Salmonan 36

BSNP Edit

36:1 Transgreshon ta papia ku e malbado den su kurason; no tin temor di Dios dilanti di su wowo.

36:2 Pasobra den su mes bista ta esei ta gañ'é, ku su inikidat lo no wòrdu deskubrí ni odiá.

36:3 E palabranan di su boka ta maldat i engaño; el a laga di ta sabí i di hasi bon.

36:4 E ta plania maldat riba su kama; e ta kohe un kaminda ku no ta bon; e no ta aboresé maldat.

36:5 Bo miserikòrdia, O SEÑOR, ta yega te den shelunan; Bo fieldat ta alkansá e nubianan.

36:6 Bo hustisia ta manera e serunan di Dios; Bo huisionan ta un gran profundidat. O SEÑOR, Bo ta preservá hende i bestia.

36:7 Ki presioso Bo miserikòrdia ta, O Dios! I e yunan di hende ta tuma refugio den e sombra di Bo halanan.

36:8 Nan ta bebe nan barika yen di e abundansia di Bo kas; i Bo ta duna nan di bebe for di e riu di Bo delisianan.

36:9 Pasobra ta serka Bo e fuente di bida ta; den Bo lus nos ta mira lus.

36:10 Laga Bo miserikòrdia kontinuá pa esnan ku konoséBo, i Bo hustisia pa esnan rekto di kurason.

36:11 No laga e pia di orguyo bin kontra mi, ni laga man di e malbado kore ku mi.

36:12 Ayanan e hasidónan di inikidat a kai; nan a wòrdu tirá abou i no por lanta mas.