Salmonan 40

BSNP Edit

Salmonan 40

40:1 Mi a spera ku pasenshi riba SEÑOR; i El a inkliná Su mes na mi i a skucha mi sklamashon.

40:2 El a sakami for di e pos di destrukshon, for di e lodo di klei; i El a pone mi pia riba un baranka i a hasi mi pasonan firme.

40:3 I El a pone un kantika nobo den mi boka, un kantika di alabansa na nos Dios; hopi lo mira esaki i teme, i lo konfia den SEÑOR.

40:4 Bendishoná ta e hende ku ta pone su konfiansa den SEÑOR, i ku no ta mira riba e orguyosonan, ni riba esnan ku ta desviá bai tras di mentira.

40:5 O SEÑOR mi Dios, hopi ta e maraviyanan ku Bo a hasi, i Bo pensamentunan pa ku nos; no tin ningun ku ta di kompará ku Bo; si mi lo kier a konta i papia di nan, nan lo tabata muchu hopi pa konta.

40:6 Sakrifisio i ofrenda di mainshi Bo no a deseá; Bo a habri mi oreanan; ofrenda kimá i ofrenda pa piká Bo no a eksigí.

40:7 E ora ei mi a bisa: "Ata, mi ta bin; den e ròl di e buki ta pará skirbí tokante di mi;

40:8 Pa hasi Bo boluntat, O mi Dios, ta un delisia pa mi; Bo Lei ta den mi kurason."

40:9 Mi a proklamá bon nobo di hustisia den e kongregashon grandi; ata, lo mi no frena mi lepnan, O SEÑOR, Bo sa esei.

40:10 Mi no a skonde Bo hustisia den mi kurason; mi a papia di Bo fieldat i di Bo salbashon; mi no a skonde Bo miserikòrdia i Bo bèrdat pa e kongregashon grandi.

40:11 Abo, O SEÑOR, lo no keda sin dunami Bo kompashon; Bo miserikòrdia i Bo bèrdat lo wardami kontinuamente.

40:12 Pasobra masha hopi maldat mes a rondonámi; mi inikidatnan a alkansámi, asina ku mi no por a mira; nan ta mas hopi ku e kabeinan riba mi kabes; i mi kurason a fayami.

40:13 Sea asina bon, O SEÑOR, di librami; O SEÑOR, pura pa yudami.

40:14 Laga esnan ku ta buska mi alma pa destruí keda brongosá i konhuntamente umiyá; laga esnan ku ta deseá malu pa mi wòrdu halá patras i keda desonrá.

40:15 Laga esnan ku ta bisami: "Ahá, ahá!" keda desolá pa motibu di nan bèrguensa.

40:16 Laga tur esnan ku ta buskaBo regosihá i keda kontentu den Bo; laga esnan ku ta stima Bo salbashon bisa kontinuamente: "SEÑOR sea engrandesí!"

40:17 Ma ami ta afligí i den nesesidat; sinembargo, Señor ta kòrda riba mi. Bo ta Esun ku ta yudami i ta librami; no tarda, O mi Dios.

Salmonan 39 Salmonan 41