Salmonan 78

BSNP Edit

Salmonan 78

78:1 Skucha mi siñansa, O mi pueblo, inkliná boso oreanan na e palabranan di mi boka.

78:2 Lo mi habri mi boka i papia den parábola; lo mi papia di kosnan skondí di promé aya

78:3 ku nos a tende i tabata sa di djé, i ku nos tatanan a konta nos.

78:4 Nos lo no tene nan skondí pa nan yunan, ma nos lo konta e generashon benidero di e alabansanan di SEÑOR, di Su forsa i di Su obranan maraviyoso ku El a hasi.

78:5 Pasobra El a stablesé un testimonio den Jakòb, i a pone un lei den Israel, ku El a ordená nos tatanan, pa nan siña nan yunan esei;

78:6 pa e generashon benidero por konosé nan, esta, e yunan ku tin ku nase ainda, pa nan por lanta i konta nan yunan,

78:7 pa nan por pone nan konfiansa den Dios, i no lubidá e obranan di Dios, ma warda Su mandamentunan;

78:8 i pa nan no ta manera nan tatanan, un generashon kabesura i rebelde, un generashon ku no a prepará su kurason, i su spiritu no tabata fiel na Dios.

78:9 E yu hòmbernan di Efrain tabata tiradónan di flecha ekipá ku bog, tòg nan a hal'atras den e dia di bataya.

78:10 Nan no a warda e aliansa di Dios, i a nenga di kana den Su lei;

78:11 i nan a lubidá Su echonan i Su milagernan ku El a mustra nan.

78:12 El a hasi maraviyanan dilanti di nan tatanan, na tera di Egipto, den e kunuku di Soan.

78:13 El a dividí laman, i a hasi nan pasa dor di djé; i El a hasi e awanan keda para manera un muraya.

78:14 Anto di dia El a guia nan pa medio di un nubia, i henter anochi pa medio di un lus di kandela.

78:15 El a spleit e barankanan den desierto, i a duna nan awa pa bebe, komo for di e profundidatnan di laman.

78:16 Tambe El a laga koridanan di awa sali for di e baranka, i a hasi awa basha manera riu.

78:17 Tòg nan a sigui hasi piká kontra djE dor di rebeldiá kontra e Haltísimo den desierto.

78:18 I nan a tenta Dios den nan kurason dor di pidi kuminda segun nan deseo.

78:19 Sí, nan a papia kontra Dios; nan a puntra: "Dios por prepará un mesa den desierto?

78:20 Mira, El a dal e baranka, asina ku awa tabata brota bash'afó. I koridanan di awa tabata basha ofer. E por duna pan tambe? Lo E proveé karni pa Su pueblo?"

78:21 Pesei SEÑOR a tende i a rabia masha pisá, i un kandela a sende kontra Jakòb, i tambe Su rabia a lanta kontra Israel;

78:22 pasobra nan no tabata kere den Dios, i no tabata konfia den Su salbashon.

78:23 Tòg El a ordená e nubianan aya riba, i a habri e portanan di shelu;

78:24 i El a laga mana yobe riba nan pa nan kome, i a duna nan kuminda for di shelu.

78:25 Hende a kome pan di angel; El a manda nan kuminda na abundansia.

78:26 El a hasi bientu di pariba supla den e shelunan; i ku Su poder El a dirigí e bientu di sùit.

78:27 El a laga karni yobe riba nan, manera stòf-- parha ku hala, manera santu di laman.

78:28 I El a laga nan kai meimei di nan kampamentu, tur rònt di nan habitashonnan.

78:29 Asina nan a kome i a keda barika yen; i El a kumpli ku nan deseo.

78:30 Promé ku nan a satisfasé nan deseo, mientras ku nan kuminda tabata den nan boka ainda,

78:31 e rabia di Dios a lanta kontra nan, i a mata algun di esnan di mas robusto, i a dal e hòmbernan skohí di Israel mata.

78:32 Apesar di tur esaki, nan a sigui hasi piká, i no a kere den Su obranan maraviyoso.

78:33 Pesei El a laga nan dianan kaba den banidat, i nan añanan den teror.

78:34 Ora ku El a mata nan, e ora ei nan a busk'E, i nan a bolbe i a buska Dios ku tur seriedat;

78:35 i nan a kòrda ku Dios tabata nan baranka, i e Dios Haltísimo, nan Redentor.

78:36 Ma nan a labi'E ku nan boka i a gañ'E ku nan lenga.

78:37 Pasobra nan kurason no tabata firme pa kunE, ni nan no tabata fiel den Su aliansa.

78:38 Ma E, siendo miserikòrdioso, a pordoná nan inikidat, i no a destruí nan; hopi biaha El a kita Su rabia for di riba nan, i no a lanta tur-tur Su furia.

78:39 Pasobra El a kòrda ku ta karni nan tabata, un rosea ku ta pasa bai i ku no ta bolbe.

78:40 Kuantu biaha nan a bira rebelde kontra djE den e tera seku, i a hasiE tristu den desierto!

78:41 Bes tras bes nan a tenta Dios, i a proboká Esun Santu di Israel.

78:42 Nan no a kòrda riba Su poder, ni e dia ku El a libra nan for di e atversario,

78:43 tempu ku El a hasi Su señalnan na Egipto, i Su maraviyanan den e kunuku di Soan,

78:44 i a hasi nan riunan bira sanger, i tambe nan koridanan di awa, asina ku nan no por a bebe.

78:45 El a manda muskanan na kantidat meimei di nan, ku a devorá nan, i dorinan, ku a destruí nan.

78:46 Tambe El a entregá nan kosechanan na tirakochi maron, i e frutanan di nan trabou na tirakochi bèrdè.

78:47 El a destruí nan matanan di wendrùif ku hagel, i nan palunan di sikamor ku fròst.

78:48 Tambe El a entregá nan bakanan na hagel, i nan krianan di bestia chikitu na rayo di lamper.

78:49 El a manda Su rabia ardiente riba nan, furia, indignashon i angustia, un ehérsito di angel ku ta destruí.

78:50 El a traha un bereha pa Su rabia; E no a spar nan alma for di morto, ma a entregá nan bida na pestilensia,

78:51 i a mata tur primogénito na Egipto, e promé fruta di nan forsa den e tèntnan di Kam.

78:52 Ma Su pueblo El a hasi sali manera karné, i a guia nan den desierto manera un kria di bestia chikitu.

78:53 El a guia nan ku siguridat, asina ku nan no tabatin miedu; ma nan enemigunan, laman a tapa nan.

78:54 Asina El a hiba nan na Su tera santu, na e seru aki ku Su man drechi a konkistá.

78:55 Tambe El a kore ku e nashonnan dilanti di nan, i a parti un erensia pa nan segun midí, i a hasi e tribunan di Israel biba den nan tèntnan.

78:56 Sinembargo, nan a rebeldiá kontra e Dios Haltísimo, i no a warda Su testimonionan,

78:57 ma a hal'atras i a trata infiel, meskos ku nan tatanan; nan a desviá manera un bog engañoso,

78:58 nan a probok'E na rabia ku nan lugánan haltu, i a hasiE yalurs ku nan imagennan grabá.

78:59 Ora ku Dios a tende, El a rabia masha pisá, i a haña un odio masha grandi mes pa Israel,

78:60 asina ku El a bandoná e lugá di biba na Silo, e tènt ku El a pone meimei di hende;

78:61 i a entregá Su forsa na koutiverio, i Su gloria den man di e atversario.

78:62 Tambe El a entregá Su pueblo na spada, i a rabia masha pisá ku Su erensia.

78:63 Kandela a devorá nan hobennan, i no tabatin kantika di brùit pa Su birgennan.

78:64 Su saserdotenan a kai pa medio di spada; i Su biudanan no por a yora.

78:65 E ora ei Señor a lanta manera for di soño, manera un guerero bou di influensia di biña.

78:66 I El a kore ku Su enemigunan pone nan hal'atras; El a pone nan na reproche perpetuo.

78:67 Tambe El a rechasá e tènt di Jose, i no a skohe e tribu di Efrain,

78:68 ma a skohe e tribu di Juda, Seru Sion, ku E tabata stima.

78:69 I El a traha Su santuario manera e halturanan, manera e mundu ku El a stablesé pa semper.

78:70 Tambe El a skohe Su sirbidó David, i a sak'é for di e kurá-di-karné,

78:71 for di tras di e karnénan ku a kaba di wèrp El a tres'é, pa pastoriá Jakòb, Su pueblo, i Israel, Su erensia.

78:72 Asina el a pastoriá nan segun e integridat di su kurason, i a guia nan ku su mannan eksperto.

Salmonan 77 Salmonan 79