Salmonan 32

BSNP Edit

Salmonan 32

32:1 Bendishoná ta esun, kende su transgreshon ta pordoná, kende su piká ta tapá!

32:2 Bendishoná ta e hende, kende su inikidat SEÑOR no ta tuma na kuenta, i den kende su spiritu no tin engaño!

32:3 Mientras ku mi a keda ketu, mi kurpa a para kaba na nada dor di mi kehamentu henter dia.

32:4 Pasobra di dia i anochi Bo man tabata pisá riba mi; mi vigor a seka manera den tempu di hopi kalor.

32:5 Mi a atmití mi piká na Bo, i mi inikidat mi no a skonde; mi a bisa: "Lo mi konfesá mi transgreshonnan na SEÑOR"; i Bo a pordoná e kulpa di mi piká.

32:6 Pesei, laga tur ku ta deboto hasi orashon na Bo den e tempu ku Bo por wòrdu hañá; siguramente den inundashon di awanan enorme nan lo no alkans'é.

32:7 Bo ta mi lugá di skonde; Bo ta wardami di angustia; Bo ta rondonámi ku kantika di liberashon.

32:8 Lo Mi instruíbo i siñabo e kaminda ku bo tin ku kana; lo Mi konsehábo; mi wowo ta riba bo.

32:9 No sea manera kabai òf manera mula, ku no tin komprendementu, ku mester wòrdu dominá ku bosal i frena, sino nan no ta bin serka bo.

32:10 Hopi ta e penanan di e malbado, ma esun ku ta konfia den SEÑOR, miserikòrdia lo rondon'é.

32:11 Sea kontentu den SEÑOR i regosihá, boso, hustunan, i grita di alegria, boso tur ku ta rekto di kurason.

Salmonan 31 Salmonan 33