Salmonan 86

BSNP Edit

86:1 Inkliná Bo orea, O SEÑOR, i kontestámi, pasobra mi ta afligí i den nesesidat.

86:2 Preservá mi alma, pasobra mi ta un hòmber deboto; Abo, O mi Dios, salba Bo sirbidó ku ta konfia den Bo.

86:3 Tene miserikòrdia di mi, O Señor, pasobra ta na Bo mi ta sklama henter dia.

86:4 Hasi e alma di Bo sirbidó kontentu, pasobra ta na Bo, O Señor, mi ta halsa mi alma.

86:5 Pasobra Abo, Señor, ta bon, i kla pa pordoná, i abundante den miserikòrdia pa tur esnan ku ta sklama na Bo.

86:6 Skucha mi orashon, O SEÑOR, i paga atenshon na e bos di mi súplikanan!

86:7 Den e dia di mi angustia lo mi sklama na Bo, pasobra Abo lo kontestámi.

86:8 No tin ningun manera Bo entre e diosnan, O Señor, tampoko no tin ningun obra manera Bo obranan.

86:9 Tur nashon ku Bo a traha lo bin adorá Bo dilanti, O Señor, i nan lo glorifiká Bo nòmber;

86:10 pasobra Bo ta grandi i ta hasi obranan maraviyoso; Abo so ta Dios.

86:11 Siñami Bo kaminda, O SEÑOR; lo mi kana den Bo bèrdat; uni mi kurason pa teme Bo nòmber.

86:12 Lo mi alabáBo, O Señor mi Dios, ku henter mi kurason, i lo mi glorifiká Bo nòmber pa semper.

86:13 Pasobra Bo miserikòrdia pa ku mi ta grandi, i Bo a libra mi alma for di e profundidatnan di Seol.

86:14 O Dios, hendenan arogante a lanta kontra mi, i un trupa di hende violento a buska mi bida, i nan no a poneBo nan dilanti.

86:15 Ma Abo, O Señor, ta un Dios yen di kompashon i grasia, Kende no ta rabia lihé, i ta abundante den miserikòrdia i bèrdat.

86:16 Bira wak mi, i tene miserikòrdia di mi; duna Bo sirbidó Bo fortalesa, i salba e yu hòmber di Bo sirbiente.

86:17 Mustrami un señal pa bon, pa esnan ku ta odiami mira esaki i keda na bèrguensa, pasobra Abo, O SEÑOR, a yudami i a konsolámi.