Salmonan 30

BSNP Edit

Salmonan 30

30:1 Lo mi glorifikáBo, O SEÑOR, pasobra Bo a halsami, i no a laga mi enemigunan kontentá nan mes pa mi motibu.

30:2 O SEÑOR, mi Dios, mi a sklama na Bo pa yudansa, i Bo a kurami.

30:3 O SEÑOR, Bo a saka mi alma for di Seol; Bo a tenemi na bida, pa mi no tin mester di baha den pos.

30:4 Kanta alabansa na SEÑOR, boso Su santunan, i duna gradisimentu na Su nòmber santu.

30:5 Pasobra Su rabia ta pa un momento so, Su fabor ta pa bida largu; yoramentu por dura un anochi, ma un gritu di alegria ta bin ora dia ta habri.

30:6 Awor den mi prosperidat mi a bisa: "Lo mi no wòrdu moví nunka."

30:7 O SEÑOR, pa medio di Bo fabor Bo a hasi mi seru para firme; Bo a skonde Bo kara; mi a keda tur desmayá.

30:8 Na Bo, O SEÑOR, mi a sklama, i na SEÑOR mi a hasi súplika:

30:9 "Ta ki probecho tin den mi sanger, si mi baha den pos? Stòf lo alabáBo? E lo deklará Bo fieldat?

30:10 Tende, O SEÑOR, i tene miserikòrdia di mi, O SEÑOR, sea Abo mi yudadó."

30:11 Bo a kambia mi lamento na baliamentu; Bo a lòs mi paña-di-saku i a fahami ku alegria,

30:12 pa mi alma kanta alabansa na Bo i no keda ketu. O SEÑOR mi Dios, lo mi dunaBo gradisimentu pa semper.

Salmonan 29 Salmonan 31