Salmonan 48

BSNP Edit

48:1 SEÑOR ta grandi i digno di ser alabá na gran manera, den e stat di nos Dios, Su seru santu.

48:2 Bunita pa motibu di su haltura, e goso di henter mundu, ta Seru Sion, leu aya den nòrt, e stat di e gran Rei.

48:3 Dios, den su palasionan, a hasi Su mes konosí komo un refugio.

48:4 Pasobra, mira, e reinan a reuní, tur huntu nan a pasa bai.

48:5 Nan a mir'é, nan a keda asombrá; nan a haña un sustu, tur turdí nan a hui bai.

48:6 Temblamentu a poderá di nan ayanan, doló, manera di un muhé na ora di parto.

48:7 Ku bientu di pariba Bo ta kibra barkunan di Tarsis.

48:8 Manera nos a tende, asina nos a mira den e stat di e SEÑOR di ehérsitonan, den e stat di nos Dios; Dios lo stablesé esaki pa semper.

48:9 Nos a kòrda riba Bo miserikòrdia, O Dios, meimei di Bo tèmpel.

48:10 Manera Bo nòmber, O Dios, asina Bo alabansa ta te na e finnan di tera; Bo man drechi ta yen di hustisia.

48:11 Laga Seru Sion ta kontentu, laga e yu muhénan di Juda regosihá pa motibu di Bo huisionan.

48:12 Kana rònt di Sion, i pasa rònt di djé. Konta su torennan;

48:13 konsiderá su murayanan di defensa; pasa dor di su palasionan; pa bo por konta esaki na e próksimo generashon.

48:14 Pasobra e Dios aki ta nos Dios, pa semper i semper; E lo guia nos te na morto.