Salmonan 71

BSNP Edit

Salmonan 71

71:1 Den Bo, O SEÑOR, mi a tuma refugio; no lagami wòrdu brongosá nunka.

71:2 Librami den Bo hustisia i reskatámi; inkliná Bo orea na mi, i salbami.

71:3 Sea Abo un baranka di refugio pa mi, kaminda mi por bin tur ora; Bo a duna òrdu pa salbami, pasobra Bo ta mi baranka i mi fòrti.

71:4 Reskatámi, O mi Dios, for di man di e malbado, for di gara di e hasidó di maldat i e hende kruel.

71:5 Pasobra Bo ta mi speransa; O Señor DIOS, Bo ta mi konfiansa for di mi hubentut.

71:6 Dor di Bo mi a wòrdu sostení for di mi nasementu; Abo ta Esun ku a sakami for di barika di mi mama; pa semper lo mi alabáBo.

71:7 Pa hopi hende mi a bira un maraviya, pasobra Bo ta mi refugio fuerte.

71:8 Henter dia mi boka ta yen di Bo alabansa, i di Bo gloria.

71:9 No bentami afó den tempu di biehes; no bandonámi ora mi forsa ta faya.

71:10 Pasobra mi enemigunan a papia kontra mi; i esnan ku ta lur pa kita mi bida a konsultá huntu,

71:11 bisando: "Dios a bandon'é; pèrsiguié i gar'é, pasobra no tin ningun hende pa libr'é."

71:12 O Dios, no keda leu for di mi; O mi Dios, pura pa yudami!

71:13 Laga esnan ku ta atversarionan di mi alma keda brongosá i eliminá; laga esnan ku ta buska pa hasimi malu keda tapá ku reproche i desonor.

71:14 Ma pa loke t'ami, lo mi spera kontinuamente, i lo mi alabáBo ainda mas i mas.

71:15 Mi boka lo konta di Bo hustisia i di Bo salbashon henter dia; pasobra mi no sa kon hopi nan ta.

71:16 Lo mi bin ku e echonan poderoso di Señor DIOS; lo mi menshoná Bo hustisia, di Bo so.

71:17 O Dios, Bo a siñami for di mi hubentut; i te ainda mi ta deklará Bo obranan maraviyoso.

71:18 I asta ora mi bira bieu, ku kabei blanku, O Dios, no bandonámi, te ora mi deklará Bo poder na e generashon aki, Bo poder na tur esnan ku ta bin.

71:19 Pasobra Bo hustisia, O Dios, ta yega te na e shelunan; Abo ku a hasi kosnan grandi, O Dios, ken ta manera Bo?

71:20 Abo ku a hasimi mira hopi angustia i aflikshon lo rebibámi atrobe, i lo tresemi ariba atrobe for di e profundidatnan di tera.

71:21 Abo lo oumentá mi grandesa, i konsolámi atrobe.

71:22 Tambe lo mi alabáBo ku arpa, alabá Bo fieldat, O mi Dios; lo mi kanta alabansa na Bo ku salterio, O Abo, Esun Santu di Israel.

71:23 Mi lepnan lo grita di alegria ora mi ta kanta alabansa na Bo, i mi alma, ku Bo a redimí.

71:24 Mi lenga tambe lo papia di Bo hustisia henter dia; pasobra esnan ku ta buska di hasimi malu ta keda brongosá i umiyá.

Salmonan 70 Salmonan 72