Salmonan 79

BSNP Edit

Salmonan 79

79:1 O DIOS, e nashonnan a invadí Bo erensia; nan a profaná Bo tèmpel santu; nan a hasi Jerusalèm bira un ruina.

79:2 Nan a duna e kadavernan di Bo sirbidónan komo kuminda pa e parhanan di shelu, e karni di Bo santunan na e bestianan di tera.

79:3 Nan a drama nan sanger manera awa tur rònt di Jerusalèm, i no tabatin ningun hende pa dera nan.

79:4 Nos a bira un reproche pa nos bisiñanan, un despresio i bofon pa esnan ku ta rònt di nos.

79:5 Kuantu tempu mas, O SEÑOR? Lo Bo keda rabiá pa semper? Bo yalursheit lo kima manera kandela?

79:6 Basha Bo furia riba e nashonnan ku no konoséBo, i riba e reinonan ku no ta invoká Bo nòmber.

79:7 Pasobra nan a devorá Jakòb, i a ruiná su habitashon.

79:8 No rekòrdá e inikidatnan di nos antepasadonan; laga Bo kompashon bin pronto na nos enkuentro, pasobra nos ta hopi abatí.

79:9 Yuda nos, O Dios di nos salbashon, pa e gloria di Bo nòmber; libra nos i pordoná nos pikánan, pa kousa di Bo nòmber.

79:10 Pakiko e nashonnan mester puntra: "Unda nan Dios ta?" Dilanti di nos bista, hasi konosí meimei di e nashonnan ku Bo ta venga e sanger dramá di Bo sirbidónan.

79:11 Laga e kehamentu di e prezo bin Bo dilanti; segun e grandesa di Bo poder preservá esnan kondená na morto.

79:12 I debolbé nos bisiñanan shete biaha den nan skochi e reproche ku kual nan a reprocháBo, O Señor.

79:13 Asina nos, Bo pueblo i e karnénan ku Bo ta pastoriá, lo gradisíBo pa semper; nos lo deklará Bo alabansa na tur generashon.testimonio di Asaf. Un salmo.

Salmonan 78 Salmonan 80