Salmonan 82

BSNP Edit

82:1 Dios ta para den Su mes kongregashon; E ta huzga meimei di e diosnan.

82:2 Kuantu tempu mas lo bo huzga inhustamente, i faboresé e malbado?

82:3 Defendé esun debil i e wérfano; hasi hustisia na esun afligí i na esun sin amparo.

82:4 Reskatá esun debil i esun den nesesidat; libra nan for di man di e malbado.

82:5 Nan no sa, ni nan no ta komprendé; nan ta kana rònt den skuridat; tur e fundeshinan di tera ta sakudí.

82:6 Mi a bisa: "Boso ta diosnan, i boso tur ta yunan di e Haltísimo.

82:7 Sinembargo, boso lo muri manera hende, i kai manera un di e prensnan."

82:8 Lanta, O Dios, huzga tera! Pasobra ta Abo ta eredá tur nashon.