Salmonan 80

BSNP Edit

80:1 Skucha, O Wardadó di Israel, Abo ku ta guia Jose manera un tou di karné; Abo ku ta sintá riba trono ariba di e kerubinnan, resplandesé!

80:2 Lanta Bo poder dilanti di Efrain, Benjamin i Manasés, i bin pa salba nos!

80:3 Restorá nos, O Dios, i hasi Bo kara resplandesé, i nos lo ta salbá.

80:4 O SEÑOR Dios di ehérsitonan, kuantu tempu mas lo Bo mustra Bo indignashon kontra e orashon di Bo pueblo?

80:5 Bo a alimentá nan ku pan di lágrima, i Bo a hasi nan bebe awa di wowo na abundansia.

80:6 Bo a hasi nos un motibu di pleitu pa nos bisiñanan, i nos enemigunan ta hari nan ku nan.

80:7 Restorá nos, O Dios di ehérsitonan, i hasi Bo kara resplandesé, i nos lo ta salbá.

80:8 Bo a saka un mata di wendrùif for di Egipto; Bo a kore ku e nashonnan, i a plant'é.

80:9 Bo a prepará e tera p'é; el a saka rais i a yena e tera.

80:10 E serunan a keda tur tapá ku su sombra, i e palunan di seda di Dios, ku su ramanan.

80:11 E tabata manda su takinan te na laman, i su spreitnan te na Riu Eufrates.

80:12 Pakiko Bo a basha su trankeranan abou, asina ku tur ku ta pasa pa e kaminda ei ta piki su fruta?

80:13 Porko di mondi ta kaba kuné, i e bestianan di mondi ta kom'é limpi-limpi.

80:14 Nos ta rogaBo, bolbe, O Dios di ehérsitonan, wak abou for di shelu i mira, i atendé e mata di wendrùif aki,

80:15 e spreit ku Bo man drechi a planta, i mira riba e yu hòmber ku Bo a hasi fuerte pa Bo mes.

80:16 E ta tur kimá ku kandela, e ta kòrtá bashá abou; debí na e reprendementu di Bo mirada, nan ta peresé.

80:17 Laga Bo man ta riba e hòmber di Bo man drechi, riba e yu di hende ku Bo a hasi fuerte pa Bo mes.

80:18 E ora ei nos lo no bandonáBo; rebibá nos, i nos lo invoká Bo nòmber.

80:19 Restorá nos, O SEÑOR Dios di ehérsitonan; hasi Bo kara resplandesé, i nos lo ta salbá.