E Kanto di tur Kanto 4

BSNP Edit

E Kanto di tur Kanto 4

4:1 "Ki bunita bo ta, mi amor! Ki bunita bo ta! Bo wowonan ta manera palomba tras di bo velo; bo kabei ta manera un tou di kabritu ku ta baha for di Seru Galaad.

4:2 Bo djentenan ta manera un tou di karné ku nan a kaba di pela, ku a kaba di haña un baño, nan tur ku yu ohochi, i ni un di nan no a pèrdè su yu.

4:3 Bo lepnan ta manera un hilu skarlata, i bo boka ta bunita. Bo band'i kara ta manera un snechi di granatapel tras di bo velo.

4:4 Bo garganta ta manera e toren di David, trahá ku karedanan di piedra, na kual tin mil eskudo kologá, tur e eskudonan rondó di e hòmbernan poderoso.

4:5 Bo dos pechunan ta manera dos yu di biná, yu ohochi di un gasèl ku ta kome meimei di e lelinan.

4:6 Te na e ora fresku di dia, ora ku e sombranan ta hui bai, mi kier sigui mi kaminda pa e seru di mirra i pa e seritu di sensia.

4:7 Bo ta tur bunita ku tin, mi amor, i no tin defekto den bo.

4:8 "Ban ku mi for di Líbano, mi brùit, ban ku mi for di Líbano. Baha for di e tòp di Amana, for di e tòp di Senir i Hermon, for di e kuebanan di leon, for di e serunan di leopardo.

4:9 Bo a hòrta mi kurason, mi ruman, mi brùit; bo a hòrta mi kurason ku solamente ún mirada di bo wowo, ku solamente ún kuenta di bo koyar.

4:10 Ki bunita bo amor ta, mi ruman, mi brùit! Kuantu mas mihó ku biña bo amor ta, i e holó dushi di bo zetanan, ku tur sorto di speserei!

4:11 Bo lepnan, mi brùit, ta gotia miel; miel i lechi ta bou di bo lenga, i e holó dushi di bo pañanan ta manera e holó dushi di Líbano.

4:12 Un hòfi será mi ruman, mi brùit, ta, un pos será, un fuente seyá.

4:13 Bo spreitnan ta un plantashon di palu di granatapel, ku e mihó frutanan, hena ku mata di nardo,

4:14 nardo i azafran, kaña aromátiko i kané, ku tur e palunan di sensia, mirra i aloé, huntu ku tur e spesereinan di mas mihó.

4:15 Bo ta un fuente di hòfi, un pos di awa bibu, i koridanan di awa ku ta kore for di Líbano."

4:16 "Spièrta, bientu di nòrt, i bin, bientu di sùit! Supla den mi hòfi, pa su holó dushi plama. Ku mi stimá bin den su hòfi i kome su mihó frutanan!"

E Kanto di tur Kanto 3 E Kanto di tur Kanto 5