E Kanto di tur Kanto 6

BSNP Edit

E Kanto di tur Kanto 6

6:1 "Unda bo stimá a bai, O esun di mas bunita entre muhénan? Unda bo stimá a bira bai, pa nos por bai busk'é huntu ku bo?"

6:2 "Mi stimá a baha bai na su hòfi, na e kamanan di balsem, pa pastoriá su tounan den e hòfinan i pa piki leli.

6:3 Mi ta di mi stimá, i mi stimá ta di mi, esun ku ta pastoriá su tounan meimei di e lelinan."

6:4 "Bo ta mes bunita ku Tirsa, mi amor, mes dushi ku Jerusalèm, mes temibel ku un ehérsito ku emblema.

6:5 Kita bo wowonan for di mi, pasobra nan ta konfundími; bo kabei ta manera un tou di kabritu ku ta baha for di Galaad.

6:6 Bo djentenan ta manera un tou di karné muhé ku a subi bin for di nan baño, nan tur ku yu ohochi, i ni un di nan no a pèrdè su yu.

6:7 Bo band'i kara ta manera un snechi di granatapel tras di bo velo.

6:8 Tin sesenta reina i ochenta konkubina, i mucha muhénan, muchu hopi pa konta.

6:9 Ma mi palomba, esun perfekto di mi, ta úniko: e ta e úniko yu muhé di su mama; e ta e yu faborito di esun ku a hañ'é. E mucha muhénan a mir'é i a yam'é bendishoná, e reinanan i e konkubinanan tambe, i nan a gab'é.

6:10 "Ta ken esaki ta, ku ta parse ourora, mes bunita ku luna yen, mes puru ku solo, mes temibel ku un ehérsito ku emblema?"

6:11 "Mi a baha bai na e hòfi di palunan di nechi, pa mira e vaye bira bèrdè, pa mira si e matanan di wendrùif a saka kònòpi òf si e palunan di granatapel a floria.

6:12 Promé ku mi a realisá esaki, mi alma a ponemi entre e garoshinan di Aminadab."

6:13 "Bin bèk, bin bèk, O sulamita; bin bèk, bin bèk, pa nos por keda wak bo!" "Pakiko bo kier fiha bista riba e sulamita, manera ta fiha bista riba e baliamentu di e dos kampamentunan?

E Kanto di tur Kanto 5 E Kanto di tur Kanto 7