Salmonan 27

BSNP Edit

Salmonan 27

27:1 SEÑOR ta mi lus i mi salbashon; di ken lo mi tin temor? SEÑOR ta e fortalesa di mi bida; di ken lo mi tin miedu?

27:2 Ora hasidónan di maldat, mi atversarionan i mi enemigunan, a bin riba mi pa devorá mi karni, nan a trompeká i a kai.

27:3 Maske un ehérsito kampa kontra mi, mi kurason lo no tin temor; maske guera lanta kontra mi, tòg lo mi tin konfiansa.

27:4 Un kos mi a deseá di SEÑOR, esei lo mi buska: ku mi por keda den e kas di SEÑOR tur e dianan di mi bida, pa kontemplá e bunitesa di SEÑOR, i pa meditá den Su tèmpel.

27:5 Pasobra den e dia di angustia E lo skondemi den Su tabernakel; den e lugá sekreto di Su tènt E lo skondemi; E lo hisami pone riba un baranka.

27:6 I awor mi kabes lo wòrdu halsá riba mi enemigunan ku ta tur rònt di mi; i den Su tènt lo mi ofresé sakrifisionan ku gritunan di alegria; lo mi kanta, sí, lo mi kanta alabansa na SEÑOR.

27:7 Tende mi bos, O SEÑOR, ora mi sklama; tene miserikòrdia di mi i kontestámi.

27:8 Ora Bo a bisami: "Buska Mi kara," mi kurason a kontestáBo: "Bo kara, O SEÑOR, lo mi buska."

27:9 No skonde Bo kara pa mi, no rechasá Bo sirbidó den Bo rabia; Bo tabata mi yudansa; no lagami, ni bandonámi, O Dios di mi salbashon!

27:10 Maske mi tata i mi mama bandonámi, SEÑOR lo rekohémi.

27:11 Siñami Bo kaminda, O SEÑOR, i guiami den un bereha di rektitut, pa motibu di mi enemigunan.

27:12 No entregámi na deseo di mi atversarionan, pasobra testigunan falsu a lanta kontra mi, i esnan ku ta respirá violensia.

27:13 Lo mi a desesperá, si mi no a kere ku lo mi mira e bondat di SEÑOR na e tera di e bibunan.

27:14 Spera riba SEÑOR; sea fuerte i E lo fortalesé bo kurason, sí, spera riba SEÑOR.

Salmonan 26 Salmonan 28