Salmonan 25

BSNP Edit

25:1 Na Bo, O SEÑOR, mi ta halsa mi alma.

25:2 O mi Dios, den Bo mi ta konfia. No lagami keda brongosá; no laga mi enemigunan triunfá riba mi.

25:3 Di bèrdat, ningun di esnan ku ta spera riba Bo lo keda brongosá; esnan ku ta transgresá sin motibu lo keda brongosá.

25:4 Hasimi konosé Bo kamindanan, O SEÑOR; siñami Bo berehanan.

25:5 Guiami den Bo bèrdat i siñami, pasobra ta Abo ta e Dios di mi salbashon; riba Bo mi ta spera henter dia.

25:6 Kòrda, O SEÑOR, Bo kompashon i Bo miserikòrdianan, pasobra nan ta for di etèrnidat.

25:7 No kòrda e pikánan di mi hubentut, ni mi transgreshonnan; konforme Bo miserikòrdia, kòrda riba mi, pa motibu di Bo bondat, O SEÑOR.

25:8 SEÑOR ta bon i rekto; pesei E ta instruí pekadónan den e kaminda.

25:9 E ta guia e umildenan den huisio, i E ta siña e umildenan Su kaminda.

25:10 Tur e berehanan di SEÑOR ta miserikòrdia i bèrdat pa esnan ku ta warda Su aliansa i Su testimonionan.

25:11 Pa motibu di Bo nòmber, O SEÑOR, pordoná mi inikidat, pasobra esei ta grandi.

25:12 Ta ken ta e hende ku ta teme SEÑOR? E lo instruié den e kaminda ku e mester skohe.

25:13 Su alma lo biba den prosperidat, i su desendientenan lo eredá e tera.

25:14 E komunion íntimo di SEÑOR ta ku esnan ku ta tem'E, i E lo hasi nan konosé Su aliansa.

25:15 Mi wowonan ta kontinuamente riba SEÑOR, pasobra E lo saka mi pianan for di reda.

25:16 Bira wak mi i tene miserikòrdia di mi, pasobra mi ta solitario i afligí.

25:17 E angustianan di mi kurason ta oumentá; sakami for di mi anshanan.

25:18 Mira mi aflikshon i mi doló, i pordoná tur mi pikánan.

25:19 Mira mi enemigunan, pasobra nan ta hopi; i nan ta odiami ku odio violento.

25:20 Warda mi alma i librami; no lagami keda brongosá, pasobra mi ta tuma refugio den Bo.

25:21 Laga integridat i rektitut wardami, pasobra mi ta spera riba Bo.

25:22 Redimí Israel, O Dios, for di tur su angustianan.