Salmonan 7

BSNP Edit

7:1 O SEÑOR, mi Dios, den Bo mi a tuma refugio; salbami di tur esnan ku ta pèrsiguími, i librami,

7:2 pa nan no habraká mi alma manera leon, i lastrami bai kuné, sin ku tin un hende pa librami.

7:3 O SEÑOR mi Dios, si mi a hasi esaki, si tin inhustisia den mi mannan,

7:4 si mi a paga ku maldat esun ku tabata na pas ku mi, òf si mi a plùnder esun ku sin motibu tabata mi atversario,

7:5 anto laga e enemigu pèrsiguí mi alma, i alkans'é; i lagu'é trapa mi bida te na suela, i pone mi onor den stòf.

7:6 Lanta, O SEÑOR, den Bo rabia; halsa Bo mes kontra e furia di mi atversarionan, spièrta, mi Dios; Bo a ordená huisio.

7:7 Laga e asamblea di e pueblonan rondonáBo, i goberná riba nan for di e halturanan.

7:8 SEÑOR ta huzga e pueblonan; vindikámi, O SEÑOR, segun mi hustisia, segun mi integridat ku ta den mi.

7:9 Laga e maldat di e malbado yega na un fin, ma stablesé e hustu; pasobra e Dios hustu ta pone kurason i mente na prueba.

7:10 Mi eskudo ta den Dios, Kende ta salba esnan rekto di kurason.

7:11 Dios ta un hues hustu, i tur dia Dios ta rabiá ku e malbado.

7:12 Si un hende no repentí, E lo mula Su spada; El a span Su bog i a pon'é kla.

7:13 Tambe El a prepará Su armanan mortal; E ta prepará Su flechanan ardiente pa Su pèrsiguidónan.

7:14 Ata, e ta den e doló-di-parto di inikidat, i e ta konsebí pèrvèrsidat i ta pari falsedat.

7:15 El a koba un buraku i a hasié hundu, i a kai den e buraku ku e mes a koba.

7:16 Su pèrvèrsidat lo bolbe riba su mes kabes, i su violensia lo baha riba korona di su mes kabes.

7:17 Lo mi alabá SEÑOR segun Su hustisia, i lo mi kanta alabansa na e nòmber di e SEÑOR Haltísimo.