Salmonan 119

BSNP Edit

Salmonan 119

119:1 Bendishoná ta esnan ku nan kaminda ta sin mancha, ku ta kana den e lei di SEÑOR.

119:2 Bendishoná ta esnan ku ta warda Su testimonionan, ku ta busk'E ku henter nan kurason;

119:3 tampoko nan no ta hasi inhustisia; nan ta kana den Su kamindanan.

119:4 Bo a ordená Bo preseptonan pa nos kumpli ku nan ku diligensia.

119:5 O ku mi kamindanan por wòrdu stablesí, pa warda Bo statutonan!

119:6 E ora ei lo mi no keda brongosá, ora mi paga tino na tur Bo mandamentunan.

119:7 Lo mi dunaBo gradisimentu ku rektitut di kurason, ora mi siña Bo huisionan hustu.

119:8 Lo mi warda Bo statutonan; no bandonámi kompletamente!

119:9 Kon un hoben por tene su kaminda puru? Dor di mantené esei segun Bo palabra.

119:10 Ku henter mi kurason mi a buskaBo; no lagami desviá for di Bo mandamentunan.

119:11 Bo palabra mi a skonde den mi kurason, pa mi no peka kontra Bo.

119:12 Bo ta bendishoná, O SEÑOR; siñami Bo statutonan.

119:13 Ku mi lepnan mi a deklará tur e ordenansanan di Bo boka.

119:14 Mi a regosihá den e kaminda di Bo testimonionan, meskos ku den tur rikesa.

119:15 Lo mi meditá den Bo preseptonan, i konsiderá Bo kamindanan.

119:16 Lo mi tin delisia den Bo statutonan; lo mi no lubidá Bo palabra.

119:17 Hasi bon na Bo sirbidó, pa mi por biba i warda Bo palabra.

119:18 Habri mi wowo, pa mi por kontemplá kosnan maraviyoso for di Bo lei.

119:19 Mi ta un stranhero riba tera; no skonde Bo mandamentunan pa mi.

119:20 Mi alma ta muri di anhelo pa Bo ordenansanan na tur momento.

119:21 Bo ta reprendé e arogantenan, esnan maldishoná, ku ta desviá for di Bo mandamentunan.

119:22 Kita reproche i menospresio for di mi, pasobra mi ta warda Bo testimonionan.

119:23 Maske prensnan sinta papia kontra mi, Bo sirbidó ta meditá den Bo statutonan.

119:24 Bo testimonionan tambe ta mi delisia i mi konseheronan.

119:25 Mi alma ta pega duru na stòf; rebibámi segun Bo palabra.

119:26 Mi a konta di mi kamindanan i Bo a kontestámi; siñami Bo statutonan.

119:27 Hasimi komprendé e kaminda di Bo preseptonan; asina lo mi meditá den Bo maraviyanan.

119:28 Mi alma ta yora di tristesa; fortalesémi segun Bo palabra.

119:29 Kita e kaminda di mentira for di mi, i den Bo miserikòrdia, dunami Bo lei.

119:30 Mi a skohe e kaminda di fieldat; Bo ordenansanan mi a pone mi dilanti.

119:31 Mi ta tene duru na Bo testimonionan; O SEÑOR, no ponemi na bèrguensa!

119:32 Lo mi kore riba e kaminda di Bo mandamentunan, pasobra Abo lo engrandesé mi kurason.

119:33 Siñami, O SEÑOR, e kaminda di Bo statutonan, i lo mi warda esei te na fin.

119:34 Dunami komprendementu, pa mi por warda Bo lei i kumpli kuné ku henter mi kurason.

119:35 Hasimi kana den e bereha di Bo mandamentunan, pasobra mi tin delisia den djé.

119:36 Inkliná mi kurason na Bo testimonionan, i no na ganashi desonesto.

119:37 Kita mi bista for di banidat; i rebibámi den Bo kamindanan.

119:38 Konfirmá Bo palabra na Bo sirbidó, kual ta pa esnan ku tin temor pa Bo ku tur reverensia.

119:39 Kita for di mi e reproche ku mi ta teme, pasobra Bo ordenansanan ta bon.

119:40 Mira, mi ta anhelá na Bo preseptonan; rebibámi pa medio di Bo hustisia.

119:41 Laga Bo miserikòrdia tambe bin na mi, O SEÑOR, Bo salbashon segun Bo palabra;

119:42 asina lo mi tin un kontesta pa esun ku ta reprochámi, pasobra mi ta konfia den Bo palabra.

119:43 I no kita e palabra di bèrdat kompletamente for di mi boka, pasobra mi speransa ta den Bo ordenansanan.

119:44 Asina lo mi warda Bo lei kontinuamente, pa semper i semper.

119:45 I lo mi kana den libertat, pasobra mi ta buska Bo preseptonan.

119:46 Tambe lo mi papia di Bo testimonionan dilanti di reinan, i lo no tin bèrguensa.

119:47 I lo mi tin delisia den Bo mandamentunan ku mi ta stima.

119:48 I lo mi halsa mi mannan na Bo mandamentunan ku mi ta stima; i lo mi meditá den Bo statutonan.

119:49 Kòrda e palabra duná na Bo sirbidó, den kual Bo a hasimi spera.

119:50 Esaki ta mi konsuelo den mi aflikshon, ku ta Bo palabra a rebibámi.

119:51 E arogantenan a hasi masha bofon di mi; tòg mi no ta desviá for di Bo lei.

119:52 Mi a kòrda Bo ordenansanan di promé aya, O SEÑOR, i mi ta konsolá mi mes.

119:53 Indignashon a garami pa motibu di e malbadonan ku ta bandoná Bo lei.

119:54 Bo statutonan ta mi kantikanan den e kas di mi peregrinashon.

119:55 O SEÑOR, anochi mi ta kòrda riba Bo nòmber i ta warda Bo lei.

119:56 Asina a sosodé ku mi, pasobra mi ta warda Bo preseptonan.

119:57 SEÑOR ta mi porshon; mi a primintí di warda Bo palabranan.

119:58 Mi a buska Bo fabor ku henter mi kurason; tene miserikòrdia di mi segun Bo palabra.

119:59 Mi a pensa bon tokante di mi kamindanan, i a dirigí mi pianan na Bo testimonionan.

119:60 Mi a pura i no a tarda pa warda Bo mandamentunan.

119:61 E lasonan di e malbadonan a rondonámi, ma mi no a lubidá Bo lei.

119:62 Mei anochi lo mi lanta pa dunaBo gradisimentu, pa motibu di Bo ordenansanan hustu.

119:63 Mi ta kompañero di tur esnan ku ta temeBo, i di esnan ku ta warda Bo preseptonan.

119:64 Tera ta yen di Bo miserikòrdia, O SEÑOR; siñami Bo statutonan.

119:65 Bo tabata bon pa Bo sirbidó, O SEÑOR, segun Bo palabra.

119:66 Siñami bon disernimentu i konosementu, pasobra mi ta kere Bo mandamentunan.

119:67 Promé ku mi a wòrdu afligí, mi a desviá, ma awor mi ta warda Bo palabra.

119:68 Bo ta bon i ta hasi bon; siñami Bo statutonan.

119:69 E arogantenan a saka mentira kontra mi; ku henter mi kurason lo mi warda Bo preseptonan.

119:70 Nan kurason ta tur tapá ku vèt, ma ami tin delisia den Bo lei.

119:71 Ta bon pa mi ku mi a wòrdu afligí, pa mi por siña Bo statutonan.

119:72 E lei di Bo boka ta mihó pa mi ku miles di pida oro i plata.

119:73 Bo mannan a trahami i a formami; dunami komprendementu, pa mi siña Bo mandamentunan.

119:74 Laga esnan ku ta temeBo mirami i keda kontentu, pasobra mi speransa ta den Bo palabra.

119:75 Mi sa, O SEÑOR, ku Bo huisionan ta hustu, i ku den fieldat Bo a afligími.

119:76 Laga Bo miserikòrdia konsolámi, segun Bo palabra na Bo sirbidó.

119:77 Laga Bo kompashon bin riba mi, pa mi por biba, pasobra Bo lei ta mi delisia.

119:78 Laga e arogantenan keda brongosá, pasobra nan a kalumniámi sin motibu, ma ami lo meditá den Bo preseptonan.

119:79 Laga esnan ku ta temeBo bolbe serka mi, esnan ku konosé Bo testimonionan.

119:80 Laga mi kurason ta perfekto den Bo statutonan, pa mi no keda brongosá.

119:81 Mi alma ta muri di anhelo pa Bo salbashon; mi speransa ta den Bo palabra.

119:82 Mi wowonan ta faya di anhelo pa Bo palabra, bisando: "Ki ora lo Bo konsolámi?"

119:83 Maske mi a bira manera un saku di kueru den huma, mi no ta lubidá Bo statutonan.

119:84 Kuantu e dianan di Bo sirbidó lo ta? Ki tempu lo Bo ehekutá huisio riba esnan ku ta pèrsiguími?

119:85 E arogantenan a koba buraku pa mi, lokual no ta konforme Bo lei.

119:86 Tur Bo mandamentunan ta fiel; ku mentira nan a pèrsiguími; yudami!

119:87 Nan a hera di kaba ku mi riba tera, ma pa loke t'ami, mi no a bandoná Bo preseptonan.

119:88 Rebibámi segun Bo miserikòrdia, pa asina mi warda e testimonio di Bo boka.

119:89 Pa semper, O SEÑOR, Bo palabra ta stablesí den shelu.

119:90 Bo fieldat ta di generashon pa generashon; Bo a stablesé tera, i e ta keda para.

119:91 Nan ta keda para te dia djawe segun Bo ordenansanan, pasobra nan tur ta Bo sirbidónan.

119:92 Si Bo lei no tabata mi delisia, lo mi a peresé kaba den mi aflikshon.

119:93 Nunka lo mi lubidá Bo preseptonan, pasobra pa medio di nan Bo a rebibámi.

119:94 Mi ta di Bo, salbami, pasobra mi a buska Bo preseptonan.

119:95 E malbadonan ta wardami pa nan destruími; lo mi konsiderá Bo testimonionan.

119:96 Mi a mira un límite na tur perfekshon; Bo mandamentu ta súmamente amplio.

119:97 O kuantu mi ta stima Bo lei! E ta mi meditashon henter dia.

119:98 Bo mandamentunan ta hasimi bira mas sabí ku mi enemigunan, pasobra semper nan ta ku mi.

119:99 Mi tin mas komprendementu ku tur mi siñadónan, pasobra Bo testimonionan ta mi meditashon.

119:100 Mi ta komprendé mas ku e bieunan, pasobra mi a warda Bo preseptonan.

119:101 Mi a detené mi pianan for di tur mal kaminda, pa mi por warda Bo palabra.

119:102 Mi no a desviá for di Bo ordenansanan, pasobra ta Abo mes a siñami.

119:103 Ki dushi Bo palabranan ta pa mi shel'i boka, mas dushi ku miel den mi boka!

119:104 For di Bo preseptonan mi ta haña komprendementu; pesei mi ta odia tur kaminda di mentira.

119:105 Bo palabra ta un lampi pa mi pia i un lus pa mi kaminda.

119:106 Mi a hura i lo mi konfirmá esaki, ku lo mi warda Bo ordenansanan hustu.

119:107 Mi ta masha afligí mes; rebibámi, O SEÑOR, segun Bo palabra.

119:108 Aseptá, O SEÑOR, e ofrendanan boluntario di mi boka, i siñami Bo ordenansanan.

119:109 Mi bida ta kontinuamente na peliger; tòg mi no ta lubidá Bo lei.

119:110 E malbadonan a pone un trampa pa mi; tòg mi no a desviá for di Bo preseptonan.

119:111 Mi a eredá Bo testimonionan pa semper, pasobra nan ta e goso di mi kurason.

119:112 Mi a inkliná mi kurason pa kumpli ku Bo statutonan pa semper, sí, te na fin.

119:113 Mi ta odia esnan indesiso, ma mi ta stima Bo lei.

119:114 Bo ta mi lugá di skonde i mi eskudo; mi speransa ta den Bo palabra.

119:115 Bai for di mi, boso, hasidónan di maldat, pa mi por warda e mandamentunan di mi Dios.

119:116 Sostenémi segun Bo palabra, pa mi por biba, i no lagami keda na bèrguensa den mi speransa.

119:117 Sostenémi, i lo mi ta sigur, i lo mi respetá Bo statutonan kontinuamente.

119:118 Bo a rechasá tur esnan ku ta desviá for di Bo statutonan, pasobra nan engaño ta en bano.

119:119 Tur e malbadonan di mundu Bo a kita manera skuma; pesei mi ta stima Bo testimonionan.

119:120 Mi karni ta tembla di temor pa Bo, i mi tin miedu di Bo huisionan.

119:121 Mi a hasi huisio i hustisia; no entregámi na mi opresornan.

119:122 Para bòrg na fabor di Bo sirbidó; no laga e arogantenan oprimími.

119:123 Mi wowonan ta faya di anhelo pa Bo salbashon i pa Bo palabra hustu.

119:124 Trata ku Bo sirbidó segun Bo miserikòrdia, i siñami Bo statutonan.

119:125 Mi ta Bo sirbidó; dunami komprendementu, pa mi por konosé Bo testimonionan.

119:126 Ta tempu pa SEÑOR aktua, pasobra nan a kibra Bo lei.

119:127 Pesei mi ta stima Bo mandamentunan mas ku oro, sí, mas ku oro fini.

119:128 Pesei mi ta konsiderá komo rekto tur Bo preseptonan tokante di tur kos; mi ta odia tur kaminda di mentira.

119:129 Bo testimonionan ta maraviyoso; pesei mi alma ta warda nan.

119:130 E habrimentu di Bo palabranan ta iluminá; e ta duna komprendementu na e simpelnan.

119:131 Mi a habri mi boka hanchu i a suspirá, pasobra mi tabatin asina un deseo pa Bo mandamentunan.

119:132 Mirami i tene miserikòrdia di mi, manera Bo sa hasi ku esnan ku ta stima Bo nòmber.

119:133 Stablesé mi pasonan den Bo palabra, i no laga ningun inikidat tin dominio riba mi.

119:134 Redimími for di opreshon di hende, pa mi por warda Bo preseptonan.

119:135 Hasi Bo kara resplandesé riba Bo sirbidó, i siñami Bo statutonan.

119:136 Riunan di awa ta basha for di mi wowo, pasobra nan no ta warda Bo lei.

119:137 Bo ta hustu, O SEÑOR, i Bo huisionan ta rekto.

119:138 Bo a ordená Bo testimonionan den rektitut i den gran fieldat.

119:139 Mi zelo a kaba ku mi, pasobra mi atversarionan a lubidá Bo palabranan.

119:140 Bo palabra ta puru, pesei Bo sirbidó ta stim'é.

119:141 Mi ta chikitu i despresiá, tòg mi no ta lubidá Bo preseptonan.

119:142 Bo hustisia ta un hustisia etèrno, i Bo lei ta bèrdat.

119:143 Aflikshon i angustia a bin riba mi; tòg Bo mandamentunan ta mi delisia.

119:144 Bo testimonionan ta hustu pa semper; dunami komprendementu pa mi biba.

119:145 Mi a sklama ku henter mi kurason; kontestámi, O SEÑOR! Lo mi warda Bo statutonan.

119:146 Mi a sklama na Bo; salbami, i lo mi warda Bo testimonionan.

119:147 Promé ku mardugá mi ta lanta i ta pidi yudansa; mi speransa ta den Bo palabranan.

119:148 Mi wowo ta antisipá e wardanan di anochi, pa mi por meditá den Bo palabra.

119:149 Tende mi bos segun Bo miserikòrdia; rebibámi, O SEÑOR, segun Bo ordenansanan.

119:150 Esnan ku ta sigui tras di maldat ta hala serka; nan ta keda leu for di Bo lei.

119:151 Abo ta serka, O SEÑOR, i tur Bo mandamentunan ta bèrdat.

119:152 For di promé aya mi a komprendé for di Bo testimonionan, ku Bo a funda nan pa semper.

119:153 Mira mi aflikshon i reskatámi, pasobra mi no ta lubidá Bo lei.

119:154 Defendé mi kaso i redimími; rebibámi segun Bo palabra.

119:155 Salbashon ta keda leu for di e malbadonan, pasobra nan no ta buska Bo statutonan.

119:156 Bo miserikòrdia ta grandi, O SEÑOR; rebibámi segun Bo ordenansanan.

119:157 Mi pèrsiguidónan i mi atversarionan ta hopi, tòg mi no ta desviá for di Bo testimonionan.

119:158 Mi ta mira e traidónan i ta aboresé nan, pasobra nan no ta warda Bo palabra.

119:159 Mira kon mi ta stima Bo preseptonan; rebibámi, O SEÑOR, segun Bo miserikòrdia.

119:160 Bo palabra den Su totalidat ta bèrdat, i kada un di Bo ordenansanan hustu ta etèrno.

119:161 Prensnan ta pèrsiguími sin motibu, ma mi kurason ta teme Bo palabranan.

119:162 Mi ta regosihá ofer di Bo palabra, manera un hende ku ta haña gran botín.

119:163 Mi ta odia i ta detestá mentira, ma mi ta stima Bo lei.

119:164 Shete biaha pa dia mi ta alabáBo, pa motibu di Bo ordenansanan hustu.

119:165 Esnan ku ta stima Bo lei tin gran pas, i nada no ta hasi nan trompeká.

119:166 Mi ta spera riba Bo salbashon, O SEÑOR, i ta kumpli ku Bo mandamentunan.

119:167 Mi alma ta warda Bo testimonionan, i mi ta stima nan masha hopi mes.

119:168 Mi ta warda Bo preseptonan i Bo testimonionan, pasobra tur mi kamindanan ta Bo dilanti.

119:169 Laga mi sklamashon yega Bo dilanti, O SEÑOR; dunami komprendementu segun Bo palabra.

119:170 Laga mi súplika yega Bo dilanti; librami segun Bo palabra.

119:171 Laga mi lepnan ekspresá alabansa, pasobra Bo ta siñami Bo statutonan.

119:172 Laga mi lenga kanta di Bo palabra, pasobra tur Bo mandamentunan ta hustisia.

119:173 Laga Bo man ta kla pa yudami, pasobra mi a skohe pa Bo preseptonan.

119:174 Mi ta anhelá na Bo salbashon, O SEÑOR, i Bo lei ta mi delisia.

119:175 Laga mi alma biba pa e por alabáBo, i laga Bo ordenansanan yudami.

119:176 Mi a kana dwal manera un karné pèrdí; buska Bo sirbidó, pasobra mi no ta lubidá Bo mandamentunan.

Salmonan 118 Salmonan 120