Salmonan 94

BSNP Edit

94:1 O SEÑOR, Dios di vengansa; Dios di vengansa, resplandesé!

94:2 Lanta, O Hues di tera; duna e orguyosonan nan pago.

94:3 Kuantu tempu mas e malbadonan, O SEÑOR, kuantu tempu mas e malbadonan lo triunfá?

94:4 Nan ta insultá, nan ta papia ku arogansia; tur esnan ku ta hasi maldat ta gaba nan mes.

94:5 Nan ta plècha Bo pueblo, O SEÑOR, i ta afligí Bo erensia.

94:6 Nan ta mata biuda i stranhero, i ta asesiná e wérfanonan.

94:7 Nan a bisa: "SEÑOR no ta mira, ni e Dios di Jakòb no ta paga tino."

94:8 Boso, hende sin sintí den e pueblo, paga tino! Ki dia boso lo komprendé, boso, hende bobo?

94:9 Esun ku a planta orea, E no ta tende? Esun ku a forma wowo, E no ta mira?

94:10 Esun ku ta kastigá nashonnan, lo E no reprendé? Esta, Esun ku ta siña hende konosementu?

94:11 SEÑOR konosé e pensamentunan di hende, ku nan ta banidat.

94:12 Bendishoná ta e hende ku Bo ta kastigá, O SEÑOR, i ku Bo ta siña for di Bo lei,

94:13 pa Bo por dun'é sosiegu den e dianan di atversidat, te ora ku un buraku wòrdu kobá pa e malbado.

94:14 Pasobra SEÑOR no ta bandoná Su pueblo, ni E no ta bai laga Su erensia.

94:15 Pasobra huisio lo bira hustisia atrobe, i tur esnan rekto di kurason lo sigui esei.

94:16 Ken lo lanta pa mi kontra hasidónan di maldat? Ken lo para pa mi kontra esnan ku ta hasi maldat?

94:17 Si SEÑOR no tabata mi yudansa, pronto mi alma lo a biba den silensio.

94:18 Si mi lo a bisa: "Mi pia ta slep," Bo miserikòrdia, O SEÑOR, lo sostenémi.

94:19 Den e multitut di mi preokupashonnan den mi, Bo konsuelonan ta alegrá mi alma.

94:20 Un trono di destrukshon por ta ligá ku Bo-- un trono ku ta plania pèrvèrsidat pa medio di dekreto?

94:21 Nan ta uni nan mes kontra bida di e hustu, i ta kondená sanger inosente.

94:22 Ma SEÑOR tabata mi defensa, i mi Dios e baranka di mi refugio.

94:23 I El a trese nan inikidat bèk riba nan mes, i lo destruí nan den nan maldat; SEÑOR nos Dios lo destruí nan.