Salmonan 91

BSNP Edit

91:1 Esun ku ta biba bou di e protekshon di e Haltísimo lo permanesé den e sombra di e Todopoderoso.

91:2 Lo mi bisa SEÑOR: "Mi refugio i mi fòrti, mi Dios, den Kende mi ta konfia!"

91:3 Pasobra E ta Esun ku ta librabo for di e trampa di e yagdó, i for di e pèst ku ta destruí.

91:4 E lo kubribo ku Su plumanan, i bou di Su halanan lo bo buska refugio; Su fieldat ta un eskudo i un baluarte.

91:5 Lo bo no tin miedu di e teror di anochi, ni di e flecha ku ta bula den dia,

91:6 ni di e pèst ku ta kana den skuridat, ni di e destrukshon ku ta destruí na ora di mèrdia.

91:7 Mil por kai band'i bo, i dies mil na bo man drechi, ma serka bo e lo no yega.

91:8 Solamente ku bo wowo lo bo opservá, i mira e rekompensa di e malbadonan.

91:9 Pasobra bo a hasi SEÑOR, Kende ta mi refugio, e Haltísimo, bo lugá di biba,

91:10 nada malu lo no pasa ku bo, ni ningun plaga lo no yega serka di bo tènt.

91:11 Pasobra E lo duna Su angelnan enkargo tokante di bo, pa wardabo den tur bo kamindanan.

91:12 Den nan mannan nan lo kargabo, pa bo no dal bo pia na piedra.

91:13 Lo bo kana riba leon i kobra; lo bo trapa riba leon chikitu i kolebra.

91:14 "Pasobra el a stimaMi, pesei lo Mi libr'é; lo Mi proteh'é, pasobra e konosé Mi nòmber.

91:15 E lo sklama na Mi, i Ami lo kontest'é; lo Mi ta kuné den angustia; lo Mi reskat'é i onr'é.

91:16 Ku bida largu lo Mi satisfas'é, i lagu'é mira Mi salbashon."