Salmonan 33

BSNP Edit

33:1 Kanta ku alegria na SEÑOR, O boso, hustunan; alabansa ta pas pa esnan ku ta rekto.

33:2 Duna gradisimentu na SEÑOR ku lirio; kanta alabansa na djE ku arpa di dies kuèrdè.

33:3 Kanta un kantika nobo na djE; toka bunita, ku gritu di alegria.

33:4 Pasobra e palabra di SEÑOR ta bèrdadero, i tur Su obra ta hasí den fieldat.

33:5 E ta stima hustisia i huisio; mundu ta yen di e miserikòrdia di SEÑOR.

33:6 Dor di e palabra di SEÑOR e shelunan a wòrdu trahá, i dor di e rosea di Su boka, henter nan ehérsito.

33:7 E ta hunta awanan di laman manera un dam; E ta pone e profundidatnan den depósitonan.

33:8 Laga henter tera teme SEÑOR; laga tur habitante di mundu para ku temor Su dilanti.

33:9 Pasobra El a papia, i asina tabata; El a duna òrdu, i esei a bin na eksistensia.

33:10 SEÑOR ta hasi e konseho di nashonnan bira nada; E ta desbaratá plannan di e pueblonan.

33:11 E konseho di SEÑOR ta permanesé pa semper; e plannan di Su kurason ta di generashon pa generashon.

33:12 Bendishoná ta e nashon ku su Dios ta SEÑOR, e pueblo ku El a skohe pa Su propio erensia.

33:13 SEÑOR ta mira for di shelu; E ta opservá tur e yunan di hende;

33:14 for di Su lugá di biba E ta mira riba tur e habitantenan di tera.

33:15 E ta forma kurason di nan tur; E ta komprendé tur nan obranan.

33:16 Rei no ta wòrdu salbá pa medio di un ehérsito poderoso; un guerero no ta wòrdu librá pa medio di hopi forsa.

33:17 Un kabai ta speransa falsu pa gana viktoria; tampoko e no ta libra ningun hende ku su forsa enorme.

33:18 Ata, e wowo di SEÑOR ta riba esnan ku ta tem'E, riba esnan ku ta spera riba Su miserikòrdia,

33:19 pa libra nan alma for di morto, i pa tene nan na bida den tempu di hamber.

33:20 Nos alma ta spera riba SEÑOR; E ta nos yudansa i nos eskudo,

33:21 pasobra nos kurason ta regosihá den djE, pasobra nos ta konfia den Su nòmber santu.

33:22 Laga Bo miserikòrdia keda riba nos, O SEÑOR, meskos ku nos ta spera den Bo.Abimelek, kende a kore kuné, i el a bai.