! Hui for di e tera di nòrt," SEÑOR ta deklará, "pasobra Mi a plama boso manera e kuater bientunan di e shelunan," SEÑOR ta deklará.

2:7 "Lanta, Sion! Skapa, abo ku ta biba serka e yu muhé di Babilonia."

2:8 Pasobra asina e SEÑOR di ehérsitonan ta bisa: "Despues di gloria El a mandami kontra e nashonnan ku ta plùnder boso, pasobra esun ku mishi ku boso ta mishi ku Su pret'i wowo.

2:9 Pasobra mira, lo Mi lanta Mi man kontra nan, asina ku nan lo bira plùnder pa nan esklabunan. E ora ei boso lo sa ku ta e SEÑOR di ehérsitonan a mandaMi.

2:10 "Kanta ku alegria i sea kontentu, O yu muhé di Sion; pasobra mira, Mi ta bin i lo Mi biba meimei di boso," SEÑOR ta deklará.

2:11 "I hopi nashon lo uni nan mes ku SEÑOR den e dia ei i lo bira Mi pueblo. E ora ei lo Mi biba meimei di boso, i boso lo sa ku e SEÑOR di ehérsitonan a mandaMi serka boso.

2:12 I SEÑOR lo tuma Juda komo Su porshon den e tera santu, i lo bolbe skohe Jerusalèm.

2:13 Keda ketu tur hende, dilanti di SEÑOR; pasobra El a lanta for di Su habitashon santu."

Zakarias 1 Zakarias 3