Salmonan 105

BSNP Edit

105:1 Duna gradisimentu na SEÑOR, invoká Su nòmber; hasi Su echonan konosí den e pueblonan.

105:2 Kanta na djE, kanta alabansa na djE; papia di tur Su maraviyanan.

105:3 Gloria den Su nòmber santu; laga e kurason di esnan ku ta buska SEÑOR ta kontentu.

105:4 Buska SEÑOR i Su fortalesa; buska Su kara kontinuamente.

105:5 Kòrda Su echonan maraviyoso ku El a hasi, Su milagernan i e huisionan di Su boka,

105:6 O simia di Abraham, Su sirbidó, O yunan di Jakòb, Su skohínan!

105:7 E ta SEÑOR nos Dios; Su huisionan ta den henter mundu.

105:8 El a kòrda Su aliansa pa semper, e palabra ku El a ordená na mil generashon,

105:9 e aliansa ku El a sera ku Abraham, i Su huramentu na Isaak.

105:10 Anto El a konfirmá esaki na Jakòb komo un statuto, na Israel komo un aliansa etèrno,

105:11 bisando: "Na bo lo Mi duna tera di Kanaan komo e porshon di bo erensia."

105:12 Tempu ku nan tabata poko hende ainda, masha poko mes, i stranhero den djé.

105:13 I nan a kana dwal di un nashon pa otro, di un reino pa un otro pueblo.

105:14 E no a pèrmití ningun hende oprimí nan; El a reprendé reinan pa nan motibu,

105:15 bisando: "No mishi ku Mi ungínan, ni hasi malu na Mi profetanan."

105:16 I El a manda un hamber riba tera; El a kibra henter e provishon di pan.

105:17 El a manda un hòmber nan dilanti, Jose, kende a wòrdu bendí komo esklabu.

105:18 Nan a lastimá su pianan ku bui, i su nèk nan a sera den heru,

105:19 te ora ku su palabra a wòrdu kumplí, te ora ku e palabra di SEÑOR a proba ku e tabatin rason.

105:20 E rei a duna òrdu pa lòs é, e gobernante di e pueblonan a pon'é den libertat.

105:21 El a hasié señor di su kas, i gobernante riba tur su propiedatnan,

105:22 pa enkarselá su prensnan ki ora ku e tabata kier, pa e por a siña su ansianonan sabiduria.

105:23 Israel tambe a bin Egipto; i Jakòb a keda biba komo stranhero na tera di Kam.

105:24 I El a hasi Su pueblo multipliká masha hopi mes, i a hasi nan mas fuerte ku nan atversarionan.

105:25 El a kambia nan kurason pa nan odia Su pueblo, pa trata Su sirbidónan ku astusia.

105:26 El a manda Su sirbidó Moisés, i Aaron, kende El a skohe.

105:27 Nan a hasi Su señalnan meimei di nan, i Su milagernan na tera di Kam.

105:28 El a manda skuridat i a hasi e tera bira skur, i nan no a rebeldiá kontra Su palabranan.

105:29 El a hasi nan awanan bira sanger, i a hasi ku nan piskánan a muri.

105:30 Nan tera a keda pestá di dori, asta den e kambernan di nan reinan.

105:31 El a papia, i a bin un nubia di muska i wimpiri den henter nan teritorio.

105:32 El a duna nan hagel pa yobida, flam di kandela den nan tera.

105:33 Tambe El a destruí nan matanan di wendrùif i nan palunan di figo, i a kibra e palunan di nan teritorio na pida-pida.

105:34 El a papia, i tirakochi a bin, i bichi di tirakochi na kantidat,

105:35 ku a kome tur vegetashon di nan tera, i ku a kome tur fruta di nan kunuku.

105:36 Tambe El a mata tur primogénito den nan tera, e promé fruta di tur nan vigor.

105:37 E ora ei El a saka nan afó, kargá ku plata i oro; i den nan tribunan no tabatin ningun hende ku a trompeká.

105:38 Egipto a keda kontentu ora nan a bai, pasobra temor pa nan a drenta nan.

105:39 El a habri un nubia pa tapa nan, i kandela pa lusa anochi.

105:40 Nan a pidi, i El a trese patrishi, i a satisfasé nan ku e pan di shelu.

105:41 El a habri e baranka, i awa a basha for di djé; esei a kore manera riu den e lugánan seku.

105:42 Pasobra El a kòrda Su palabra santu na Su sirbidó Abraham;

105:43 i El a saka Su pueblo ku goso, Su skohínan ku un gritu di alegria.

105:44 Tambe El a duna nan e teranan di e nashonnan, pa nan kohe pa nan mes e fruta di trabou di e pueblonan,

105:45 asina ku nan por a warda Su statutonan i kumpli ku Su leinan. Alabá SEÑOR!